Sunday, 15 November 2026
Advertisement
Allied Insurance (leaderboard)
ޚަބަރު

"މަގޭ ސޯލާ" ގެ އަމަލީ މަސައްކަތް ފެށުމުން ކަރަންޓް ބިލު ކުޑަވާނެ: މިނިސްޓަރު

"މަގޭ ސޯލާ" ގެ އަމަލީ މަސައްކަތް ފެށުމުން ކަރަންޓް ބިލު ކުޑަވާނެ: މިނިސްޓަރު
ސޯލާ ހަކަތައިން ކަރަންޓު އުފައްދައި ބޭނުންކުރުމަށް ގޭބިސީތަކަށް ފުރުސަތު ފަހިކޮށްދިނުމުގެ ގޮތުން "މަގޭ ސޯލާ" ގެ ނަމުގައި މި ސަރުކާރުން އިފްތިތާހު ކުރާ ޕްރޮގްރާމްގެ އަމަލީ މަސައްކަތް ފެށުމުން ކަރަންޓް ބިލު ކުޑަވެގެންދާނެ ކަމަށް އެންވަޔަރަމަންޓް މިނިސްޓަރު ތޯރިގު އިބްރާހީމް މިއަދު ވިދާޅުވެއްޖެ އެވެ. މިނިސްޓަރު ތޯރިގު އެހެން ވިދާޅުވީ ރައްޔިތުންގެ މަޖިލީހުގެ މިއަދު ޖަލްސާގައި ހިތަދޫ ދެކުނު ދާއިރާގެ އެމްޑީޕީ މެންބަރު އިބްރާހިމް ނާޒިލް ކުރެއްވި ސުވާލަކަށް ޖަވާބު ދެއްވަމުންނެވެ. މިނިސްޓަރު މަޖިލީހަށް ހާޒިރުވެވަޑައިގެންނެވީ ކަނޑިތީމުގެ ސޯލާ ހަރުކުރުމުގެ ހުއްދަ ދެވޭނީ ކޮންއިރަކުންތޯ ސުވާލުކުރުމަށް އެ ދާއިރާގެ މެންބަރު އަމީން ފައިސަލް ކުރައްވާ ސުވާލަކަށް ޖަވާބުދެއްވުމަށެވެ. ނާޒިލް ވިދާޅުވީ ސޯލާ ހަރުކުރުމަކީ ރައްޔިތުންގެ ޖީބަށް ލުއިކުރަން ކުރާ ކަމަށްވާއިރު ރައްޔިތުން ކަންބޮޑުވުމަކީ ކަރަންޓް ބިލަށް ބޮޑު ހޭދައެއް ކުރަން ޖެހުން ކަމަށެވެ. އެހެންކަމުން އެކަން ހައްލުކުރަން އެއްވެސް މަސައްކަތްތެއް މިނިސްޓްރީއާއެކު އަދި ވަޒީރުންގެ މަޖިލީހުގައި މިނިސްޓަރު ކުރައްވާފައިވޭތޯ ނާޒިލް އެއްސެވި އެވެ. ސުވާލަށް ޖަވާބު ދެއްވަމުން މިނިސްޓަރު ވިދާޅުވީ އަބަދުވެސް މަސައްކަތް ކުރަމުންދަނީ ކަރަންޓް ބިލު ކުޑަކުރެވޭނެ ގޮތްތަކަކީ ކޮބައިތޯ ބެލުމަށް ކަމަށެވެ. އަދި ބެލިި ބެލުމުގައި އެ މައްސަލަ ދިމާވާ އެއް ސަބަބަކީ ތެލަށް ކުރާ ހޭދަ ބޮޑުވުން ކަމަށެވެ. އޭގެ އިތުރުން ރެސިޑެންޝަލް ދާއިރާތަކުގައި ޖަނަރޭޓްކުރާ އަދަދަށްވުރެ ޓެރިފްގައި ހުންނަ އަދަދު ކުޑަކަން ފާހަގަކުރައްވާ މިނިސްޓަރު ވިދާލުވީ އެކަން ރަނގަޅު ކުރެވޭނީ މުޅި ސިސްޓަމް އެފިޝިއަޓްކޮށްގެން ކަމަށެވެ. މުޅި ރާއްޖެއަށް ސޯލާ ސިސްޓަމް ތަރައްގީކުރުމުގެ މަސައްކަތް ކުރަމުންދާކަން ފާހަގަކުރައްވާ ތޯރިގު ވިދާޅުވީ ރާއްޖޭގެ ހުރިހާ ސަރަހައްދެއްގައި އުފައްދާ ކަރަންޓްގެ 33 އިންސައްތައަކީ އިއާދަކުރަނިވި ހަކަތައަށް ހެދުމަށް ޑރ. މުހައްމަދު މުއިއްޒު މަސައްކަތްކުރައްވާ ކަމަށެވެ. އެއާއެކު ކަރަންޓްގެ ޓެރިފް އަދި އެފިސިއަންސީ ރަނގަޅު ކުރަން މަސައްކަތްކުރައްވަމުންދާ ކަމަށް ތޯރިގު ވިދާޅުވި އެވެ.
"އަމިއްލަ ފަރާތްތަކަށް ކަރަންޓްގެ ހިދުމަތް ނޫނީ ކަރަންޓް ބިލު ކުޑަކުރުމަށް "މަގޭ ސޯލާ" ގެ ނަމުގައި ރޫފް ސޯލާ ސިސްޓަމްތަކެއް ހަރުކުރެވި އެ މަސައްކަތް އިރާދަކުރެއްވިއްޔާ ކުރިއަށް މި އޮތް މަހެއްހާ ދުވަސްތެރޭގައި އަމަލީ ގޮތުން އެ މަސައްކަތް ފެއްޓިގެންދާނެ. އެއާއެއްކޮށް އަމިއްލަ ފަރާތްތަކުގެ ވެސް ކަރަންޓް ބިލު, އެ މީހުން ކަރަންޓަށް ފައިސާ ދައްކަން ޖެހޭ މިންވަރު ކުޑަވެގެންދާނެ."
މިނިސްޓަރު ވިދާޅުވީ ދިގު މުއްދަތަކަށް ބަހާލައިގެން އެ ސިސްޓަމް ގަތުމަށް ފައިސާ ދެއްކޭނެ ގޮތަކަށްވެސް ހަމަޖެހިގެންދާނެ ކަމަށެވެ. އެކަންތައް މިހާރު ފެނަކައާއި ސްޓެލްކޯއާ ގުޅިގެން ފައްޓާފައިވާނެ ކަމަށާއި އެ ސިސްޓަމްތަކުގެ ފުރަތަމަ 700 ޔުނިޓް އައުމުގެ މަގުމަތީގައި ހުރި ކަމަަށް އޭނާ ވިދާޅުވި އެވެ. އަދި އޭގެ އެއްބައި ސޯލާ ސިސްޓަމްތައް މާލޭގެ ބަނދަރުގާ ހުންނާނެ ކަމަށް ގަބޫލުކުރެވޭ ކަމަށް ވެސް މިނިސްޓަރު ވިދާޅުވި އެވެ.

ރިއެކްޝަން

Advertisement
Ooredoo — Truecaller (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.