ރާއްޖެ-ޗައިނާ ޓްރޭޑް ފޯރަމްގައި ބައިވެރިވާން ހުޅުވާލައިފި
ދިވެހިރާއްޖެއާ ޗައިނާއާ ދެމެދު ބާއްވާ ޓްރޭޑް ފޯރަމްގައި ބައިވެރިވުމުގެ ފުރުސަތު އިކޮނޮމިކް މިނިސްޓްރީން ހުޅުވާލައިިފި އެވެ.
އެކަމަށް ހުޅުވާލީ އިއްޔެ އެ މިނިސްޓްރީން ސަރުކާރުގެ ގެޒެޓްގައި ޝާއިއުކުރި އިއުލާނެއް މެދުވެރިކޮށެވެ.
މިނިސްޓްރީން ބުނީ ޓްރޭޑް އިންވެސްޓްމެންޓް ފޯރަމް އޮންނާނީ އޯގަސްޓު މަހުގެ 6 ވަނަ ދުވަހު ކަމަށެވެ. އެ ފޯރަމްގައި ޗައިނާގެ ސްޓޭންޑިން ކޮމިޓީ އޮފް ސިޝުއާން ޕްރޮވިންޝިއަލް ވައިސް ޗެއާމަން ޒޫ ޗުންޝިއު އިސްކޮށް ހުންނަވައި 6 މެންބަރުންގެ މައްޗަށް އެކުލެވޭ ވަފްދެއްވެސް ބައިވެރިވެ ވަޑައިގަންނަވާނެ އެވެ.
މި ދަތުރުގެ މައިގަނޑު މަގްސަދަކީ ސިޝުއާން ޕްރޮވިންސާއި ދިވެހިރާއްޖެއާ ދެމެދު ވިޔަފާރީގެ ގުޅުން ފުޅާކުރުމާ ގުޅޭގޮތުން މަޝްވަރާ ކުރުމެވެ.
ޓްރޭޑް ކޮންފަރެންސްގައި ބައިވެރިވާ ޗައިނާގެ ސިޝުއާން ޕްރޮވިންސްގެ ވިޔަފާރިތަކުގެ ލިސްޓެއް މިނިސްޓްރީން އާއްމުކޮށްފައިވެ އެވެ.
އެއީ:
- ދަނޑުވެރިކަން
- މޭވާ އަދި ތަރުކާރީ ސަޕްލައިކުރާ ފަރާތްތައް
- ކާބޯތަކެތި އުފެއްދުމާއި، ޕްރޮސެސް ކުރުމާއި އެކްސްޕޯޓް އަދި ސަޕްލައިއާއި ބެހޭ ވިޔަފާރި
- ކޮންސިއުމާ ގުޑްސް އަދި ހޯލްސޭލް ވިޔަފާރި
- ފަތުރުވެރިކަމާއި ބެހޭ ދާއިރާ
އެ ދާއިރާތަކުން ޒިޔާރަތްކުރާ ކުންފުނިތަކާ އަދި ސިޝުއާން ޕްރޮވިންސް ގެ އިސްފަރާތްތަކާ ބައްދަލުކޮށް މަޝްވަރާ ކުރުމަށް ޝައުގުވެރިކަން ހުރި ދިވެހި ވިޔަފާރިތަކުން މި މަހުގެ 18 ވަނަ ދުވަހުގެ 14.00 ގެ ކުރިން، އެކަން ބަޔާންކޮށް އެކަމަށް ހާއްސަ ކުރެވިފައިވާ އޮންލައިން ފޯމު ފުރިހަމަ ކުރުމަށްފަހު ހުށަހެޅުމަށް މިނިސްޓްރީން އެދެ އެވެ.
ކޮންފަރެންސްގައި ބައިވެރިވުމުގެ ފުރުސަތު ދިނުމުގައި ތަނުގެ ޖާގައަށް ބަލައި ސިޝުއާން އިން އަންނަ ވިޔަފާރިތަކާ އެންމެ ގުޅޭ ދާއިރާތަކުގެ ވިޔަފާރިތަކަށް އިސްކަން ދޭނެ ކަމަށް މިނިސްޓްރީގެ އިއުލާނުގައި ބުންޏެވެ.
ކޮންފަރެންސް އާއި ގުޅޭގޮތުން އިތުރު މައުލޫމާތު 3333181 ނުވަތަ 3333182 އަށް ގުޅުމުން ލިބޭނެ އެވެ.
Ads by STO
