އިސްވެރިން އައްޔަނުކުރަން ހުށަހެޅީ މިނިވަން މުވައްސަސާތަކުން ހުށަހެޅި ގޮތް: ހަބީބް
މުއައްސަސާތަކުގެ ރައީސުންނާއި ނާއިބު ރައީސުން ސީދާ ރައީސުލްޖުމްހޫރިއްޔާއަށް އައްޔަނުކުރެވޭ ގޮތަށް މަޖިލީހަށް ހުށަހަޅާފައިވާ އިސްލާހުތަކަކީ މިނިވަން މުވައްސަސާތަކުން ހުށަހެޅި ހުށަހެޅުމެއް ކަމަށް އެޗްއާރުސީއެމްގެ މެންބަރު އަދި އިލެކްޝަންސް ކޮމިޝަނުގެ ކުރީގެ ނައިބު ރައީސް އިސްމާއިލް ހަބީބު މިރޭ ވިދާޅުވެއްޖެ އެވެ.
އޭސީސީ އަދި އިލެކްޝަންސް ކޮމިޝަންގެ ރައީސްއާއި ނާއިބު ރައީސްގެ މަގާމު ސީދާ ރައީސްއަށް އައްޔަނުކުރެވޭ ގޮތަށް ދެ ގާނޫނަކަށް އިސްލާހު ގެންނަން މަޖިލީހަށް ވަނީ ހުށަހަޅައިފަ އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އެ އިސްލާހުތަކަށް އިދިކޮޅުން ވަނީ ވަރަށް ބޮޑަށް ފާޑުކިޔައިފަ އެވެ. ނަމަވެސް ސަރުކާރު މެމްބަރުން ވަނީ އެ އިސްލާހުތައް ދިފާއުކޮށްފަ އެވެ.
އެކަމާ ގުޅިގެން ހަބީބް މިއަދު އެކްސްގައި ވިދާޅުވީ އީސީ، އޭސީސީގެ ރައީސާއި ނައިބު ރައީސް، ރައީސުލް ޖުމްހޫރިއްޔާ އައްޔަނު ކުރައްވާގޮތަށް މިހާރު މަޖިލީހަށް ހުށަހަޅުއްވާފައިވާ އިސްލާހަކީ މިނިވަން މުއައްސަސާތަކުން 2023 ގައި ރައީސުލްޖުމްހޫރިއްޔާގެ އަރިހަށާއި، އެޓަނީ ޖެނެރަލް ގެ އިތުރުން ރައްޔިތުންގެ މަޖިލީހުގެ މިނިވަން މުއައްސަސާތަކާ ބެހޭ ކޮމިޓީއަށް، އޭސީސީ، އީސީ، އެޗްއާރުސީއެމް އަދި ސީއެއްސީގެ މެންބަރުން ހުށަހެޅި ޕޭޕަރުގައި ހިމެނިފައިވާ ކަމެއް ކަމަށެވެ.
"އަދި އެއީ ދުނިޔޭގެ ކުރިއަރާފައިވާ އެމެރިކާ ފަދަ ގައުމުތަކުންވެސް އެކަން ކުރަމުން އަންނަގޮތް." ހަބީބް އިތުރަށް ވިދާޅުވި އެވެ.
