ތިލަފުށި ހިއްކާފައިވާ ސަރަހައްދު ކައިރީ ހުރި އުޅަނދުތައް ނަގަން އެދިއްޖެ
ކ. ތިލަފުށި ހިއްކާފައިވާ ސަރަހައްދު ކައިރީ ހުރި އުޅަނދުތައް ނެގުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން އެދިއްޖެ އެވެ.
އެޗްޑީސީން މިއަދު ބުނީ ތިލަފުށި ތަރައްގީ ކުރުމަށް ބޭނުންވާ ބިން ހިއްކުމުގެ މަސައްކަތް ނިމި، ހިއްކާފައިވާ ބިމާ ކައިރިން ފަޅު ތެރޭގައި އަޅާފައިވާ އުޅަނދުތައް ނެގުމަށް އެ ކޯޕަރޭޝަނުން ބޭނުންވަނީ ބިމުގެ ސްލޯޕިން މަސައްކަތް ކުރިއަށް ގެންދިއުމަށް ކަމަށެވެ.
އެހެންވެ މިއަދުން ފެށިގެން ރަސްމީ ހަތް ދުވަހުގެ ތެރޭގައި އެ އުޅަނދުތައް ނެގުމަށް އެޗްޑީސީން އެދުނެވެ. އެ މުއްދަތަށް ފަހު އެ ސަރަހައްދުން ނުނަގާ އުޅަނދުތައް، އެ ކޯޕަރޭޝަނުގެ ތަކެތި ނެގުމުގެ އުސޫލުގެ ދަށުން އަމަލު ކުރާނެ ކަމަށް ބުނެފައިވެ އެވެ.
އިތުރު މައުލޫމާތެއް ބޭނުންވާނަމަ އެ ކޯޕަރޭޝަންގެ ހޮޓްލައިން ނަންބަރު 1516 އަށް ގުޅުމަށް އެދިފައިވެ އެވެ.
ތިލަފުށި ބިން އިތުރަށް ބޮޑުކޮށް ތަރައްގީ ކުރުމަކީ ވިޔަފާރިވެރިންނަށް ފުރުސަތުތައް ފަހިކޮށްދިނުމަށް ހިންގާ މަޝްރޫއަކަށް ވާތީ ހުރިހާ ފަރާތެއްގެ އެއްބާރުލުން ދިނުމަށް އެ ކޯޕަރޭޝަނުން އެދިފައިވެ އެވެ.
