ލާމަރުކަޒީ ނިޒާމު ނައްތާލަނީ ކަމަށް ބުނެ އެމްޑީޕީއާއި ޑިމޮކްރެޓްސް މިއަދު ބަޔާން ނެރެފި

އާބަން ޑިވެލޮޕްމަންޓް ބިލް އޮތީ ލޯކަލް ކައުންސިލްތަކުގެ ބާރު ކުޑަވާނެ ގޮތަށް ކަމަށް ބުނެ ކަންބޮޑުވުން ފާޅުކޮށް، އިދިކޮޅު އެމްޑީޕީއާއި ޑިމޮކްރެޓްސްއިން ބަޔާނެއް ނެރެފި އެވެ.

Ads by STELCO

އެމްޑީޕީން ވަކިވެގެން މިދިޔަ އަހަރު އެ ޕާޓީގެ ލީޑަރުންތަކެއް އުފެއްދި ޑިމޮކްރެޓްސްއިން މިއަދު ހަވީރު ނެރުނު ބަޔާނުގައި ބުނެފައިވަނީ ބިލު މިހާރު އޮތް ގޮތުން އާބަން ސެންޓަރުތަކުގެ ގޮތުގައި ކަނޑައެޅޭ ސަރަހައްދުތަކުގައި ލާމަރުކަޒީ ނިޒާމު ހިންގުމުގެ ހަމަ ނެތިގެން ގޮސްދާނެ ކަމަށެވެ.

ރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމަކީ ރާއްޖޭގެ ގާނޫނު އަސާސީގައި ވަކި ބާބެއް ހާއްސަކޮށް، ގާނޫނު އަސާސީން ތަސައްވުރުކޮށްފައިވާ ހަމައެއް ކަން ވެސް އެ ބަޔާނުގައި ފާހަގަ ކޮށްފައިވެ އެވެ.

"ވަކިން ހާއްސަކޮށް މި ބިލުގެ 10 ވަނަ މާއްދާ އޮތީ ލާމަރުކަޒީ ނިޒާމު ނެގެހެއްޓުމާއި ހަރުދަނާ ކުރެއްވުމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒު ދެއްވާފައިވާ އަދި ތަކުރާރުކޮށް ދެއްވަމުން ގެންދަވާ ޑިމޮކްރެޓިކް ކޮމިޓްމަންޓާ ދިމާ އިދިކޮޅަށް އެ ކޮމިޓްމަންޓަށް ރިއާޔަތް ކުރުމެ ނެތި ކަން މި ޕާޓީން ދެކެމެވެ." ޑިމޮކްރެޓްސްގެ ބަޔާނުގައިވެ އެވެ.

ލޯކަލް ކައުންސިލްތަކުގެ ބާރު ގެއްލޭ ގޮތަށް އާބަން ޑިވެލޮޕްމަންޓް ބިލުގައި ހުރި ކަންކަމާ ގުޅޭ ގޮތުން ލޯކަލް ކައުންސިލްތައް ވެސް ހިމެނޭހެން އާންމުކޮށް ފުޅާ ދާއިރާއެއްގައި މަޝްވަރާ ކުރުމަށް ފަހު އަދި އެ ކަންކަން ބަދަލު ކުރުމަށް ފަހު ނޫނީ ބިލު ފާސްނުކުރުމަށް އެ ޕާޓީން ގޮވާލާފައިވެ އެވެ.

އިދިކޮޅު މައި ޕާޓީގެ ގޮތުގައި އޮތް އެމްޑީޕީން މިރޭ ނެރުނު ބަޔާނުގައި ފުރަތަމަ ފާހަގަކޮށްފައިވަނީ އެ ޕާޓީގެ ބާރުވެރިކަން އޮތް ދެ ސަރުކާރުގައާއި މިދިޔަ ރައްޔިތުންގެ މަޖިލީހުގައި ލާމަރުކަޒީ ނިޒާމު ފުރިހަމަކޮށް ކައުންސިލްތައް ބާރުވެރިކުރުމަށް ކޮށްފައިވާ މަސައްކަތްތަކެވެ.

މިދިޔަ ބުރާސްފަތި ދުވަހު ސަރުކާރު ހިންގާ ޕީއެންސީގެ ސުޕަ މެޖޯރިޓީ އޮތް މަޖިލީހުން ފާސްކުރި ބިނާވެށި ޕްލޭން ކުރުމުގެ ބިލު ވެސް އޮތީ ލާމަރުކަޒީ ނިޒާމު ނައްތާލައި ގޮތަށް ކަމަށް އެމްޑީޕީގެ ބަޔާނުގައި ބުނެފައިވެ އެވެ.

"މި ވަގުތު ކޮމިޓީ މަރުހަލާގައި އޮތް އާބަން ޑިވޮލޮޕްމަންޓް ބިލް ސަރުކާރުން މިހާރު ހުށަހަޅަފައިވާ ގޮތަށް ފާސްކުރެއްވިއްޖެނަމަ ލާމަރުކަޒީ އުސޫލުން ރާއްޖެ ހިންގުމަށް ގާނޫނު އަސާސީއާއި ގާނޫނުތަކުގައި ކަނޑައެޅި މުހިއްމު އަސާސްތައް މުގުރިގެން ދިއުމުގެ ފުރުސަތު ބޮޑެވެ." އެމްޑީޕީގެ ބަޔާނުގައިވެ އެވެ.

އެ ބިލާ ގުޅޭ ގޮތުން ލޯކަލް ކައުންސިލްތަކާއި، ލާމަރުކަޒީ ނިޒާމު ދެމެހެއްޓުމަށް އަދި ޑިމޮކްރެސީ ދެމެހެއްޓުމަށް ވަކާލާތު ކުރާ މަދަނީ ޖަމިއްޔާ ޖަމާއަތްތަކާއި، ސިޔާސީ ޕާޓީތަކާ އެކު ހުޅުވާލެވިފައިވާ ބިނާކުރަނިވި މަޝްވަރާއަކަށް ދިއުމަށް އެމްޑީޕީން ވެސް ގޮވާލާފައިވެ އެވެ. އަދި އެ މަޝްވަރާއަކާ އެކު މެނުވީ ބިލުތައް ފާސްނުކުރުމަށް ވެސް ގޮވާލާފައިވެ އެވެ.

އާބަން ޑިވެލޮޕްމަންޓްގެ ބިލް އޮތީ ކައުންސިލްތަކުގެ ދައުރު ހަނިވާ ގޮތަށް ކަމަށް ލޯކަލް ގަވަނަސް މިނިސްޓަރު އާދަމް ޝަރީފް ވެސް ވަނީ ބިލް ދިރާސާކުރާ ކޮމިޓީގައި ވިދާޅުވެފަ އެވެ. އަދި ވިދާޅުވީ އެ ބިލު އެކުލަވާލީ އެ މިނިސްޓްރީއާ މަޝްވަރާނުކޮށް ކަމަށެވެ.