ގަވަރުނަރު ހާޝިމް ވަކިކުރަން މާދަމާއަށް އެޖެންޑާކޮށްފި
މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރުގެ މަގާމުން އަލީ ހާޝިމް ވަކިކުރަން ރައްޔިތުންގެ މަޖިލީހުގެ މާދަމާގެ ޖަލްސާ އަށް އެޖެންޑާކޮށްފި އެވެ.
ގަވަރުނަރު ހާޝިމް ވަކިކުރުމަށް މަޖިލީހުގެ މާލިއްޔަތު ކޮމިޓީއަށް ހުށަހެޅުއްވީ މަޖިލީހުގެ ނައިބު ރައީސް އަދި ދިއްގަރު ދާއިރާގެ މެންބަރު އަހުމަދު ނާޒިމެވެ. ހާޝިމް ވަކިކުރަން ރައީސް ޑރ. މުހައްމަދު މުއިއްޒަށް ލަފާއަރުވަން މާލިއްޔަތު ކޮމިޓީން ފާސްކުރީ ބުދަ ދުވަހު އެވެ.
ޖަވާބުދާރީވާން ދެ ފުރުސަތެއް ހާޝިމް އަށް ކޮމިޓީން ދިނެވެ. އެކަމަކު އާލާސްކަންފުޅާ އުޅުއްވާތީވެ ކޮމިޓީގެ ބައްދަލުވުންތަކަށް ހާޝިމް ހާޒިރުވެވަޑައިގެންފައިނުވާއިރު، އޭގެ ބަދަލުގައި ޖަވާބުދާރީވެވަވަޑައިގެންނެވީ ސިޓީއަކުންނެވެ.
މާލިއްޔަތު ކޮމިޓީން ގަވަރުނަރުގެ ހާޝިމް ވަކިކުރުމަށް ނިންމި ސަބަބުތަކުގެ ތެރޭގައި ރާއްޖޭގައި ހިންގާ ބޭންކުތަކާއި ފައިނޭންޝަލް އިންސްޓިޓިއުޓްތަކުން އާއްމުންނަށް ލޯނު ދޫކުރާ މިންވަރު ނުސީދާކޮށް ހިފަހައްޓައި ބޭންކުތަކުގެ ރިޒާމް އެމްއެމްއޭގައި ބެހެއްޓުމަށް ގަވަރުނަރު ބާރުއެޅުއްވުމާއި އެގޮތަށް އަމަލުކުރުމުން އިގްތިސާދުގައި ދައުރުވާން ހުރި ފައިސާ މަދުވެ، އިގްތިސޯދީ މަސައްކަތްތައް ހުއްޓި، ގައުމުގެ އިގްތިސާދީ ދުވެލި މަޑުޖެހިފައިވުން ހިމެނެ އެވެ.
އެ ކޮމިޓީގެ ނައިބް މުގައްރިރުކަންވެސް ކުރައްވާ ނާޒިމު ވިދާޅުވެފައިވާ ގޮތުން އިގުތިސޯދު ހީނަރުވެ، އަލުން އަނބުރާ އިޔާދަކުރަން އުނދަގޫ ހިސާބަކަށް ގައުމުގެ އިގުތިސޯދު ނިކަމެތިވެގެން ދިޔައިރު، އެމްއެމްއޭގެ ގާނޫނުގައި ބަޔާން ކުރާ މަގުސަދުތައް ހާސިލު ކުރެވިފައިވާ ނުވާ ކަމަށެވެ. އަދި ސަރުކާރަށް އިގުތިސޯދީ ލަފާ ދިނުމާއި މަނިޓަރީ ޕޮލިސީ ވެސް އޭގެ އެންމެ އެކަށޭނެ ގޮތުގައި ހިނގަމުންދާ ކަމަށް ގަބޫލު ނުކުރައްވާ ކަމަށް އޭނާ ވިދާޅުވެފައިވެ އެވެ.
