ރައީސްއަށް އެއްބާރުލުންދޭން މުސާރައިން 50 ޕަސެންޓް ނުނަންގަވާނަން: އަބްދުއްރަހީމް
ރައީސްއަށް އެއްބާރުލުންދޭން މުސާރައިން 50 ޕަސެންޓް ނުނަންގަވާނެކަން ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ ނިންމަވައިފި އެވެ.
ރައީސް ޑރ. މުހައްމަދު މުއިއްޒު މިއަދު އެކްސްގައި ވިދާޅުވީ އަންނަ އަހަރަށް ދައުލަތުގެ ބަޖެޓު ހުށަހަޅާއިރު، އިގުތިސާދީ އިސްލާހީ އެޖެންޑާގެ ދަށުން، ދައުލަތުގެ ހަރަދުތައް ކުޑަކުރުމުގެ ގޮތުން މުސާރައިން 50 ޕަސެންޓް ނުނަންގަަވަން ނިންމަވާފައިވާ ކަަމަށެވެ.
އަަދި ޝަރުއީ ދާއިރާގެ އިސްވެރިން އަދި ރައްޔިތުންގެ މަޖިލީހުގެ މެމްބަރުންގެ މުސާރައިން 10 ޕަސެންޓް އުނިކުރުމަށް އެ ފަރާތްތަކުގައި އެދިވަޑައިގަންނަވާނެ ކަމަށް ރައީސް ވިދާޅުވި އެވެ.
ރައީސްގެ ނިންމެވުމާ ގުޅީގެން އަބްދުއް ރަހީމް މިރޭ އެކްސްގައި ވިދާޅުވީ ދައުލަތުގެ އިގުތިސާދީ ހާލަތު ރަނގަޅު ކުރެއްވުމަށްޓަކައި ރައީސް ޑރ.މުހައްމަދު މުއިއްޒު އަޅުއްވަމުން ގެންދަވާ ހަރުދަނާ ފިޔަވަޅުތަކުގެތެރޭގައި ހިމެނޭ ސިޔާސީ މަގާމުތަކުގައި ތިއްބެވި ބޭފުޅުންގެ މުސާރައިން 10 ޕަސެންޓް ކުޑަ ކުރެއްވުމަށް ނިންމެވި ނިއްމެވުމަށް އެއްބާރުލުން ދިނުމުގެގޮތުން މުސާރައިން 50 ޕަސެންޓް ނުނަންގަވަން ނިންމަވާފައިވާ ކަމަށެވެ.
ރާއްޖޭގެ ގާނޫނު އޮންނަ ގޮތުން ރައްޔިތުންގެ މަޖިލީހާއި ޖުޑިޝަރީއާއި އަދި ރައީސްއަކީ ވަކިވެފައިވާ ބާރުތަކެކެވެ. އެހެންވެ ޖުޑިޝަރީގެ ބޭފުޅުންގެ މުސާރައާއި މަޖިލީހުގެ މުސާރަ ކަނޑައެޅުމުގެ ބާރު ރައީސްއަށް ލިބިވަޑައެއް ނުގަންނަވަ އެވެ.
