ވައިގަދަވެ ވިއްސާރަ ވުމާ އެކު، ބްރިޖާއި ހައިވޭއިން ދަތުރުކުރާއިރު ސަލާމަތާއި ރައްކާތެރި ކަމަށް ބަލައިގެން އުޅަނދުތައް ދުއްވުމަށް ދިވެހި ފުލުހުންގެ ހިދުމަތުން އިލްތިމާސްކޮށްފި އެވެ.
މިއަދު މެންދުރުފަހު "އެކްސް" ގައި ކުރި ޕޯސްޓެއްގައި ފުލުހުން ބުނީ މި ދުވަސްވަރަކީ ވައިގަދަ، ވިއްސާރަ ދުވަސްވަރަކަށްވުމާ އެކު، ސިނަމާލެ ބްރިޖުން ދަތުރުކުރާއިރު ތިމާ އާއި އަނެކުންގެ ސަލާމަތާއި ރައްކާތެރި ކަމަށް ބަލަން ޖެހޭ ކަމަށެވެ.
އެގޮތުން ސަމާލުކަން ދިނުމަށް ފުލުހުން ފާހަގަކުރި ކަންކަމަކީ:
- ސައިކަލު ދުއްވާއިރު ކުޑަ ނަގައިގެން ނުދުއްވުން
- ފަސޭހައިން ހަލާކުވެ، ވަޔާދާ ފަދަ ކޯޓު ބޭނުން ނުކުރުން
- ހެލްމެޓު ވަޔާނުދާނެހެން ރަނގަޅަށް އެޅުން
މި ކަންކަމުގެ އިތުރުން އުޅަނދުގެ ލައިޓުތައް ދިއްލޭތޯ ބަަލައި ސަލާމަތާއި ރައްކާތެރިކަން ކަށަވަރުކޮށްގެން އުޅަނދު ދުއްވުމަށް ވެސް ފުލުހުން ވަނީ އިލްތިމާސްކޮށްފަ އެވެ.
މާލެ ސަރަހައްދު ހިމެނޭހެން މޫސުން ގޯސްވާނެ ކަަމަށް ލަފާކޮށް މެންދުރުފަހު 3:00 އިން ފެށިގެން އިރުއޮއްސި 7:00 ޖެހުމާ ހަމައަށް ޔެލޯ އެލާޓް ވަނީ ނެރެފަ އެވެ. މޫސުމާ ބެހޭ ގައުމީ އިދާރާއިން ނެރެފައިވާ އެލާޓުގައިވާ ގޮތުން ރ. އަތޮޅުން ވ. އަތޮޅާ ދެމެދުގެ ސަރަހައްދުތަކަށް ގަޑިއަކު 28 މޭލާއި 35 މޭލާ ދެމެދުގެ ބާރުމިނުގައި ވައި ޖެހޭނެ އެވެ. ވިލާގަނޑުގައި ގަޑިއަކު 55 މޭލަށް ވައި ގަދަވާނެ ކަމަށް ވަނީ ލަފާކޮށްފަ އެވެ. އަދި ކަނޑުތައް ގަދަވާނެ ކަމަށް ވެސް ވަނީ ބުނެފަ އެވެ.
މެޓް އޮފީހުން ވަނީ މިރޭގެ 9:00 އާ ހަމައަށް ހއ. އަތޮޅުން ލ. އަތޮޅަށް ބޯކޮށް ވާރޭވެހި ގުގުރާނެ ކަމަށް ލަފާކޮށް ވައިޓް އެލާޓް ވެސް ނެރެފަ އެވެ.
އެ އޮފީހުން އިއްޔެ ބުނެފައިވާ ގޮތުގައި ރާއްޖޭގެ ސަރަހައްދުގައި ހުޅަނގު މޫސުމުގެ ބާރުގަދަވެ، ރާއްޖެ އާ ދުރުން އުތުރާއި ދެކުނުގައި ދެ ކޮޅިގަނޑު އުފެދިފައިވާ ކަމުގަ އެވެ. ރާއްޖޭގެ ހުރިހާ ސަރަހައްދަކަށް ވެސް ހޯމަ ދުވަހާ ހަމައަށް އާންމު ވައި ގަދަކޮށް ހިފަހައްޓާނެ ކަމަށް ވަނީ ލަފާކޮށްފަ އެވެ.
ކޮމެންޓް