106 ފުޅި ބަނގުރަލާ އެކު ހައްޔަރުކުރި ބިދޭސީ މީހާ 15 ދުވަހަށް ބަންދުކޮށްފި
މި މަހުގެ 16 ވަނަ ދުވަހު ޓެކްސީ އަކުން 106 ފުޅި ބަނގުރަލާ އެކު ހައްޔަރުކުރި ބިދޭސީ މީހާ 15 ދުވަހަށް ބަންދުކުރަން ކްރިމިނަލް ކޯޓުން އިއްޔެ އަމުރުކޮށްފި އެވެ.
އެ މައްސަލާގައި ފުލުހުން ހައްޔަރުކޮށްފައިވަނީ ބަންގްލަދޭޝް، ރަސުލް އުފާ ރިދޯއި، (30އ) އެވެ.
ކްރިމިނަލް ކޯޓުން އާންމުކޮށްފައިވާ ކޯޓު އަމުރުގައިވާ ގޮތުން ރަސުލް އަށް ތުހުމަތު ކުރެވެނީ ގަވާއިދާ ހިލާފަށް ބަނގުރާ ގެންގުޅެ، އޭގެ ވިޔަފާރި ކުރިކަމުގެ ކުށުގެ ތުހުމަތު ކަމަށެވެ.
ނަމަވެސް ރަސުލް ވަނީ ބަންދުގެ މުއްދަތު ޖަހަން ކޯޓަށް ހާޒިރުކުރުމުން އެކަމަށް އޭނާ އިންކާރު ކޮށްފައިވެ އެވެ. އަދި ބަނގުރާ ފެނުނު ޓެކްސީއަށް އޭނާ އެރީ ދަތުރެއް ކުރުމަށް ކަމަށާއި އެ ކާރަށް އެރިއިރު، އޭގައި ބަނގުރާ ހުރިކަން ނޭނގޭ ކަމަށް ކޯޓުގައި ރަސުލް ބުންޏެވެ.
ރަސުލް ހައްޔަރުކޮށްފައިވަނީ މި މަހުގެ 12 ވަނަ ދުވަހުގެ ރޭ ދަންވަރުގެ ވަގުތެއްގައި ބޮޑުފުޅައްގޯޅީގައި އޮތް ކާރެއް ބަލައި ފާސްކުރުމަށްފަހު އެވެ. ފުލުހުން ބުނީ ފުލުހުން ބޮޑުފުޅައް ގޯޅިން ދިޔައިރު ކާރެއް ކައިރީގައި ތިބި ބަޔަކަށް ފުލުހުން ފެނުމުން ކާރު ދޫކޮށްލާފައި ދިޔަ ކަމަށެވެ.
މި މައްސަލައާ ގުޅިގެން އޭނާ ކްރިމިނަލް ކޯޓަށް ހާޒިރުކުރުމުން ބަންދުގެ މުއްދަތު ފުރަތަމަ ޖެހީ 10 ދުވަހަށް ކަމަށް ފުލުހުން ބުންޏެވެ. އަދި 10 ދުވަސް އިއްޔެ ވަނީ ހަމަވެފަ އެވެ.