ފަލަސްތީނުގެ ރައްޔިތުންނަށް އެހީތެރިވުމާއި، ހެޔޮ ދުއާ ކުރުމަކީ މުސްލިމުން ކުރަންޖެހޭ ކަމެއް
ފަލަސްތީނުގެ ރައްޔިތުންނަށް އިންސާނީ ގޮތުން އެހީތެރިވުމާއި ހެޔޮ ދުއާ ކުރުމަކީ މުސްލިމުން ކުރަން ޖެހޭނެ ކަމެއްކަމަށް އިސްލާމިކް މިނިސްޓަރު ޑރ. މުހައްމަދު ޝަހީމް އަލީ ސައީދު ވިދާޅުވެއްޖެ އެވެ.
އިސްލާމިކް މިނިސްޓަރު "އެކްސް" ގައި ކުރެއްވި ޕޯސްޓެއްގައި ވިދާޅުވީ އިސްތިއުމާރީ ބާރުތަކުން ފަލަސްތީނު މިނިވަންކޮށް ދައުލަތް ގާއިމުކުރުމަށް އެގައުމުގެ ރައްޔިތުން ކުރަމުންދާ މަސައްކަތުގައި ބައިވެރިވުމުގެ ގޮތުން، އިސްލާމީ އަހުލާގީ ހުދޫދުގެ ތެރޭގައި ތިބެ، އަޑު އުފުލައި ވަކާލާތުކުރުމަކީ ކުރަންޖެހޭ ކަމެއް ކަމަށެވެ.
މީގެ އިތުރުން ޝަހީމް ވިދާޅުވީ ފަލަސްތީނާއި އިޒްރޭލާއި ދެމެދު ކުރަމުން އަންނަ ހަނގުރާމަ ހުއްޓުވައި މެދު އިރުމައްޗަށް ސުލްހަ ގެނައުމަކީ އެތައް ބައެއްގެ ފުރާނަ ސަލާމަތްވުމުގެ އުއްމީދު ކަމަށެވެ. އަދި އެކަމަށްޓަކައި ބައިނަލްއަގުވާމީ މުޖުތަމައުން މަސައްކަތް ކުރަންޖެހޭ ކަމަށް ޝަހީމް ފާހަގަ ކުރެއްވި އެވެ.
ޝަހީމް ވަނީ ފަލަސްތީނާއި ލުބްނާނުގައި ހިނގަމުންދާ ހަނގުރާމަ ވަގުތުން ހުއްޓުވާ އިންސާނީ އެހީތެރިކަން ބޭނުންވެފައިވާ ފަރާތްތަކަށް އެހީތެރިކަން ފޯރުކޮށްދިނުން އަވަސް ކުރުމަށް މުޖުތަމައުއަށް ގޮވާލާފަ އެވެ.
ރާއްޖެއިން ފަލަސްތީނުގެ ރައްޔިތުންނަށް އެހީވުމުގެ ގޮތުން "ފަލަސްތީނާއި އެކު ދިވެހީން" ނަމުގައި ދައުލަތުގެ މީޑިއާ ޕީއެސްއެމުން ކުރިއަށްގެންދިޔަ ޓެލެތޯނަށް ލިބުނު 19 މިލިއަން ރުފިޔާ އދ. ގެ ޖަމިއްޔާ ޔުނައިޓެޑްނޭޝަންސް ރިލީފް އެންޑް ވޯކްސް އެޖެންސީ ފޯ ޕަލަސްޓައިން ރެފިއުޖީސް (އަންރުއާ) އާ ވަނީ މިދިޔަ އޮގަސްޓު މަހުގައި ހަވާލުކޮށްފަ އެވެ.
އެހެން އަހަރުތަކުގައި ރާއްޖޭގެ ދައުލަތުން ރަމްޒީ އެހީގެ ގޮތުގައި ފަލަސްތީނަށް 5000 އެމެރިކާ ޑޮލަރު ދޭއިރު، މިއަހަރު އެ އަދަދު ރައީސް މުއިއްޒުގެ ލަފާފުޅުގެ މަތިން ވަނީ 50،000 ޑޮލަރަށް އިތުރުކުރަން ނިންމާފަ އެވެ.
އިޒްރޭލުން ފަލަސްތީނަށް ދެމުންގެންދާ ލާއިންސާނީ އަނިޔާތަކުން ފަލަސްތީނު ސަލާމަތްކޮށް، އެކަމުގައި ރާއްޖެއިން އަޑުއުފުލުމުގެ ގޮތުން ހިނގާލުމެއް ބާއްވަން ވަޒީރުންގެ މަޖިލީހުން ޖޫން މަހު ވަނީ ނިންމަވާފަ އެވެ. އެހެން ސަރުކާރުތަކެކޭ އެއްފަދައިން އިޒްރޭލުން ފަލަސްތީނަށް ދެމުންދާ ހަމަލާތައް މި ސަރުކާރުންވެސް ދަނީ ކުށްވެރި ކުރަމުންނެވެ.
Ads by STO
