ގައުމާ އެއްކޮޅު ކަންކަމާއި ދެކޮޅު ކަންކަން ރައްޔިތުންނަށް އޮޅުން ފިލުވައިދޭން ޖެހޭ: ރައީސް

ގައުމެއްގެ އަމިއްލަވަންތަ ކަމަށް ލޯބި ނުކުރެވޭނަމަ ގައުމީވަންތަ ކަމަށް ލޯބިނުކުރެވޭނެ ކަމަށާއި، ގައުމާ އެއްކޮޅު ކަންކަމާއި ދެކޮޅު ކަންކަން ރައްޔިތުންނަށް އޮޅުން ފިލުވައިދޭން ޖެހޭ ކަމަށް ރައީސް ޑރ މުހައްމަދު މުއިއްޒު މިއަދު ވިދާޅުވެއްޖެ އެވެ.

Ads by Sosun Fihaara

ދަރުބާރުގޭ ރަންނަބަނޑޭރި މާލަމުގައި ބޭއްވި ގައުމީ ދުވަހުގެ ރަސްމީ ޖަލްސާގައި ގައުމިއްޔަތު ނުވަތަ 'ނޭޝަނަލް އައިޑެންޓްޓިޓީ' އަކީ ކޮބައިތޯ ސުވާލު ކުރައްވައި ރައީސް މުއިއްޒު ވިދާޅުވީ ބައެއް ބާވަތްތަކުގެ ގައުމިއްޔަތަކީ ދިވެހިންގެ ގައުމިއްޔަތާ ފުށުއަރާ ކަންކަން ކަމަށެވެ.

އަދި ދުނިޔޭގެ ބައެއް ގައުމުތަކުގައި އޮންނަ ގައުމިއްޔަތު އިސްލާމްދީނާވެސް ފުށުއަރާ ކަމަށް ރައީސް ވިދާޅުވި އެވެ.

އެމަނިކުފާނު ވިދާޅުވި ގޮތުގައި ދިވެހިންގެ ގައުމިއްޔަތަކީ ދިވެހިންގެ ވިސްނުމުގައި އޮންނަ އެއްބައެއްވަންތަކަން އަދި ދިވެހިންގެ ދެމިތިބުމުގެ ފިކުރެވެ. ގައުމިއްޔަވަންތަ ކަމުގެ މަފްހޫމް ތަފްސީލު ކޮށްދެއްވަމުން ރައީސް ވިދާޅުވީ އެއީ ދުނިޔޭގެ ހުރިހާ ގައުމެއްގައިވެސް ހިމެނޭ ލާޒިމު ދެ އަސާސް ކަމަށެެވެ.

ސަބަބަކީ ދަތިތަކާއި، ފަސޭހަތަކާއި އަދި ބިރުވެރިކަމާއި، އަމާން ކަމުގައި އެއްބައެއް ގޮތުގައި ދެމިތިބުމަކީ ގައުމެއްގެ ތޮބިއްޔާ ކަމަށް ވިދާޅުވި އެވެ.

އެއީ ރާއްޖެނަމަ ދިވެހިންގެ ކާބަފައިވަންތަކަމާއި ދިވެހި ބަހާއި އިސްލާމްދީނާ އާދާކަދާ އާއި ދިވެހި ތަރިކައިގެ އިތުރުން ދިވެހި ސަގާފަތް ކަމަށް ރައީސް މުއިއްޒު ވިދާޅުވި އެވެ.

އެއަށް ފަހު އެމަނިކުފާނު ވިދާޅުވީ ދިވެހި އެއްބައިވަންތަކޮށް ދެނީ 'ކަލެކްޓިވް ތިންކިން' އިން ކަމަށެވެ. ރައީސް ސިފަކުރެއްވި ގޮތުގައި އެގޮތަށް ގުޅުވޭ ހަރުދަނާ ގުޅުމުގެ ބަދަހިކަމަކީ ގައުމީ ބަދަހިކަމެވެ.

ރާއްޖޭގެ ގައުމީ ބަތަލުން ގައުމު ސަލަމާތްކުރައްވަން ކުރެއްވި ޖިހާދަށް އިޝާރާތް ކުރައްވާ ރައީސް ވިދާޅުވީ ގައުމެއް ސަލާމަތުން އޮންނާނީ އެބައެއްގެ ބިން ސަލާމަތުން އޮވެގެން ކަމަށާއި، ބިން ސަލާމަތުން އޮންނާނީ ދައުލަތް ސަލާމަތުން ބާއްވައިގެން ކަމަށެވެ.

އަމިއްލަވަންތަ ކަމަށް ލޯތްބެއް ނުކުރެވޭނަމަ މިނިވަންކަމަށް ލޯތްބެއް ނުކުރެވޭނެ. ހަމަ އެހެންމެ އަމިއްލަ ވަންތަކަން ދިފާއު ނުކުރެވޭނަމަ މިނިވަންކަންވެސް ދިފާއެއް ނުކުރެވޭނެ. ގައުމެއް ދިފާއުކުރުމަށް އެ ގައުމެއްގެ އަމިއްލަވަންތަކަން ދިފާއު ކުރަން ޖެހޭ.

އެކަންކުރުމަށް ދުނިޔޭގެ ކުރިއަރާފައިވާ ގައުމުތަކުގައި އަމަލުކުރާގޮތަކީ އެ ގައުމެއްގެ ރައްޔިތުން ސިކުނޑިތަކުގައި އަމިއްލަވަންތަކަން އިލްމީ ގޮތުން ސާފުކޮށް ދިނުން ކަމަށް ވިދާޅުވި އެވެ.

ގައުމަކާއި އެއްކޮޅަށް ހުންނަ ކަންތަކާއި ދެކޮޅަށް ހުންނަ ކަންކަން ކޮންމެ ރައްޔިތަކަށް އިލްމާއި ބުއްދީގެ ހަމަތަކުން އޮޅުން ފިލުވައި ދެނީ. މިއީ ރާއްޖެއަށްވެސް ވަރަށް މުހިއްމު ކަމެއް.

ގެދޮރުބިނާކުރާ ފަދައިން ގައުމާ އެއްކޮޅަށް ދިވެހިންގެ ސިކުނޑި ބިނާކުރުމުގެ ވިސްނުމަކަށް ބާރުއަޅުއްވާކަން ފާހަގަކުރައްވައި ރައީސް ވިދާޅުވީ އެކަމަށްޓަކައި ބޭނުންވާ ދިރާސާތައް ހަދައި ކަމާއި ބެހޭ ފޮތްތައް ދިވެހި ބަހަށް ތަރުޖަމާކުރަމުގެ މަސައްކަތް ސަރުކާރުން ކުރަމުން ގެންދާނެ ކަމަށެވެ.