ސަމާލުވާންވީ ކުލަ ޖަހާފާނެތީ އެއް ނޫނެވެ. ކުލަވަރު ބަދަލުވާ މީހުންނަށެވެ.
އުފަންް ދުވަހެއް، ނުވަތަ ޢީދެއް އައުމުން ކުލަ ޖެހުމަކީ މިހާރު ދިވެހިންގެ އާދަކާދައާއި ގުޅިފައިވާ ކަމެކެވެ. އެންމެ އެދެވޭ ކަމެއް ނޫން ނަމަވެސް ހަގީގަތަކީ މިއީ މިހާރު އާންމު ކަމެކެވެ.
ގަޔަށް ކުލަ ޖަހާފާނެތީ، ހެދުން ނަގާ އަރުވާ ޖަހައިގެން ދުވެ ގޮސް ބައެއް މީހުން ފިލާ ތިބޭތީ އަހަރުމެން ދެކެމުއެވެ. ބައެއް ފަހަރު އެކަން ކާމިޔާބުވެއެވެ. އެމީހުންގެ ކިބައިން ސަލާމަތް ވެވެއެވެ. އަނެއްބައި ފަހަރު ހުރި ތަނަކުން ހޯދައިގެން ކުލަތަކުން ސިފަ ވަކިނުވާ ވަރަށް މީހާ ކުލަގަނޑަކަށް ހަދާލައެވެ.
ބަޔާންކޮށްލަން މިއުޅެނީ ކުލަ ޖެހުމާއި އޭގެން ސަލާމަތް ވެވިދާނެ މޮޅެތި އުކުޅުތަކެއްގެ ވާހަކައެއް ނޫނެވެ. އެއަށްވުރެ ނުރައްކާތެރި ކަމަކުން ރައްކާތެރިވެގެން ތިބުމަށެވެ. ކުލަވަރު ބަދަލުވާ މީހުންނަށް ސަމާލު ވުމަށެވެ.
ކުލަވަރު ބަދަލުވާ މީހުންނަކީ ކޮބާ ހެއްޔެވެ؟ ތިމާއާއި ވަރަށް ގާތްކޮށް އުޅެފައި ތިމާއަށް ހެޔޮ އެދޭ ބައެއް ކަމަށް ވެސްް ވިސްނައި ދީފައި، ފަހުން ތިމާއަށް ގެއްލުންދީ، ހިތާމަދޭ މީހުންނަށް ވެސް މިހެން ކިޔައި އުޅެއެވެ.
ވަރަށް އެކުއެކީގައި އުޅުނު ނަމަވެސް ތިމާއަށް ހިތުގައި ހަސަދަވެރިކަން ބާއްވާ، އެހެން މީހުންނާއި ގާތް ވެވުމުން ތިމާ މަތިން ހަނދާން ނައްތާލާ، ތިމާއާއި ދޭތެރޭ ވަރަށް އިހާނެތިކޮށް ކަންތައް ކޮށް އުޅޭ މީހުންނަށް ވެސް، އަދި ތިމާމީހާއާއި ދެތެރޭ ނުރަނގަޅަށް ކަންތައް ކޮށްފައި ތިބި މީހުންނާއި މާބޮޑަށް ގުޅުން ބަދަހިކޮށް އެމީހުންނާއި ދިމާލަށް ކުރިން އެއްޗެހިކީ ނަމަވެސް ފަހުން އެމީހުންނާއި އެއްކޮށް އުޅޭ މީހުންނަށް ވެސް ކުލަވަރު ބަދަލުވާ މީހުންނޭ ކިޔައި އުޅެއެވެ.
މިފަދަ މީހުންނަށް ސަމާލުވެގެން ތިބެންވީ ކީއްވެ ހެއްޔެވެ؟ އެއީ އާއްމުގޮތެއްގައި މިފަދައިން ތިމާއަށް އެންްމެ ބޮޑަށް ދެރަ ދޭނީ، ތިމާ ވަރަށް ގާތްކޮށް ދެކޭ މީހުން ކަމުގައި ވާތީއެވެ.
މީހުން އެވަރަށް ގާތްކޮށްގެން ގެންގުޅުމަކީ ހަގީގަތުގައި ވަރަށް ބޮޑަށް ވޭން ލިބޭ ކަމެކެވެ. ތިމާއާއި އެކުގައި އޭނާ އުފާވެރި ވަގުތުތުތަކެއް ހޭދަ ކޮށްފައި، ފަޅި ސިކުންތެއްގެ ތެރޭގައި ބަދަލުވުމަކީ ހިތަށް ޚަންޖަރެއް ހެރޭފަދައިން ވޭން އަޅާނެ ކަމެކެވެ.
މިއީ ހަމައެކަނި ލޯބީގައި އެކަނި ވާކަމެއް ނޫނެވެ. ޢާއިލާ ތެރޭގައާއި އެކުވެރިކަމުގެ ގުޅުމުގައި ވެސް މިފަދަ ކަންކަމާއި ކުރިމަތިލާން ޖެހެއެވެ.
މިކަހަލަ ހިތްދަތިކަމުން ސަލާމަތް ވެވިދާނެ ކަމަށް އަޅުގަނޑަށް ޤަބޫލު ކުރެވެނީ، އެއްވެސް މީހަކާއި އެހާ ގާތް ގުޅުމެއް ނުބޭއްވުމެވެ. މީހުންނަށް ބަރޯސާވުން ހުުއްޓާލާ، ގާތްކަންވެސް ވަކި މިންވަރަކަށް ގެންގުޅުމެވެ.
ފަހަރެއްގައި ވެސް މިބުނަނީ ހުރިހާ އެންމެން އެއްގޮތެއް ވާނެއެކޭ އެއް ނޫނެވެ. ނަމަވެސް، ތިމާއަށް އެމީހެއްގެ ފަރާތުން ހިތާމައެއް ލިބޭހެން ހީވާ މީހެއްނަމަ، އެމީހަކާއި ދުރުމިނެއް ބެހެއްޓުން މުހިންމެވެ. އެއީ ތިމާގެ ހިތާއި ސިކުނޑިއަށް ވެސް ވަރަށް ބޮޑު ލުޔެއް ލިބޭނެ ކަމެކެވެ.
Ads by STO
