ރާއްޖޭގެ ފުރަތަމަ ނިއުރޯސާޖަން ޑރ ނިޔާފް އޭޑީކޭ ދޫކޮށް އައިޖީއެމްއެޗަށް
ރާއްޖޭގެ ފުރަތަމަ ނިޔުރޯސާޖަން ޑރ. އަލީ ނިޔާފް އޭޑީކޭ ހޮސްޕިޓަލުން ވަކިވެވަޑައިގެން އައިޖީއެމްއެޗްއަށް ބަދަލުވެވަޑައިގަތުމަށް ނިންމަވައިފި އެވެ.
އޭޑީކޭ ހޮސްޕިޓަލުގެ ރަސްމީ "އެކްސް" އިން މިއަދު ކުރި ޕޯސްޓެއްގައި ވަނީ ނިޔާފް އެ ހޮސްޕިޓަލަށް ކޮށްދެއްވި ހިދުމަތްތަކަށް ޝުކުރު އަދާކޮށްފަ އެވެ. ކެރިއަރުގައި އާ ސޮފުހާއެއް ފައްޓަވާއިރު އެ ހޮސްޕިޓަލަށް ކޮށްދެއްވި ހިދުމަތަށް ޝުކުރު އަދާކޮށް، އޭޑީކޭއިން ވަނީ ނިޔާފަށް ފާގަތި މުސްތަގުބަލަށް ވަނީ އެދިފަ އެވެ.
އެ ހޮސްޕިޓަލުގެ ނިޔުރޯ ސާޖަރީ ޑިޕާޓްމަންޓް ކުރިއަރުވަން ކުރި މަސައްކަތް ފާހަގަކޮށް އޭޑީކޭއިން ބުނެފައި ވަނީ އެ ޑިޕާޓްމަންޓަށް ނިޔާފަކީ އަބަދުވެސް އަގުހުރި ޑޮކްޓަރެއް ކަމަށެވެ. ނިޔާފް ވަނީ އޭޑީކޭގައި ނުވަ އަހަރާއި 10 މަސް ދުވަސް ހޭދަކުރައްވާފަ އެވެ.
އޭޑީކޭއިން ކުރި ޕޯސްޓަށް ކުރެއްވި ރިޕްލައިއެއްގައި އެ ހޮސްޕިޓަލުގެ ކުޑަކުދިންގެ ޑޮކްޓަރު އަދި ނިޔާފުގެ އެއްބަނޑު އެއްބަފާ ބޭބެ ޑރ. އަބްދުﷲ ނިޔާފް ވަނީ އައިޖީއެމްއެޗްގެ ނިޔުރޯސާޖަރީ ޑިޕާޓްމަންޓަށް ނިޔާފް އާއެކު ފާގަތިކަމާއި ކުރިއެރުން އަންނާނެ ކަމަށް އުންމީދު ކުރައްވާ ކަމަށް ވިދާޅުވެފަ އެވެ.
ނިޔާފް އައިޖީއެމްއެޗްގައި ބައްލަވަން ފައްޓަވާނެ ދުވަހެއް އެ ހޮސްޕިޓަލުން އަދި ހާމަކޮށްފައެއް ނުވެ އެވެ.
އެމެރިކާ، ރަޝިއާ، އިންޑިއާ، ބްރެޒިލްގެ އިތުރުން ނޭޕާލުން ނިޔާފް ވަނީ ތައުލީމާއި ތަމްރީން ހާސިލުކުރައްވާފަ އެވެ. އޭނާ ވަނީ 2،000 އަށް ވުރެ ގިނަ ނިޔުރޯސާޖަރީ އަދި ޕްރޮސީޖާތައް ހައްދަވައި ދާއިރާ އާ ގުޅުންހުރި އެކި ދާއިރާތަކުން ދިރާސާތައް ހައްދަވައި ނަތީޖާތައް ޝާއިއުކުރައްވާފަ އެވެ.
