ބޮޑުފޮޅުދޫގައި ޚާއްސަ އެހީއަށް ބޭނުންވާ އަންހެނަކު ރޭޕްކޮށް، ވީޑިއޯކުރި މައްސަލައިގައި ދެ މީހަކު ހައްޔަރުކޮށްފި
އއ. ބޮޑުފޮޅުދޫ ގައި ޚާއްސަ އެހީއަށް ބޭނުންވާ އަންހެނަކާއި ގަދަކަމުން ބަދުއަޚްލާގީ ޢަމަލު ހިންގާ، ވީޑިއޯ ކުރި މައްސަލައެއްގައި ކޯޓު އަމުރެއްގެ ދަށުން ދެ މީހަކު ހައްޔަރު ކޮށްފިއެވެ.
ފުލުހުންގެ މީޑިއާ އޮފިޝަލަކު ވިދާޅުވެފައިވަނީ 9 ސެޕްޓެމްބަރ ވަނަ ދުވަހުގެ ރޭގެ ވަގުތެއްގައި، ދެ މީހަކު ވެގެން ޚާއްސަ އެހީއަށް ބޭނުންވާ އަންހެނަކު އެރަށުގެ ދޯނި އެހެލާ ބަނދަރަށް ގެންގޮސް، ގަދަކަމުން ބަދުއަޚްލާގީ ޢަމަލު ހިންގާ, ވީޑިއޯ ކުރި މަައްސަލައެެއް ފުލުހުންނަށް ހުށަހެޅިފައިވާ ކަމަށާއި މިމައްސަލައިގައި ކޯޓު އަމުރެެއްގެ ދަށުން އުމުރުން 28 އަހަރުގެ ފިރިހެނަކާއި 23 އަހަރުގެ ފިރިހެނަކު ރޭގެ ވަގުތެއްގައި ހައްޔަރު ކޮށްފައިވާ ކަމަށެވެ.
މިކަމާއި ގުޅިގެން "ދެން" އަށް މައުލޫމާތު ދެއްވަމުން ބޮޑުފޮޅުދޫ ކައުންސިލު ރައީސް ޝުޖާއު އާދަމް ވިދާޅުވީ، މިމައްސަލައިގައި ހައްޔަރު ކޮށްފައިވަނީ ބޮޑުފޮޅުދޫގައި ރަށްވެހިވެފައިވާ މީހަކާއި، އެރަށު އަންހެނަކާއި އިނދެގެން އުޅޭ މީހެއް ކަމަށެވެ.
"އެމީހުން އެއަންހެން ކުއްޖާ ގެންގޮސްފައިވަނީ ފިލްމެއް އަޅަން އަންނާށޭ ކިޔާފަ ކަމަށް ރަށުތެރޭގައި ވާހަކަ ދެކެވޭ. އެކަމަކު މިހާރު ފުލުހުން ތަހުގީގު ކުރާ މައްސަލައެއް ވީމަ ސީދާ ވަކި ގޮތަކަށް ހިނގި ކަމެކޭ ދަންނަވަން ދަތި" ޝުޖާއު ވިދާޅުވިއެވެ.
