ހައްގުތަކަށް މަސައްކަތްކުރާ މީހުން ބާރުވެރިކުރުވަން މުޅި ރާއްޖޭގައި ތަމްރީނުތައް ހިންގަނީ
ހިއުމަން ރައިޓްސް ކޮމިޝަން އޮފް ދި މޯލްޑިވްސް (އެޗްއާރުސީއެމް) ގެ އާމަޒަކީ އިންސާނީ ހައްގުތަކަށް މަސައްކަތްކުރާ މީހުން ބާރުވެރިކުރުމުގެ ތަމްރީންތައް މުޅި ރާއްޖޭގައި ހިންގުން ކަމަށް އެޗްއާރުސީއެމްގެ މެންބަރު އިސްމާއީލް ހަބީބް މިއަދު ވިދާޅުވެއްޖެ އެވެ.
އިންސާނީ ހައްގުތަކަށް މަސައްކަތްކުރާ މީހުން ތަމްރީންކުރުމަށް އެޗްއާރުސީއެމްއިން އިންތިޒާމުކުރާ ހިއުމަން ރައިޓްސް ޑިފެންޑާސް ޕްރޮގުރާމް ފެށުމަށް މިއަދު ބޭއްވި ރަސްމިއްޔާތުގައި ވާހަކަދައްކަވަމުން ހަބީބު ވިދާޅުވީ އިންސާނީ ހައްގުތައް ރައްކާތެރިކޮށް، ދަމަހައްޓާ އިންސާނީ ހައްގު ކުރިއަރުވަން އެޗްއާރްސީއެމް އިން ގިނަ މަސައްކަތްތަކެއް ކުރަމުންދާ ކަމަށެވެ.
މިއަދު ފަށާ ތަމްރީންއަކީވެސް އެ މަސައްކަތުގެ ދަށުން އިންސާނީ ހައްގުތަކަށް މަސައްކަތްކުރާ މީހުން ކުރިއަރުވައި، ބާރުވެރިކުރުވައި އެމީހުންގެ ގާބިލުކަން އިތުރުކޮށް ތަރައްގީކުރުމަށް ހިންގޭ ޕްރޮގުރާމެއްކަމަށް ހަބީބް ވިދާޅުވި އެވެ.
އޭގެ އިތުރުން ހަބީބް ވިދާޅުވީ އެ ޕްރޮގުރާމުން ތަމްރީނުވާ މީހުންނަކީ އިންސާނީ ހައްގުތަކަށް އާންމުން ހޭލުންތެރިކޮށް، ކަމެއްނެތި މަގުމަތީ އުޅޭ ފަރާތްތައް ބާރުވެރިކުރުވައި، ދައުލަތް ޖަވާބުދާރީކޮށް، އިންސާނީ ހައްގުތައް ހިމާޔަތްކުރާ ބަޔަކަށް ވެގެންދާނެ ކަމަށެވެ.
"މި ހައްގުތައް ނަސްލާއި ކުލައާއި ޖިންސާއި ބަހާއި ދީނާއި ސިޔާސީ ނުވަތަ އެ ނޫންވެސް އެއްވެސް ބާވަތެއްގެ މިންގަނޑަކުން ތަފާތު ކުރުމެއްނެތި އެންމެންނަށްވެސް ލިބުމަކީ ދިވެހިރާއްޖޭގެ ގާނޫނު އަސާސީ އިން ކަށަވަރުކޮށްދޭ ހައްގެއް"
އެޗްއާރުސީއެމް އިން ބުނީ މިއަދުން ފެށިގެން މި މަހުގެ 7 ވަނަ ދުވަހުގެ ނިޔަލަށް ކުރިއަށްގެންދާ އެ ޕްރޮގްރާމް ގެ މަގްސަދަކީ މުޖުތަމައުގައި އެއްބަޔަކު އަނެއްބަޔަކާ ގުޅިގެން، އިންސާނީ ހައްގުތަކަށް އާންމުން ހޭލުންތެރިކޮށް ދައުލަތް ޖަވާބުދާރީކޮށް، އިންސާނީ ހައްގުތަކަށް ވަކާލާތުކުރާ ބައެއް ބިނާކުރުން ކަމަށެވެ.
މާލޭގައި ކުރިއަށްދާ މި ޕްރޮގްރާމުގައި 25 ފަރާތެއް ތަމްރީން ވެގެންދާނެކަމަށް އެޗްއާރުސީއެމުން ބުންޏެވެ. އަދި މިއަހަރު މި ޕްރޮގްރާމް ކުރިއަށްދާނީ ޓްރާންސްޕޭރަންސީ މޯލްޑިވްސް (ޓީއެމް) އަދި ޔޫއެސް އޭޖެންސީ ފޯ އިންޓަނޭޝަނަލް ޑިވެލޮޕްމަންޓް (ޔޫއެސްއެއިޑް) ގެ އެހީތެރިކަމާއެކު ކަމަށްވެސް އެޗްއާރުސީއެމް އިން ބުންޏެވެ.
މީގެ އިތުރުން އެޗްއާރުސީއެމް އިން ބުނީ އެ ޕްރޮގްރާމްގެ ސަބަބުން ވަކިވަކި ފަރުދުންގެ ނުވަތަ ޖަމާއަތްތަކުގެ އެއްވެސް އިންސާނީ ހައްގެއް ގެއްލިފައިވާނަމަ، އެ ހައްގު ހޯދައިދިނުމަށް މަސައްކަތްކުރާނެ ކަމަށެވެ.
2021 ވަނަ އަހަރުގައި މި ޕްރޮގްރާމް ކުޅުދުއްފުށީ ސިޓީގައި ކުރިއަށް ގެންގޮސްފައިވާއިރު، މިދިޔަ އަހަރުގައި އެ ޕްރޮގްރާމް ކުރިއަށް ގެންގޮސްފައިވަނީ ފުވައްމުލަކު ސިޓީގަ އެވެ.
