ނަތީޖާ ދަށްކުދިން ފުލުހުންނާއި ސިފައިންގެ ހިދުމަތަށް ނެރެން ޕްރޮގްރާމެއް ފަށަނީ
ނަތީޖާ ދަށްކުދިން ފުލުހުންނާއި ސިފައިންގެ ހިދުމަތަށް ނެރެން ޕްރޮގްރާމެއް ފަށަން ނިންމައިފި އެވެ.
ނަސްރުގެ ދުވަހާ ގުޅިގެން މިރޭ ބޭއްވި ޖަލްސާގައި ރައީސް ޑރ. މުހައްމަދު މުއިއްޒު ވިދާޅުވީ އެމްއެންޑީއެފްއަށް މީހުން ރެކްރޫޓްކުރުމުގައި އެކަށީގެންވާ މަސައްކަތްތަކެއް ނުކުރެވޭ ކަމަށެވެ.
އެހެން ނަމަވެސް ކޮންމެ އަހަރަކުވެސް އެތަކެއް ދަރިވަރުންނެއް ކިޔަވާ ނިމޭ ކަމަށާއި އަދި އޯލެވެލް ނިންމައި އެކަށީގެންވާ ވަރަށް ފާސްނުވެ އޭ ލެވެލްއާ ހަމައަށް ނުދެވޭ 3000އެއްހާ ދަރިވަރުން އުޅޭ ކަމަށެވެ.
އަދި އޭގެން ގިނަ ކުދިންނަށް ވަޒީފާ ވެސް ނުލިބޭ ކަމަށެވެ.
އޭގެ އިތުރުން އޭ ލެވަލް ނިންމުމަށް ފަހު 500 އެއްހާ ކުދިންނަށް ޑިގްރީއަށް ނުދެވޭ ކަމަށެވެ.
ނަމަވެސް މިހާރު ރާއްޖޭގެ ގާނުނު އޮންނަ ގޮތުން ސިފައިންނާ ފުލުހުންގެ ހިދުމަށް 18 އަހަރު ނުފުރޭ ކުދިން ނުނެގޭ ކަމަށް އެމަނިކުފާނު ވިދާޅުވި އެވެ.
ރައީސް ވިދާޅުވީ ތައުލީމާއި ވަޒީފާއިން އެކަހެރިވެފައި ތިބޭ އެފަދަ ކުދީންނަކީ މަސްތުވާތަކެއްޗާއި، އެފަދަ ނޭދެވޭ އަމަލުތަކަށް ހުށަހެޅުމުގެ ފުރުސަތު އޮންނަ ކުދިން ކަމަށާއި އެހެން ނަމަވެސް 16 އަހަރުގެ ކުދީންނަށް، ގާނޫނުން ބާރު ލިބިގެން ފުލުހުންގެ ހިދުމަތަށާއި، އަސްކަރިއްޔާގެ ހިދުމަތަށް ވަނުމަށް ފުރުސަތުދީ، ތަމްރީނު ދެވިއްޖެނަމަ، އެކަން ވެގެން ދާނީ ގައުމަށާއި މުޖުތަމައުއަށާއި އާއިލާތަކަށް ވެސް ފައިދާ ވާނޭ ކަމަކަށް ކަމަށެވެ.
އެހެންވެ އެފަދަ ކުދިންނަށް ހާއްސަކޮށް ޕްރޮގްރާމެއް ފަށަން ނިންމާފައިވާ ކަމަށް އެމަނިކުފާނު ވިދާޅުވި އެވެ.
"ރާއްޖޭގައި ގައުމީ ހިދުމަތުގެ ޕްރޮގްރާމްގެ ގޮތުގައި ނޭޝަނަލް ސާވިސްގެ ގޮތުގައި މި އަންނަ އަހަރުން ފެށިގެން ކޮންމެ އަހަރަކު ހިންގޭ ގައުމީ ޕްރޮގްރާމެއް އިރާދަކުރެއްވިއްޔާ ފެށިގެންދާނެ. މި ޕްރޮގްރާމް ވެގެން ދާނީ މި ނެޝެނަލް ސާވިސްގެ ގާނޫނެއް ހެދިގެން، އެ ގާނޫނުން ބާރު ލިބިގެން، އުމުރުން 16 އަހަރުވުމަށްފަހު، އެ 16 އަހަރުވެގެން އޯ ލެވެލް ނިންމާފައި ނޫނިއްޔާ ތައުލީމް ހާސިލްކުރެވުނު ހިސާބަކުން ދެން މައްޗަށް ދިއުމުގެ ފުރުސަތު ނުލިބޭ ކުދިންނަށް އަދި ވަޒީފާއެއް ވެސް ނުލިބޭ ކުއްޖެއްވިއްޔާ މި ޕްރޮގްރާމްގައި ބައިވެރިވާންޖެހޭނެ." ރައީސް ވިދާޅުވި އެވެ.
