އަންހެނަކު ރަހީނުކުރި މައްސަލައެއް ފެންމަތިވެގެން ފުލުހުން ހަރަކާތްތެރިވަނީ

މާލޭގެ ގެއެއްގައި އަންހެނަކު ރަހީނުކުރި މައްސަލައެއް ފެންމަތިވެގެން ފުލުހުން ހަރަކާތްތެރިވާން ފަށައިފި އެވެ.

ދިވެހި ފުލުހުންގެ ހިދުމަތުން ފޮނުވި މެސެޖުގައިވާ ގޮތުން އެއީ މާލޭގެ މާފަންނު ގެއެއްގައި އަންހެނަކު ބަންދުކޮށްގެން ގެންގުޅޭ ކަމަށް ތުހުމަތު ކުރެވޭ މައްސަލައެކެވެ.

އެ މައްސަލާގައި ފުލުހުން ހަރަކާތްތެރިވަމުންދާ ކަމަށް ބުނިިއިރު އަދި އިތުރު ތަފްސީލެއް ނުދެ އެވެ.

މަންޒަރު ދުށް މީހަކު ބުނި ގޮތުގައި މާފަންނު އޭއެމްޑީސީ ކައިރީ އަންހެނަކު ކަރުގައި ވަޅި ޖައްސާފައި ރަހީނުކުރަން އުޅުނީ ފިރިހެނެކެވެ. މި ކަން ހިނގި އިރު ވެސް އެ ސަރަހައްދުގައި ފުލުހުން ތިބި ކަމަށް ވެސް މަންޒަރު ދުށް މީހާ ބުންޏެވެ.