ދޯންޏެއްގެ ބުރަފަތީގައި ޖެހި ސިންގަޕޫރު ކުއްޖަކު މަރުވެއްޖެ
އދ. ދިގުރަށް ކައިރިއަށް ފީނަންގޮސް ދޯނިން މޫދަށް ފުންމާލި ވަގުތު ދޯނީގެ ބުރަފަތީގައި ޖެހި އުމުރުން 15 އަަހަރުގެ ކުއްޖަކު މަރުވެއްޖެ އެވެ.
މި ހާދިސާގައި މަރުވެފައި ވަނީ ފެހުރިއްސާ ބެހޭ ދިރާސާއެއް ހެދުމަށް "ސްޓަޑީ ޓުއާ" އެއް ގައި އެ ރަށަށް ގޮސް އުޅުނު ޓީމެއްގައި ހިމެނުނު ކުއްޖެކެވެ.
މީޑިއާތަކަށް ފޮނުވި މެސެޖެއްގައި ފުލުހުން ބުނީ އެ ކުއްޖާ މަރުވީ ސްނޯކްލިންއަށް ގޮސް ދޯނިން މޫދަށް ފުންމާލި ވަގުތު ދޯނީގެ ބުރަފަތީގައި ޖެހި ލިބުނު ޒަހަމްތަކާ ގުޅިގެން ކަމަށެވެ. މަރުވެފައި ވަނީ ސިންގަޕޫރަށް ނިސްބަތްވާ އުމުރުން 15 އަހަރުގެ އަންހެން ކުއްޖެއް ކަމަށެވެ.
ދޯނިން މޫދަށް ފުންމާލި ވަގުތު ދޯނީގެ ބުރަފަތީގައި ޖެހި ޒަހަމްވުމާ އެކު ދިގުރަށު ހެލްތު ސެންޓަރަށް އެ ކުއްޖާ ގެންދިޔަ އެވެ. ހާދިސާގެ ރިޕޯޓު ލިބުނީ ހެނދުނު 9.55 ހާއިރު ކަމަށް ފުލުހުން ބުނެ އެވެ.
"ހެލްތު ސެންޓަރަށް ގެންދިޔައިރު ވެސް ކުއްޖާ ނިޔާވެފައިވާ ކަމަށް ހެލްތު ސެންޓަރުން ފުލުހުންނަށް މައުލޫމާތު ދީފައިވޭ،"
މި މައްސަލަ ފުލުހުން ގެންދަނީ ތަހުގީގު ކުރަމުންނެވެ.
