17 ނޮވެމްބަރުގެ ކުރިން އާރުއެސްޑަބްލިޔު ފެސިލިޓީއަށް އެދޭ ދޯނިތަކަށް ފައިނޭންސް ހަމަޖައްސައިދެނީ
އަންނަ މަހުގެ 17 ވަނަ ދުވަހުގެ ކުރިން ލޮނުފެނުން މަސް ފިނިކުރާ ނިޒާމު(އާރުއެސްޑަބްލިޔު) ފެސިލިޓީއަށް އެދޭ ދޯނިތަކުގެ އިވޭލުއޭޝަން ފުރިހަމަކޮށް ފައިސާ ދޫކުރުމަށް މިނިސްޓްރީ އާއި އެސްއެމްއީ ޑިވެލޮޕްމަންޓް ފައިނޭންސް ކޯޕަރޭޝަން (އެސްޑީއެފްސީ) ގެ ޓީމުން މަސައްކަތް ކުރަމުންދާ ކަމަށް ފިޝަރީޒް އެންޑް އޯޝަން ރިސޯސަސް މިނިސްޓަރު އަހްމަދު ޝިޔާމް ވިދާޅުވެއްޖެ އެވެ.
ޝިޔާމް އެހެން ވިދާޅުވީ ފަރުމަހުގެ މަސްވެރިކަމުގެ ސިނާއަތު ތަރައްގީ ކުރުމުގެ ގޮތުން ދޫކުރާ ލޯނު ލިބުނު ފަރާތްތަކާ އެކު ބޭއްވި ބައްދަލުވުމެއްގައި ވާހަކަ ދައްކަވަމުންނެވެ. ވިދާޅުވީ މި ފެސިލިޓީއަކީ ސަރުކާރަކުން މިހާތަނަށް އޮޑިވެރިންނަށް ހުޅުވާލާފައިވާ އެންމެ ފަހި ފުރުސަތު ކަމަށެވެ.
ސަރުކާރުގެ އަމާޒަކީ މަސްވެރިން ބާނާ މަސް ތާޒާކަންމަތީގައި ބެހެއްޓުމަށް އޮޑިވެރިންނަށް އެހީތެރިކަން ފޯރުކޮށްދިނުން ކަމަށް ޝިޔާމް ވިދާޅުވި އެވެ.
މި ފެސިލިޓީގެ ސަބަބުން އޮޑިވެރިންނަށް ލިބޭނެ ފައިދާތަކުގެ ތެރޭގައި 35 އިންސައްތައިގެ ޑިސްކައުންޓެއް ލިބިގެންދާނެ ކަމަށާއި ދެ މިލިއަން ރުފިޔާ އާ ހަމައަށް ރަހުނަކާ ނުލައި ފެސިލިޓީ ހަމަޖެހިގެންދާނެކަން ފާހަގަކުރެއްވި އެވެ.
އޭނާ އިތުރަށް ވިދާޅުވި ގޮތުގައި އާރުއެސްޑަބްލިޔު ސިސްޓަމާ އެކު ބޭނުން ސައިޒެއްގެ ޖަނަރޭޓަރެއް ގަނެވޭނެ ކަމުގަ އެވެ. ފެސިލިޓީއަށް ހަ މަސް ދުވަހުގެ ގްރޭސް ޕީރިއަޑެއް ލިބިގެންދާނެ ކަމުގަ އެވެ. އަދި ފެސިލިޓީ އަނބުރާ ދެއްކުން 10 އަހަރަށް ބަހާލެވޭނެ ކަމަށް ވެސް މިނިސްޓަރު ވިދާޅުވި އެވެ.
ފިޝަރީޒް މިނިސްޓްރީ އާއި އެސްޑީއެފްސީ ގުޅިގެން ދޫކުރާ މި ލޯނަކީ އިސްލާމީ ޝަރީއާގެ ހަމަތަކާ އެއްގޮތަށް ދޫކުރާ ލޯނެކެވެ. ފައިނޭންސިން ހަމަޖެހިފައި ވަނީ އެސްޑީއެފްސީން "އާރުއެސްޑަބްލިޔު ފައިނޭންސިން" ނަމުގައި ހުޅުވާފައިވާ އިސްލާމިކް ފައިނޭންސިން ސްކީމް މެދުވެރިކޮށެވެ.
ލޯނަށް އެދި ހުށަހެޅުމުގެ ފުރުސަތު ހުޅުވާލާފައި ވަނީ އެސްޑީއެފްސީގެ ޕޯޓަލް މެދުވެރިކޮށެވެ. އެޕްލިކޭޝަންތައް ލިބޭ މިންވަރަކުން ޝަރުތު ހަމަވާ ފަރާތްތަކުގެ އެޕްލިކޭޝަންތައް ޕްރޮސެސްކުރުމުގެ މަސައްކަތް ކުރިއަށް ގެންދާނެ ކަމަށް މިނިސްޓްރީން މީގެކުރިން ވަނީ ބުނެފަ އެވެ. އެޕްލިކޭޝަން ބަލައިގަތުމުގެ ސުންގަޑިއަކީ އަންނަ މަހުގެ 30 ވަނަ ދުވަހެވެ.
މަޝްރޫއާ ގުޅުންހުރި އިތުރު މައުލޫމާތު ފިޝަރީޒް މިނިސްޓްރީގެ ނަންބަރު 30333434 އަދި އެސްޑީއެފްސީގެ ނަންބަރު 1613 އާ ގުޅުމުން ލިބޭނެ އެވެ.
