މިހާތަނަށް މަސްވެރިންނަށް ނުދެވި ހުރި ހުރިހާ ފައިސާއެއް މާދަމާގެ ނިޔަލަށް ދޫކުރަނީ

މަސްވެރިންނަށް މިހާތަނަށް ނުދެވިހުރި 16 މިލިއަން ރުފިޔާ މާދަމާގެ ނިޔަލަށް މަސްވެރިންނަށް ދީ "ބެކްލޮގް" އެއްކޮށް "ކްލިއާ" ކުރައްވާނެ ކަމަށް ފިޝަރީޒް އެންޑް އޯޝަން ރިސޯސަސް މިނިސްޓަރު އަހްމަދު ޝިޔާމް މިއަދު ވިދާޅުވެއްޖެ އެވެ.

Ads by Sosun Fihaara

ރައްޔިތުންގެ މަޖިލިހުގެ މިއަދުގެ ޖަލްސާގައި ފިޝަރީޒް މިނިސްޓަރާ ސުވާލު ކުރެއްވުމަށް ހުޅުވާލި ފުރުސަތުގައި ތިނަދޫ އުތުރު ދާއިރާގެ ކޮންގްރެސް ޕާޓީގެ މެމްބަރު ސައުދުﷲ ހިލްމީ ވަނީ މަސްވެރިންނަށް ދޫކޮށްފައި ހުރި ލޯނުތަކަށް ފައިސާ ނުދެއްކިވާ މައްސަލައިގެ ކަންބޮޑުވުން ފާޅުކުރައްވާފަ އެވެ.

އަދި ގދ. ތިނަދޫގައި ގާއިމުކުރެވެމުންދާ ކޯލްޑް ސްޓޯރޭޖް ބޭރު ބަޔަކަށް ވިއްކާލުމަށް މަސައްކަތް ކުރަމުންދާ ވާހަކަ ދައްކަމުންދާކަން ފާހަގަކުރައްވާ އެކަމުގެ ހަގީގަތަކީ ކޮބައިތޯ ސުވާލު ކުރެއްވި އެވެ.

ސުވާލަށް ޖަވާބު ދެއްވަމުން ޝިޔާމް ވިދާޅުވީ ސައުދުﷲ އާއެކު މިފަހުން ވެސް ތިނަދޫއަށް ދަތުރެއް ކޮށްފައިވާ ކަމަށެވެ.

ތިނަދޫގައި ގާއިމުކުރެވެމުންދާ ފެސިލިޓީގެ މަސައްކަތް ވަރަށް ގާތުން ބަލަމުން އަންނަ ކަމަށެވެ. ކޯލްޑް ސްޓޯރޭޖް ވިއްކާލުމަށް ނުވަތަ ހިންގުމަށް ދިނުމާ މެދު އެއްވެސް ބަޔަކާ އެކު މިހާތަނަށް މަޝްވަރާ ކުރެވިފައި ނުވާ ކަމަށެވެ.

މަސްވެރިންނަށް ނުދެވިހުރި ފައިސާ އާ ގުޅޭގޮތުން މިނިސްޓަރު ވިދާޅުވި ގޮތުގައި މިހާތަނަށް ނުދެވި ހުރީ 16.2 މިލިއަން ރުފިޔާ ކަމުގަ އެވެ.

"މިއަދު އަޅުގަނޑު މި ވާހަކަ ދައްކާއިރުގައި، ޔަގީނުން ވެސް ފިނޭންސްއިން މިފްކޯއަށް މި ފައިސާ ޖަމާކުުރުމުގެ މަސައްކަތް އެ ދަނީ. މާދަމާ މަސްވެރިންނާ ހިސާބަށް މިހާރު ހުރި ބެކްލޮގް އެއްކޮށް، ނޫނިއްޔާ މިހާރު މަސްވެރިންނަށް ނުދެވި އިން ފައިސާއެއް ވެއްޖިއްޔާ މަސް ބާނާފައި މަސްކިރާފައި ނުދެވި އިން ފައިސާއެއް ވެއްޖިއްޔާ މާދަމާ އާ ހިސާބަށް މަސްވެރިންނަށް ލިބިގެންދާނެ،"

މިނިސްޓަރުގެ ވާހަކަ އާ ގުޅިގެން މިފްކޯއިން "ދެން" އަށް މައުލޫމާތު ދިން ގޮތުގައި މަސްވެރިންނަށް ދޭން ޖެހޭ ފައިސާ އެ ކުންފުންޏަށް ލިބޭހާ އަވަހަކަށް ފައިސާ ދޫކުރުމުގެ މަސައްކަތް ކުރާނެ ކަމަށެވެ.

މިފްކޯއިން އެންމެފަހުން މަސްވެރިންނަށް ފައިސާ ދޫކޮށްފައި ވަނީ މިދިޔަ މަހުގެ 26 ވަނަ ދުވަހު އެވެ. އެ ދުވަހު 17.3 މިލިއަން ރުފިޔާ ވަނީ ދޫކޮށްފަ އެވެ.

އެއީ އޮގަސްޓު މަހުގެ 24 ވަނަ ދުވަހުން ފެށިގެން ސެޕްޓެމްބަރު މަހުގެ 26 ވަނަ ދުވަހާ ހަމައަށް ނުދެވި ހުރި ފައިސާ އެވެ.