އަމީރުއާއި ފެނަކައިން ހިޔާނާތްތެރިވި މީހުންގެ މައްސަލަ ބަލާ, ޖަލަށްލާން އައްބާސް ގޮވާލައިފި
ކުރީގެ ފިނޭންސް މިނިސްޓަރު އިބްރާހިމް އަމީރުއާއި ފެނަކައިގެން މެނޭޖިން ޑިރެކްޓަރުގެ މަގާމު އަދާކުރެއްވި ބޭފުޅުންގެ އިތުރުން އެ ކުންފުނިން ހިޔާނާތްތެރިވި މީހުންގެ މައްސަލަ ބަލާ, ޖަލަށްލުމަށް ރައްޔިތުންގެ މަޖިލީހުގެ ވެލިދޫ ދާއިރާގެ އެމްޑީއޭގެ މެންބަރު މުހައްމަދު އައްބާސް ގޮވާލައިފި އެވެ.
އައްބާސް އެހެން ގޮވަލީ މިއަދު މަޖިލީހުގައި ކުރިއަށްދާ ސަޕްލިމެންޓްރީ ބަޖެޓްގެ ބަހުސްގަ އެވެ.
އައްބާސް ވިދާޅުވީ ބައެއް މެންބަރުން ވާހަކަ ދައްކަނީ ރައްޔިތުންގެ ލޮލުގައި އަނދުން އެޅުވުމަށާއި އެ ޕާޓީއަކަށް ގެއްލިފައިވާ ޕަބްލިކް ސަޕޯޓް އަލުން ހޯދުމުގެ ނިޔަތުގައި ކަމަށެވެ. އަދި އެއީ އެއްވެސް ވަރަކަށް ރައްޔިތުންނަށް ހެޔޮ އެދިގެން ދައްކާ ވާހަކަތަކެއް ނޫން ކަމަށް އައްބާސް ވިދާޅުވި އެވެ.
"ރައްޔިތުންނަށް ހެޔޮ އެދޭ ބައެއްނަމަ 5 މިލިޔަން ރުފިޔާއަށް އެޅޭ ކްލާސްރޫމްތަކެއް 12 މިލިއަން 15 މިލިޔަނަކަށް ނުދެއްވާނެ. 4 މިލިއަން ރުފިޔާއަށް އެޅޭ ފެނަކަ އޮފީސް އިމާރާތެއް 16 މިލިޔަނަކަށް ނުދެއްވާނެ. 6 މިލިއަން ރުފިޔާއަށް އެޅޭ ފެނަކަ އިންޖީނުގެ އެއް 17 މިލިއަން ރުފިޔާއަކަށް ނުދެއްވާނެ"
ބަޖެޓުގެ ބޭރުން ރިޔާސީ އިންތިހާބާ ދިމާކޮށް އިއުލާނުކުރި މަޝްރޫއުތަކަށް އިޝާރާތްކުރައްވާ އައްބާސް ވިދާޅުވީ އެއީ ރައްޔިތުނަށް އޮޅުވާލި ވަރަށް ބޮޑު އޮޅުވާލުމެއް ކަމަށާއި ކޮންސްޓްރަކްޝަން ކުންފުނިތަކަށް ދިން "ހިތުން ނުފިލާވަރުގެ" އަނިޔާއެއް ކަމަށެވެ.
ސަޕްލިމެންޓްރީ ބަޖެޓުގައި ހިމަނާފައިވާ 5 ބިލިއަން ރުފިޔާއިން އިސްރާފްކުޑަކޮށް ރައްޔިތުންގެ ޒަރޫރީ ބޭނުންތައް ފުއްދައިދިނުމަށް ފަރުވާތެރިވުމަށް އައްބާސް ވަނީ އިލްތިމާސްކުރައްވާފަ އެވެ.
"ކުރީގެ ފިނޭންސް މިނިސްޓަރު އަމީރު, އޭނާ މިރާއްޖޭގެ ރައްޔިތުންނަށްވެފައިވާ ބޮޑެތި ހިޔާނާތްތައް ބަލާ, ވީ އެންމެ އަވަހަކަށް އޭނާގެ މައްސަލަތައް ތަހުގީގުކޮށް އޭނާއާ ގާނޫނު އަރާ ހަމަކޮށް ވީ އެންމެ އަވަހަކަށް ގާނޫނީ ހަމަތަކުގެ ތެރެއިން ޖަލު ތަކުގެ ތޭރިތަކުގެ ތެރެއަށް ވެއްދުމަށްވެސް ދިވެހި ދައުލަތުގެ އެންމެހާ މުއައްސަސާތަކަށް އަޅުގަނޑު ގޮވާލަން"
ފެނަކައިން ހިޔާނާތްތެރިވި މީހުންގެ މައްސަލަ ބަލަންޖެހޭނެ ކަން ފަހަގަކުރައްވަމުން އައްބާސް ވިދާޅުވީ އެ ބޭފުޅުންގެ ހުރިހާ މުދަލެއް ދައުލަތަށް ނަގައި ރައްޔިތުންގެ ހަޒާނާގެ ތެރެއަށް އެތަކެތި ވައްދަން ޖެހޭ ކަމަށެވެ.
"ވައްކަންކުރި އެންމެން އެންމެން ދޫކޮށްލާފައި ބައިތިއްބާކަށް ނުޖެހޭ. އޭރުން މި ސަރުކާރުގެ ތެރެއިން ބޮޑެތި ވައްކަންތައްކޮށް ބޮޑެތި ޖަރީމާތައް ހިންގާނީ"
އައްބާސް އިތުރަށް ވިދާޅުވީ "ވަގުންނޭ" ގޮވާތާ 15 އަހަރު ވެގެން ދިޔައިރުވެސް އެއްވެސް "ވަގަކު" ހައްޔަރުކުރެވިފައި ނުވާ ކަމަށެވެ.
