ބެސްޓް ފްރެންޑަކީ އިދިކޮޅު ޖިންސުގެ ކުއްޖެއްތަ؟ ތި ދެމެދަށް އިޝްގީ ލޯބި ވަންނަން މާ ގިނަ ދުވަހެއް ނެތް
އެންމެ ގާތް ރަހުމަތްތެރިޔާ އަކީ އިދިކޮޅު ޖިންސުގެ ކުއްޖެއް ހެއްޔެވެ؟ އެހެން ކަމުގައި ވަނީ ނަމަ ތި ދެމެދަށް އިޝްގީ ލޯބި ވަންނަން މާ ގިނަ ދުވަހެއް ނެތެވެ. މިހެން ބުނަން މިޖެހެނީ އެންމެ ސަބަބަކާހުރެ އެއް ނޫނެވެ. މިހެން ބުނަން ޖެހޭ ސަބަބުތައް ބައިވަރެވެ. ގުނާ އަދަދު ނުކުރެވޭހާ ވެސް ބައިވަރެވެ.
ބައެއް މީހުންނާ ސުވާލު ކޮށްލީމެވެ. އަންހެނަކާއި ފިރިހެނަކަށް "ބެސްޓް ފްރެންޑްސް" ގެ ގޮތުގައި ތިބެވޭނެތޯއެވެ. ގިނަ ފަރާތްތަކުން ޖަވާބުގައި ބުނީ ނުތިބެވޭނެ ކަމަށެވެ. ސަބަބަކީ އެ ދެމީހުންގެ ދޭތެރެއަށް "އިޝްގީ ލޯބި" ވަންނާނީ ކޮންއިރަކު ކަމެއް އެދެމީހުންނަށް ވެސް ނޭނގޭނޭތީ ކަމަށް އެކަކު ބުންޏެވެ.
ނިކަން ވިސްނާލަބަލާށެވެ. އެންމެ ގާތް ދެ ރަހުމަތްތެރިންނަކީ އަބަދުވެސް ހުރިހާ ކަމެއް ހިއްސާ ކުރާ ދެމީހުންނެވެ. ދެމީހުންގެ އުފަލާއި ހިތާމަތައް އެކަކު އަނެކަކާ ހިއްސާ ކުރާނެކަން ޔަގީނެވެ. އެކަަކަށް ދަތި އުނދަގޫ ހާލަތެއް ދިމާވުމުން އަނެކާ އެހީވާނެ ކަން ގައިމެވެ. އަނެކާ ރޯން ބޭނުންވެއްޖެ ނަމަ ބޯއަޅާލުމަށް ތިބާގެ ކޮނޑު ހުސްކޮށްލުމަށް ފަސް ނުޖެހޭނެ ކަން ޔަގީނެވެ. އެކަކު އަނެކަކަށް ވަރަށް ބޮޑަށް އަޅާލާނެއެވެ. އަމުދުން ބައިވެރިޔާ ވަކިވުމުން ވެސް ގާތުގައި ހުންނަނީ ބެސްޓް ފުރެންޑެވެ. އިދިކޮޅު ޖިންސުގެ ވިޔަސް މެއެވެ.
ދެން ވާގޮތަކީ ހެއްޔެވެ؟ އެކަކު އަނެކަކަށް މާބޮޑަށް ހަމްދަރުދީވެ މާބޮޑަށް އަޅާލާން ފެށުމުން ކޮންމެވެސް އެކަކަށް ނަމަވެސް އަނެކާ އާއި ދޭތެރޭ ވިސްނެން ފަށައެވެ. އަނެކާއާއި މެދު ދެކޭ ގޮތް ބަދަލުވާން ފަށައެވެ. އަނެކާއާއި ދޭތެރޭ ހިތުގައި އޮންނަ ރަހުމަތްތެރިކަމުގެ ލޯބި މަޑުމަޑުން ބަދަލުވާން ފަށަނީ އަޅުގަނޑުމެން މިކިޔާ "އިޝްގީ" ލޯތްބަށެެވެ. އިޝްގީ ލޯތްބަކީ އެއެއްޗެއްގެ އަވައިގައި ޖެހި އިންސާނާ މުޅިން އާވާރާ ކޮށްލާ އެއްޗެއް ކަމުގައި މޮޅެތި ލިޔުންތެރިންނާއި މޮޅެތި ޝާއިރުންވެސް ލިޔުއްވާފައިވެއެވެ.
މިނޫނަސް ދެމީހުންގެ ދޭތެރެއަށް އިޝްގީ ލޯބި ވަންނާނެ ސަބަބުތައް އެބަހުއްޓެެވެ. ނިކަން ވިސްނާލާށެވެ. ދެޖިންސުގެ ދެމީހަކު މާގިނައިން އެކުގައި އުޅޭނަމަ އެދެމީހުން އަޅުވާ ކިޔުން ގިނަވާނެއެވެ. އެ ދެމީހުންގެ ގާތުގައި ތިޔަ އުޅެނީ ލޯބީގެ ގޮތުން ގުޅިގެންތޯ ސުވާލު ކުރާ ފަހަރު ވެސް އަންނާނެއެވެ. ދެމީހުން އެކުގައި ކޮފީތަކަށް އަރައި އެކުގައި ވަގުތުތައް ހޭދަކުރަން ފެށުމުން ދެމީހުންގެ ރައްޓެހިންވެސް އެކަމާ ދިމާކުރަން ފަށައެވެ.
މީހުން ތިބާއާއި އަނެކާއާއި އަޅުވާ ކިޔަން ފެށުމުން ވާގޮތް އެނގޭ ހެއްޔެވެ؟ ނޭނގި ނަމަވެސް ތިބާއަށް އަނެކާއާއި މެދު ވިސްނެން ފަށާނެއެެވެ. ނަތީޖާއަކަށް ވަނީ ނޭނގުމެއްގެ ތެރޭގައި ދުވަހަކުވެސް ލޯބި ނުވާން ނިންމައިގެން ހުރި "ބެސްޓްފުރެންޑް" ދެކެ އިޝްގީ ލޯބި ވެވެން ފެށުމެވެ. މިހެން ދެންނެވުމުން ގަބޫލު ނުކުރެއްވިޔަސް މިއީ އަޅުގަނޑުގެ އަމިއްލަ ޚިޔާލުން ދަންނަވާ ވާހަކަ އެއް ނޫނެވެ. މިއީ މޮޅެތި ދިރާސާތައް ކުރާ ލޯބީގެ މާހިރުންވެސް ދައްކާފައި ހުރި ވާހަކަ ތަކެކެވެ.
ތިބާގެ އެންމެ ގާތް އެކުވެރިޔާ އަކީ އިދިކޮޅު ޖިންސުގެ ކުއްޖެއް ނަމަ މިއީވެސް ވިސްނާލަން ޖެހޭ ކަމެކެވެ. އަނެކާގެ ހިތަށް އަރައި ފައިބާ އެކައްޗެއްވެސް އަޅުގަނޑުމެން އެކަކަށްވެސް ނޭނގެއެވެ. އަނެކާގެ ހިތުގައި ތިބާއާއި ދޭތެރޭ އޮތީ ކޯއްޗެއްކަން ޚުދު ތިބާއަށް ވެސް ނޭނގޭނެއެވެ. ސިއްރުން ތިބާ ދެކެ ތިބާގެ އެންމެ ގާތް އެކުވެރިޔާ "އިޝްގީ ލޯބި" ވަނީ ކަމުގައި ވެސް ވެދާނެ ނޫން ހެއްޔެވެ. ރައްޓެހި ރަހުމަތްތެރިކަން ގެއްލެން ބޭނުން ނުވާތީ ބުނަން ނުކެރިފައި ހުރީ ކަމުގައި ވެސް ވެދާނެ ނޫން ހެއްޔެވެ.
އަދި އެހެން ސަބަބެއް ވެސް އެބައޮތެވެ.ތިބާގެ އެންމެ ގާތް ރަހުމަތްތެރިޔާ އަކީ އިދިކޮޅު ޖިންސުގެ ކުއްޖަކަށް ވެފައި އޭނާ އެހެން މީހަކާ އެކު ވަގުތު ހޭދަކުރަން ފަށައިފިނަމަ ތިބާ "ހަސަދަވެރި" ނުވޭޭ ހެއްޔެވެ. މިއަދު އަޅުގަނޑުމެން ކިޔާގޮތުން ނަމަ "ޖެލަސް" ނުވޭ ހެއްޔެވެ. ރަހުމަތްތެރިޔާ ލޯބީގެ ގޮތުން މީހަކާ ގުޅި އެމީހަކާ އެކު ގިނަ ވަގުތުތަކެއް ހޭދަކުރަން ފެށުމުން ހިތަށް އަސަރެއް ނުކުރޭ ހެއްޔެވެ. ބުނަން ބޭނުން ނުވި ކަމުގައި ވިޔަސް އަދި އެއްބަސް ވާން ބޭނުން ނުވިކަމުގައި ވިޔަސް ހަމަ ގިނަ ފަހަރަށް ކަންތައްވެފައި އޮންނަނީ މިހެންނެވެ. ނަތީޖާއަކަށް ވަނީ ތިބާއަށް އޭނާއާއި ދޭތެރޭ މާބޮޑަށް ވިސްނި ތިބާއަށް އޭނާދެކެ "އިޝްގީ ލޯބި" ވެވެން ފެށުމެވެ.
ދެޖިންސުގެ ދެމީހުންނަށް "ބެސްޓް ފްރެންޑްސް" ގެ ގޮތުގައި ނުތިބެވޭނެ އެކޭ ނުބުނަމެވެ. ނަމަވެސް ދެޖިންސުގެ ދެމީހުންނަށް "ބެސްޓް ފްރެންޑްސް" ގޮތުގައި ތިބެވޭނީ އެ ދެމީހުންނަކީ ވަރަށް "އަންޑަސްޓޭންޑިން" ދެމީހުންނަށް ވެގެން ކަމުގައި ގިނަ ބަޔަކު ގަބޫލު ކުރެއެވެ.
އެކި މީހުން ގަބޫލު ކުރާ ގޮތް ތަފާތުކަން އެނގެއެވެ. ނަމަވެސް ގަބޫލު ކުރެއްވިޔަސް ނުކުރެއްވިޔަސް މިއީ ބަދަލުވުމެއް ނެތް ހަގީގަތެވެ. ބެސްޓް ފުރެންޑަކީ ތިބާގެ ހުރިހާ ކަމެއް އެނގޭ މީހާ އެވެ. ތިބާގެ "ބެސްޓް ފްރެންޑް" އަކީ އިދިކޮޅު ޖިންސުގެ ކުއްޖެއް ނަަމަ ތި ދެމެދަށް "އިޝްގީ ލޯބި" ވަންނާކަށް މާ ގިނަ ދުވަހެއް ނެތެވެ.
އަަހަރެންގެކުރީގެ ބެސްޓްފުރެންޑަކީ އަންހިންކުއްޖެއް.. ސްކޫލް ދައުރުން ފެށިގެން.. ދެމީހުންގެ ވާހަކަތައް ހިއްސާކޮށް އުޅުނީ.. އެކަމް އޭރުގަ އެހެން ބިޓުންނަގާގެން އުޅުނީ… މިހެން އުޅެނިކޮށް ބިޓްކަޓާފި.. ދެން ހުރިހާ ވަގުތަކު ހިތްވަރުދީ ހިތްހަމަ ޖައްސާދޭން އަންނީ ބެސްޓްފްރެންޑް…. ދެން މަށަށް އޭނަގެ ދެލެ ލޯބިވެވިއްޖެ ފުރެންޑްކަން ޙަތިމްކޮއްފާނެތީ އަހާކަށްނުކެރުނު.. އޮފީސް ކުދިން ބުނަނީ ފަހުން ދެރަވާނެއޭ މިހާރު ބުނެގެން ފްރެންޑް ކަން ކެނޑުނަސް ބުނާށޭ.. އެހެން ލަދުންހުއްޓާ އޭނަ އެހެންކުއްޖަކާ ރައްޓެހިވެއްޖެ.. ދެން މަ ކަޑަވެގެން މަޑުމަޑުން ދުރަށްދިޔައީ.. އޭނަ ބުނޭ ކިހިނެއްވެގެންހޭ ތިހާ ބޮޑަށް ބަދަލްވީ.. އެކަމް ބުނާކަށް ނުކެރޭނެދޯ އެހެންވެގެން ކަޑަވެގެންނެކޭ..
ތީ ވަރަށް ބޮޑު ދޮގެއް. 17 އަހަރު މި ވަނީ. ފިރިހެން ކުއްޖާ އުޅެނީ އެހެން ކުއްޖަކާއި ރައްޓެހި ވެގެން އުފަލު. އަހަރެން ވެސް މިއުޅެނީ އުފަލު
ތިބުނަނީ ބެސްޓް ފްރެންޑަކީ އަންހެނަކަށް ވާ ކޮންމެ ފަހަރަކު އޭނަޔާ ހިތާވާށޭތަ. ބޯހަލާކު. ލިޔާނެ ނުލިޔާ އެއްޗެއް ނޭނގިގެންތަ ތިއުޅެނީ.
އެހެނެއްނޫން ދޯ އެބުނަނީކީ.. އޭގައޮބެއް ވ އަންޑަސްޓޭންްޑިން މީހުންނައް އުޅެވިދާނޭ… ހުރިހާކޮޅަކައްވެސް ވިސްނަބަލަ ދޯ… ދުނިޔޭގައި އުޅޭއިރު އެކިމީހުންނައް އެކި ތަޖުރިބާކުރެވޭނީ.. އާޓިލްގަ އޮތީކީ މުޅިއަކުން ދޮގެއްނޫން.. ކިއުންތެރިން މާ ހަނީ ވިސްނުން… މީ ވ ވާހަކަ
1988 ފެށިގެން އަދި ޢަދަށް ވެސް ބެސްޓްފްރެންޑް. ޢަޙަރެން މީހަކާ އިނދެގެން 16 އަހަރު، ބެސްޓްފްރެންޑް މީހަކާ އިނދެގެން 14 އަހަރު. އެހެންވީމަ މީ ހަމަޖެހޭ އާރޓިކަލްއެއް ނޫން.