7000އެއްހާ ބިދޭސީންގެ ބަޔޮމެޓްރިކް ޑޭޓާ ނަގައިފި
ގަވާއިދާ ހިލާފަށް ރާއްޖޭގައި އުޅޭ ބިދޭސީންގެ މައްސަލައަށް ދާއިމީ ހައްލެއް ހޯދުމަށް ކުރާ މަސައްކަތުގެ ދަށުން ކުރިއަށް ގެންދާ "އޮޕަރޭޝަން ކުރަނގި"ގެ ދަށުން މިހާތަނަށް 7000އެއްހާ ބިދޭސީންގެ ބަޔޮމެޓްރިކް ޑާޓާ ނަގައިފި އެވެ.
މިއަދު ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވިދާޅުވީ އެ އޮޕަރޭޝަން މުޅި ރާއްޖެއަށް ފުޅާކޮށްފައިވާ ކަމަށެވެ.
އަދި އޮޕަރޭޝަނުގެ ދަށުން މިހާތަނަށް 6891 ބިދޭސީންގެ ބަޔޯމެޓްރިކް ޑޭޓާ އެއްކޮށްފައިވާ ކަމަށްވެސް މިނިސްޓަރު ވިދާޅުވި އެވެ.
"މިހާތަނަށް 82 ރަށެއްގަ ދިރިއުޅޭ ބިދޭސީންގެ މަޢުލޫމާތު އެއްކޮށްފައިވޭ. އަޅުގަނޑުމެންގެ އަމާޒަކީ އަންނަ އަހަރުގެ އޭޕްރީލް އައުމުގެ ކުރިން ހުރިހާ މަސައްކަތެއް ނިންމާލުން. އެއީ ފުރަތަމަ ފޭސްގެ.
އަދި މިހާރު މިފެންނަ އިންޑިކޭޝަންތަކަށް ބަލާއިރު އަންނަ އަހަރުގެ ޖެނުއަރީގެ ނިޔަލަށް މި މަސައްކަތް ނިންމިދާނެ ކަމަށް."މިނިސްޓަރު ވިދާޅުވި އެވެ.
އޮޕަރޭޝަން ކުރަނގި ފެށީ މި އަހަރުގެ މެއި މަހުގެ ދެވަނަ ދުވަހު އެވެ. އެ ޕްރޮގްރާމުގެ ފުރަތަމަ މަރުހަލާގައި ބިދޭސީ މަސައްކަތްތެރިން މައުލޫމާތު އެއްކުރި ނަމަވެސް އެ ފަރާތްތަކާ މެދު ފިޔަވަޅު އެޅުމަކީ މަގުސަދެއް ނޫން ކަމަށް އިހުސާން މީގެ ކުރިންވެސް ވަނީ ވިދާޅުވެފަ އެވެ.
އެގޮތުން ގަވާއިދާ ހިލާފަށް އުޅޭ ބިދޭސީންގެ ތެރެއިން ގަވާއިދުގެ ތެރެއަށް ވަންނަން ބޭނުންވާ ބިދޭސީންނަށް އެ ފުރުސަތު ފަހިކޮށްދެވޭނެ ކަމަށް މިނިސްޓަރު ވަނީ ވިދާޅުވެފަ އެވެ.
ފުރަތަމަ މަރުހަލާ ނިމުމަށްފަހު ރަސްމީ ލިޔެކިޔުން ނެތި، ގަވާއިދާއި ހިލާފަށް އުޅޭ ބިދޭސީންގެ ބަޔޯ މެޓްރިކް އައިޑެންޓިފިކޭޝަނެއް ހަދައި، ގައުމުތަކުގެ އެމްބަސީތަކާއި ގުޅިގެން އެމީހުން ފޮނުވާލުމަށް ވަނީ ނިންމާފަ އެވެ.
