ޖަލުގައި ފުލުހެއްގެ ނިއްކުރި ފަޅާލި މީހަކަށް 1 އަހަރުގެ ހުކުމެއް!
ދޫނިދޫ ޖަލުގައި ބަންދެއްގައި ހުރި މީހަކު ފުލުސް އޮފިސަރެއްގެ ނިއްކުރި ފަޅާލި މައްސަލާގައި 1 އަހަރަށް ޖަލަށްލުމަށް ހުކުމްކޮށްފި އެވެ.
އެ މައްސަލާގައި އިއްޔެ ކްރިމިނަލް ކޯޓުން ހުކުމްކޮށްފައިވަނީ ފުވައްމުލަކު ސިޓީ, ކެލާގެ, އަހުމަަދު ސޯލިހުގެ މައްޗަށެވެ.
2022 ވަނަ އަހަރުގެ ޖެނުއަރީ 21 ވަނަ ދުވަހުގެ މެންދުރުފަހު 2:40 ހާއިރު ސޯލިހު ހުރި ގޮޅިއަށް ޕޮލިސް ސާޖަންޓް އަލީ އާދަމް މަސައްކަތު މީހަކާއެކު ދިޔައީ ފާހާނާ ސާފުކުުރުމަށެވެ. އަދި އެ ވަގުތު ގޮޅިން ނިކުމެ, އެހެން ގޮޅިތަކުގެ ކުރިމައްޗަށް ސޯލިހު ގޮސް އަޑުގަދަކޮށް, ހަޑިހުތުރު ބަހުން މުއާމަލާތުކުރި ކަމަށް ހުކުމުގައި ބުނެފައިވެ އެވެ.
ހުކުމުގައި ބުނެފައިވަނީ ސޯލިހު ގޮޅިއަށް ވައްދަން މަސައްކަތްކުރުމުން އިންކާރު ކުރުމުން, ޖަލު ގޮޅި ޕޯސްޓް ކައިރިއަށް ގެންދިއުމުންވެސް މަޑުނުކޮށް ޖަލުގެ އިދާރީ ކަންކަން ބަލަހައްޓާ ތަނާ ދިމާއަށް ދިޔަ ކަމަށެވެ. އެ ވަގުތު އެކަން ހުއްޓުވުމަށް އަލީ އާދަމް މަސައްކަތް ކުރުމުން ހިތްހަމަނުޖެހިގެން އަލީ އާދަމްގެ ގައިގެ އެކި ތަންތަނުގައި އަތުންނާއި ފައިން ތަޅައި މާރާމާރީ ހިންގާފައިވާ ކަމަށް ހުކުމުގައި ބުނެ އެވެ.
އެއަށްފަހު އަލީ އާދަމް ބިންމައްޗަށް ވެއްޓުމުން އޭނާ ގެންގުޅުނު ޓޯކީ ނަގައި, އަލީ އާދަމްގެ ބޮލުގައާއި ނިތްކުރި މަތީގައި ޖެހުމުން އޭނާގެ ނިތްކުރި ފަޅައިގެން ގޮސްފައިވާ ކަމަށް ހުކުމުގައި ބުނެފައިވެ އެވެ.
އެ މައްސަލާގައި އަނިޔާއެއް ދިނުމުގެ ކުށުގެ ދައުވާއާއި ދައުލަތުގެ މުދަލަކަށް ގެއްލުން ދިނުމުގެ ކުށުގެ ދައުވާ ސޯލިހުގެ މައްޗަށް ދައުލަތުން އުފުލި އެވެ. އެހެންނަމަވެސް ދައުވާއާއެކު ކުރިއަށްދާން ބޭނުންނުވާ ކަމަށް ބުނެ ދައުވާއަށް ސޯލިހު އިންކާރުކުރި އެވެ.
ދައުވާ ސާބިތުކުރަން ދައުލަތުން 8 ހެކި ހުށަހެޅި ނަމަވެސް ދިފާއުން ހެއްކެއް ހުށަހަޅާފައެއް ނުވެ އެވެ.
8 ހެކިންގެ ތެރޭގައި ހިމެނޭ މީހަކު ހެކި ބަސް ދެމުން ބުނެފައިވަނީ އެ ސަރަހައްދުގައި އޮތް އެޅިގައް ނަގާ އަލީ އާދަމަށް ހަމަލާދޭން ވެސް ސޯލިހު އުޅުނު ކަމަށެވެ.
އަނިޔާއެއް ދިނުމުގެ ކުށުގެ އަސާސީ އަދަބަކީ 1 އަހަރާއި 7 މަހާއި 6 ދުވަހަށް ޖަލަށްލުމެވެ. އަދި އަދަބަށް ބަދަލު އަންނާނެ ހާލަތެއް ނެތުމުން އެގޮތަށް ހުކުމްކުރި އެވެ.
ދައުލަތުގެ މުދަލަކަށް ގެއްލުން ދިނުމުގެ ކުށުގެ އަސާސީ އަދަބަކީ 4 މަހާއި 24 ދުވަހުގެ ޖަލަށްލުމެވެ. އެ ދައުވާއަކީ މި މައްސަލާގައި ހުކުމްކުރާ ދެވަނަ ދައުވާއަށްވާއިރު އަދަބު ކަނޑައަޅަން ޖެހެނީ ދެބައި ކުޅަ އެއްބައެވެ. އެހެންކަމުން އެ ކުށުގެ އަދަބަކީ 2 މަހާއި 12 ދުވަހެވެ.
އެހެންކަމުން އެ ދެ ދައުވާއާ ގުޅިގެން ސޯލިހު މައްޗަށް ކްރިމިނަލް ކޯޓުން 1 އަހަރާއި 9 މަހާއި 18 ދުވަހަށް ޖަލަށްލުމަށް ހުކުމްކޮށްފައިވެ އެވެ.
ތިފަދަ ނުރައްކާތެރި މީހަކަށް ތި ދެވުނީ އަދަބެއް ކަމަށް ގަބޫލުކުރަން ދަތި ވަރުގެ އަދަބެއް. މި ގައުމުގައި އިސްލާމީ ޝަރީޢަތް ހިންގަން ބިރުގަނެފައި، ލޫޠުބާގައިގެ މީހުންގެ ޙުކުމުން ޙުކުމްކުރަން ލޯބިކުރުމަކީ ކޮން ފަދަ ބޮޑު އަނިޔާވެރިކަމެއް؟