ހަބީބް، އެޗްއާރްސީއެމުގެ މެންބަރުކަމަށް އައްޔަންކުރައްވައިފި

ހިއުމަން ރައިޓްސް ކޮމިޝަން އޮފް ދި މޯލްޑިވްސް (އެޗްއާރުސީއެމް) ގެ މެންބަރުކަމުގެ މަގާމަށް، ގ.ގާކޮށި ފްލެޓް 111-ބީ، އިސްމާއިލް ހަބީބު އަބްދުއްރަހީމް، ރައީސުލްޖުމްހޫރިއްޔާ ޑރ މުހައްމަދު މުއިއްޒު، އައްޔަންކުރައްވައިފި އެވެ.
ހަބީބު އެ މަގާމަށް އައްޔަންކުރެއްވީ މިއަދު މެންދުރުފަހު ރައީސް އޮފީހުގައި ބޭއްވެވި ހާއްސަ ރަސްމިއްޔާތެއްގަ އެވެ.
އެ ރަސްމިއްޔާތުގައި އެޗްއާރްސީއެމުގެ މެންބަރުކަމުގެ މަގާމަށް އައްޔަންކުރެއްވިކަމުގެ ލިޔުން، ރައީސް ވަނީ ހަބީބާ ހަވާލުކުރައްވާފަ އެވެ.
އަދި، އެ ރަސްމިއްޔާތުގައި ރައީސްގެ ކުރިފުޅުމަތީގައި ހަބީބު ވަނީ، އެޗްއާރުސީއެމުގެ މެންބަރު ކަމުގެ ހުވާ ކުރައްވާފަ އެވެ. ހުވާ ލައިދެއްވީ ސުޕްރީމް ކޯޓުގެ ފަނޑިޔާރު އަލީ ރަޝީދު ހުސައިނެވެ.
ހަބީބު ވަނީ އިލެކްޝަން ކޮމިޝަންގެ ވައިސް ޗެއާޕާސަންގެ މަގާމު ފާއިތުވި ތިން އަހަރު (2021-2024) އަދާކުރައްވާފަ އެވެ. އޭގެ އިތުރުން ހަބީބު ވަނީ ޖެހިޖެހިގެން ދެ ދައުރު އެ ކޮމިޝަނުގެ މެންބަރުކަމުގެ މަގާމުވެސް އަދާކުރައްވާފަ އެވެ.
ހަބީބު ވަނީ ވިލާ ކޮލެޖުން ބެޗްލާ އޮފް ޝަރީއާ އެންޑް ލޯ އަދި ދިވެހިރާއްޖޭގެ ގައުމީ ޔުނިވާސިޓީން މާސްޓާ އޮފް އާޓްސް (ދިވެހި ލޭންގުއޭޖް) ހާސިލުކުރައްވާފަ އެވެ.





ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.