ބިދޭސީން ގެއްލުނު ހުރިހާ ކުންފުނިތައް ތަހުގީގު ކުރަނީ

ބިދޭސީން ގެއްލިފައިވާކަމަށް ރިޕޯޓުކޮށްފައިވާ ހުރިހާ ކުންފުނިތައް ތަހުގީގު ކުރަން ހޯމް މިނިސްޓްރީން ނިންމައިފި އެވެ.
ދާހިލީ ވުޒާރާ އާއި ސިއްހީ ވުޒާރާ އަދި އިގްތިސޯދީ ވުޒާރާ ގުޅިގެން މިއަދު ބޭއްވި ނޫސްވެރިންގެ ބައްދަލުވުމެއްގައި ދާހިލީ ވަޒީރު އަލީ އިހުސާން ވިދާޅުވީ ބިދޭސީންގެ މައްސަލައިގައި ހެދި ޓާސްކްފޯސްއިން ހަދާ ދިރާސާތަކުން ބިދޭސީން ރާއްޖެ ގެނެސް މަސައްކަތް ކުރުވާފައި، ސަރުކާރަށް ފީ ނުދައްކައި ގެއްލިއްޖެ ކަމަށް ބުނެ ރިޕޯޓު ކުރުން އިތުރުވެފައިވާ ކަމަށެވެ.
އިހުސާން ވިދާޅުވީ ސިސްޓަމް ތެރެއިން އެއީ ކޮން ބައެއްތޯ ބެލުމުގެ މަސައްކަތްކޮށް، ފާހަގަވާ ކުންފުނިތަކަށް މި މަހުގެ 30 ގެ ނިޔަލަށް ސިސްޓަމުން ހިދުމަތް ނުދީ ހިފަހައްޓާފައިވާ ކަމަށެވެ. އެ ހުރިހާ ކުންފުނިތަކާމެދު ތަހުގީގު ހިންގުމަށް ފުލުހުންނާ ހަވާލު ކުރާނެ ކަމަށް ވަޒީރު ވިދާޅުވި އެވެ.
"ގަވާއިދާ ހިލާފަށް ހުއްދަ ނެތި ވިޔަފާރިއެއް ކުރުން ނުވަތަ ގަވާއިދާ ހިލާފަށް ވިޔަފާރި ކުރުން، މީގެ ތެރެއިން މިނިސްޓްރީން އަޅަން ޖެހޭ ފިޔަވަޅުތައް ވެސް ޓާސްކް ފޯސް ތެރެއިން އައިޑެންޓިފައި ކުރެވި އަވަސް ގޮތުގައި އެޅިގެންދާނެ،"މީގެ އިތުރުން ގަވާއިދާއި ހިލާފަށް ބިދޭސީން ލައްވައި މަސައްކަތް ކުރުވާ ފަރާތްތައް ފާހަގަ ކުރެވޭނަމަ އެފަރާތްތަކާއިމެދުވެސް ފިޔަވަޅު އަޅަން ފަށާނެ ކަަމުގެ ޔަގީންކަން ޓާސްކް ފޯސްއިން ވަނީ ދީފަ އެވެ. ބިދޭސީންގެ މައްސަލަ ހައްލު ކުރުމަށް އެކުލަވައިލި ޓާސްކުފޯސްގައި ހިމެނެނީ މިއަދު ނޫސްވެރިންގެ ބައްދަލުވުމުގައި ބައިވެރިވި ތިން ވުޒާރާ އާއި އެ ވުޒާރާތަކުގެ ދަށުން ހިންގާ ކަމާއި ބެހޭ އިދާރާތަކެވެ.






ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.