ޑްރަގް އޮޕަރޭޝަނެއް ހިންގާތީ ދެ ފުލުހެއްގެ ސައިކަލަށް ގެއްލުންދީ ރޯކޮށްލައިފި
މަސްތުވާތަކެތީގެ އޮޕަރޭޝަނެއް ހިންގާތީ ނ. ހެނބަދޫގައި ދެ ފުލުހެއްގެ ސައިކަލަށް ގެއްލުންދީ ރޯކޮށްލައިފި އެވެ.
ދިވެހި ފުލުހުންގެ ހިދުމަތުގެ ތަރުޖަމާނު އަހުމަދު ޝިފާން މިއަދު "އެކްސް" ގައި ކުރެއްވި ޕޯސްޓެއްގައި ވިދާޅުވީ ހެނބަދޫގައި އިއްޔެ ފުލުހެއްގެ ސައިކަލަކަށް ގެއްލުންދީފައިވާ ކަމަށެވެ. އަދި އިތުރު ފުލުހެއްގެ ސައިކަލުގައި ރޭ ދަންވަރު ވަނީ ރޯކޮށްލާފައި ކަމަށް ޝިފާން ވިދާޅުވި އެވެ.
"މިފަދަ ފިނޑި އަމަލެއްގެ ސަބަބުން ފުލުހުންގެ ހިތްވަރާއި ސާބިތު ކަމަށް ކުޑަވެސް ބަދަލެއް ނާންނާނެކަން މިފަދަ ވިސްނުމުގައި އަމަލު ކުރަމުންދާ ފަރާތްތަކަށް ހަނދާންކޮށްދެން،" ފުލުހުންގެ ތަރުޖަމާނު ވިދާޅުވި އެވެ.
ޝިފާން ވިދާޅުވި ގޮތުގައި މިކަމަކީ ނޫނު އަތޮޅުގައި ފުލުހުން ހިންގަމުން އަންނަ މަސްތުވާތަކެތީގެ އޮޕަރޭޝަނަކާ ދެކޮޅަށް އެކަމުގައި ތުހުމަތު ކުރެވޭ ބަޔަކު ކޮށްފައިވާ ކަމެއް ކަމަށް ތުހުމަތު ކުރެވޭ ކަމުގަ އެވެ.
ރާއްޖޭގެ އެކި ސަރަހައްދުތަކުގައި މަސްތުވާތަކެއްޗާ ދެކޮޅަށް އޮޕަރޭޝަންތައް ހިންގަމުން އަންނައިރު، ހޯމްލޭންޑް ސެކިއުރިޓީ މިނިސްޓަރު އަލީ އިހުސާން މީގެކުރިން ވިދާޅުވެފައި ވަނީ ރާއްޖެއަށް މަސްތުވާތަކެތި އެތެރެކުރާ މީހުންގެ ނެޓްވޯކުތައް ދެނެގަނެވިފައިވާ ކަމަށާއި އެކަމާ ގުޅުންހުރި ގާނޫނުތަކަށް އިސްލާހު ގެނެސްގެން އެ މީހުން އަތުލައިގަނެވޭނެ ކަމަށެވެ.
ޕްރޮސެކިއުޓާ ޖެނެރަލް އޮފީހުން އާންމުކޮށްފައިވާ ތަފާސް ހިސާބުތައް ދައްކާ ގޮތުން މިދިޔަ ޖޫން މަހު އެންމެ ގިނައިން ދައުވާކުރީ މަސްތުވާތަކެތީގެ މައްސަލަތަކުގަ އެވެ. އެފަދަ 79 މައްސަލައެއްގައި އެ މަހު ވަނީ ދައުވާކޮށްފަ އެވެ.
މިފަދަ އަމަލުތައް ހިންގާ ފުލުހުން މަދެއް ނޫން. މީގެ 5 އަހަރު ކުރިން އަހަރެންގެ ރައްޓެއްސެއްގެ އަގުބޮޑު ސައިކަލެއް ވަގަށް ނަގައި ރޯކޮއްލީ ޕޮލިހެއް. ޢެއީ އޭނާގެ ކުރީގެ އަނބިމީހާއާއި ރައްޓެހިވެގެން އުޅޭތީ. ވަގަށް ނެގި އިރު ސީސިޓީވީ އަށް އަޜާފައި ހުރި ވީޑިއޯ ވެސް ޕޮލިހުންނަށް ހުށައެޅިން. މައްސަލަ ހުށައެޅުމުން މަރަން އިންޒާރުދީ ހެދުމުން މައްސަލަ އަނބުރާ ނަގަން ޖެހުނީ. ޢެއީ އޭރުގެ ހޯމް މިނިސްޓަރުގެ ބޮޑީ ގާރޑެއް.