އުލިގަމުގައި ޔޮޓް މެރީނާއެއް އަޅަން އެމްޕީއެލުން ކައުންސިލާއެކު ސޮއިކޮށްފި
ތިލަދުންމަތި އުތުރުބުރީ އުލިގަމުގައި މެރިޓައިމް ހިދުމަތްތައް ދިނުމުގެ ގޮތުން މޯލްޑިވްސް ޕޯޓްސް ލިމިޓެޑް (އެމްޕީއެލް) އާއި އުލިގަމު ކައުންސިލާ ދެމެދު ފަހުމުނާމާއެއްގައި ސޮއިކޮށްފި އެވެ.
އުލިގަމު ކައުންސިލުގައި މިއަދު ހެނދުނު ބޭއްވި ރަސްމިއްޔާތެއްގައި އެމްޕީއެލްގެ ފަރާތުން ފަހުމުނާމާގައި ސޮއިކުރެއްވީ އެ ކުންފުނީގެ ސީއީއޯ މުހައްމަދު ވަޖީހް އިބްރާހިމެވެ. އުލިގަމު ކައުންސިލުގެ ފަރާތުން ސޮއިކުރެއްވީ ކައުންސިލުގެ ރައީސް އަހްމަދު މުއާޒް މުހައްމަދެވެ.
މި އެއްބަސްވުމުގެ ދަށުން އެމްޕީއެލުން އުލިގަމުގައި ޔޮޓް މެރިނާއެއް ތަރައްގީކޮށް، ޔޮޓްތަކަށް ބޭނުންވާ ހިދުމަތްތައް އެ ރަށުން ފޯރުކޮށްދޭން ބޭނުންވާ ވަސީލަތްތައް ގާއިމުކުރާނެ އެވެ.
ވަޖީހް ވިދާޅުވެފައި ވަނީ އުލިގަމުގައި ޔޮޓް މެރީނާ ގާއިމުކުރުމުގެ އަމަލީ މަސައްކަތް މި އަހަރުގެ ތެރޭގައި ފަށާނެ ކަމަށެވެ. އެކަމުގެ ކޮންސެޕްޓް ހަދައި، އިންވެސްޓަރުންނާ މިހާރު މަޝްވަރާ ކުރެވެމުންދާ ކަމަށް ވަޖީހް ވިދާޅުވި އެވެ. އޭނާ ވިދާޅުވެފައި ވަނީ ހަ މަސް ދުވަހުގެ ތެރޭގައި އަމަލީ މަސައްކަތް ފުރިހަމަކޮށް، ހިދުމަތް ފޯރުކޮށްދޭން ފެށޭނެ ކަމަށެވެ.
އެމްޕީއެލްގެ ސީއީއޯ ވިދާޅުވި ގޮތުގައި ރާއްޖޭގައި މެރިޓައިމް ސެކްޓަ ފުޅާކުރުމަކީ ރައީސް ޑރ. މުހައްމަދު މުއިއްޒުގެ ވައުދުފުޅެއް ކަމުގަ އެވެ. އުލިގަމަކީ ޒަމާނުއްސުރެ، އާދަޔާ ހިލާފަށް ގިނަ ޔޮޓް ފަހަރު ޒިޔާރަތް ކުރާ ރަށެކެވެ. މި އުޅަނދު ފަހަރަށް ބޭނުންވާ ހިދުމަތްތައް އެ ރަށުން ފޯރުނުކޮށްދެވޭތީ ރައްޔިތުންނާއި ކައުންސިލުގެ ކަންބޮޑުވުން އޮތްކަން ވަޖީހް ފާހަގަކުރެއްވި އެވެ.
"އެހެންވެ އަޅުގަނޑުމެން މި ބެލީ ރައީސްގެ ވިސްނުންފުޅާ އެއްގޮތަށް ފުރަތަމަ ފަހަރަށް އުލިގަމުގައި ޔޮޓް މެރީނާއެއް ގާއިމުކުރަން. ކޮންސެޕްޓް ހަދާ ނިމި، އިންވެސްޓަރުންނާ ވާހަކަ ދައްކަމުން މި ދަނީ. މާލަސްތަކެއް ނުވެ، ގަބޫލުކުރެވެނީ މި އަހަރުގެ ތެރޭގައި (އަމަލީ) މަސައްކަތްތައް ފެށިގެންދާނެކަން. އޭރުން ހަ މަސް ދުވަހުގެ ތެރޭގައި މަސައްކަތް ނިންމާލެވޭނެ،" ވަޖީހް ވިދާޅުވި އެވެ.
އިހަވަންދިއްޕޮޅުގައި ފެށުމަށް ހަމަޖެހިފައިވާ އިންޓަނޭޝަނަލް ބަންކަރިން ސާވިސް އާއި މެރިޓައިމްގެ ހިދުމަތްތަކަށް ބޭނުންވާ އޮފީސްތައް ހެދުމުގެ މަސައްކަތް އެމްޕީއެލުން ހަލުވި ދުވެއްޔެއްގައި އަންނަނީ ކުރަމުންނެވެ. މި ހިދުމަތުން ވެސް އިތުރު ވަޒީފާގެ ފުރުސަތުތައް ހުޅުވިގެންދާނެ އެވެ.
ވަޖީހް ވިދާޅުވީ ޕޯޓް ފެސިލިޓީ ފެށުމަށް ކަސްޓަމްސް، އެމްއެންޑީއެފް، އިމިގްރޭޝަން އަދި ޕޯޓް ހެލްތަށް ބޭނުންވާ އޮފީސް ޖާގަ ފޯރުކޮށްދެނީ އެ ކުންފުނިން ކަމަށާއި މި މަހުގެ 10 ވަނަ ދުވަހަށް އެ އޮފީސް ޖާގައިގެ މަސައްކަތްތައް ނިމި، މުވައްޒަފުން ނެގުން ކުރިއަށް ގެންދާނެ ކަމަށެވެ.
މި ރަސްމިއްޔާތުގައި ވާހަކަ ދައްކަމުން މުއާޒް ވިދާޅުވެފައި ވަނީ ޔޮޓް މެރީނާއެއް އުލިގަމުގައި ތަރައްގީ ކުރުމަކީ އެ ރަށުގެ ރައްޔިތުން "ދުވަސްވީ ހުވަފެނެއް" ކަމަށެވެ.
"ވޭތުވެދިޔަ ސަރުކާރުތަކުން ސަރުކާރަކުން (ޔޮޓް މެރީނާއެއް ނެތިގެން) އަޅުގަނޑުމެން ފާޅުކުރި ކަންބޮޑުވުންތަކަށް އިޖާބައެއް ނުދެއްވާ. މި ރަށަށް މި ފުރުސަތު ފަހިކޮށްދެއްވިކަމަށްޓަކައި ރައީސް މުއިއްޒު އާއި އެމްޕީއެލްއަށް ޝުކުރު އަދާކުރަން،" މުއާޒް ވިދާޅުވި އެވެ.
ކައުންސިލުގެ ރައީސް ވިދާޅުވި ގޮތުގައި އުލިގަމަށް ރާއްޖޭން ބޭރުގެ އުޅަނދުފަހަރު ނާންނަ ދުވަސްވަރެއް ހަނދާން ނުހުންނަ ކަމުގަ އެވެ. ޔޮޓް ފަހަރަށް ހިދުމަތް ދެވޭނެ ގޮތެއް ހޯދުމަށް ވޭތުވެދިޔަ ސަރުކާރުތަކާ ވާހަކަ ދައްކައިގެން މަސައްކަތް ކުރެވުނު ނަމަވެސް އެކަމުގައި އެދެވޭ ކުރިއެރުމެއް ނުލިބުނުކަން އޭނާގެ ވާހަކައިގައި ވަނީ ފާހަގަކުރައްވާފަ އެވެ.
