އާބަން ސެންޓަރުތަކާ ގުޅިގެން އެމްޑީޕީން ދައްކާ ވާހަކައަށް ރައީސްގެ ނުސީދާ ރައްދެއް!

އާބަން ސެންޓަރުގެ ގޮތުގައި ސަރުކާރުން ކަނޑައެޅި ރަށްތަކާ ގުޅިގެން އިދިކޮޅު, އެމްޑީޕީން ދައްކަމުންގެންދާ ވާހަކަތަކަށް ރައީސް ޑރ. މުހައްމަދު މުއިއްޒު ނުސީދާ ރައްދެއްދެއްވައިފި އެވެ.

Ads by STELCO

އާބަން ސެންޓަރު އަޅަން ކަނޑައަޅާފައިވަނީ ރ. އުނގޫފާރު, ބ. އޭދަފުށީ, ޅ. ނައިފަރު, އދ. މަހިބަދޫ, ފ. ނިލަންދޫ, ދ. ކުޑަހުވަދޫ އަދި ލ. ފޮނަދޫ އެވެ.

އެކަމާ ގުޅިގެން އެމްޑީޕީގެ ރައީސް, ކުރީގެ ފޮރިން މިނިސްޓަރު އަބްދުالله ޝާހިދާއި ކުރީގެ ފިނޭންސް މިނިސްޓަރު އިބްރާޙިމް އަމީރު ވަނީ އާބަން ސެންޓަރުގެ ގޮތުގައި ކަނޑައެޅި ރަށްތަކުގެ ތެރޭގައި ރާއްޖޭގެ އުތުރާއި ދެކުނު ރަށްތައް ނެތުމުން ކަންބޮޑުވުން ފާޅުކުރައްވާފަ އެވެ.

ޝާހިދު ވިދާޅުވީ އާބަން ސެންޓަރުތަކުގެ ގޮތުގައި ހަމަޖެއްސި ލިސްޓުގައި ބައެއް ސަރަހައްދުތައް އުނިވި ސަބަބު ސަރުކާރުން ރައްޔިތުންނަށް ސާފުކޮށްދޭން ޖެހޭ ކަމަށެވެ. އަދި އަމީރު ވިދާޅުވީ ދައުލަތުގެ ފައިސާ ހަރަދުކޮށްގެން ގައުމީ ތަރައްގީގެ ބޮޑެތި ޕްލޭންތަކެއް ހެދުމުގެ ބޭނުމެއް ނެތް ކަމަށެވެ.

އެކަމާ ގުޅިގެން ރައީސް "އެކްސް" ގައި މިއަދު ކުރެއްވި ޕޯސްޓެއްގައި ވިދާޅުވީ މާލެއިން އުތުރުން 3 އާބަން ސެންޓަރަކާއި މާލެއިން ދެކުނުން 4 އާބަން ސެންޓަރެއް ހިމެނޭ ގޮތަށް 7 އާބަން ސެންޓަރު ތަރައްގީކުރުން އެއީ ސަރުކާރުގެ ސިޔާސަތެއް ކަމަށެވެ.

އޭގެ އިތުރުން ދެމެހެއްޓެނިވި ސަރަހައްދީ ތަރައްގީގެ ސިޔާސަތުގެ ދަށުން މާލެ އާބަން ރީޖަންގެ އިތުރުން އެންމެ މަތީ ފަންތީގެ ހިދުމަތްތައް ހިމެނޭހެން އެންމެ އުތުރުގެ 3 އަތޮޅު ހިމެނޭހެން ނޮދަން އިންޓަގްރޭޓަޑް ޑިވެލޮޕްމަންޓް ޒޯނަކާއި އެންމެ ދެކުނުގެ 4 އަތޮޅު ހިމެނޭހެން ސަދަން އިންޓަގްރޭޓަޑް ޑިވެލޮޕްމަންޓް ޒޯނެއް ތަރައްގީކުރުމަކީވެސް ސަރުކާރުގެ ސިޔާސަތެއް ކަމަށް ރައީސް ވިދާޅުވި އެވެ.

އެމަނިކުފާނުގެ މެނިފެސްޓޯގައި (ޗެޕްޓާ 4، ނަންބަރު 12، 13 އަދި 14 ގައި) އަދި މެނިފެސްޓޯ ލޯންޗްކުރި ޖަލްސާއިން ފެށިގެން މިއަދާ ހަމައަށް އެތައް ޖަލްސާއެއްގައި އެ ވާހަކަތައް ވިދާޅުވެފައިވާނެކަން ރައީސް ފާހަގަކުރެއްވި އެވެ.

ވިދާޅުވީ އެ ކަންކަމަކީ ކުރިޔަށް 20 އަހަރު ދުވަހަށް އެކަށައަޅަން މަސައްކަތް ފަށާފައިވާ ތަރައްގީގެ މާސްޓާޕްލޭންގައި ރާއްޖޭގެ ހުރިހާ ރަށެއްގެ ރައްޔިތުންގެ ހިޔާލާއި ފަންނީ ފަރާތްތަކާއި ކައުންސިލްތަކާއި ކަމާބެހޭ ހުރިހާ ފަރާތްތަކެއްގެ ބައިވެރިވުމާއެކު އެކަށައެޅުމަށް ގަސްދުކުރާ ކަންކަން ކަމަށެވެ.

ކަންކަމުގެ ހަގީގަތް ނުބައްލަވާ ނުވަތަ ހަގީގަތް އެނގިވަޑައިގެން ތިއްބަވައިގެން، ސިޔާސީ ފައިދާ ހޯދުމުގެ ނިޔަތުގައި ސިޔާސީ ބައެއް ފަރާތްތަކުން ކުރައްވާ ކަންކަމަށް ޒިންމާވާނީ އެކަންކަން ކުރައްވާ ބޭފުޅުން ކަމަށް ރައީސް ވިދާޅުވި އެވެ.

ރައީސް މުއިއްޒު ވިދާޅުވެފައިވާ ގޮތުން އާބަން ސެންޓަރުގައި ސިއްހީ ނިޒާމުގެ ތެރެއިން އެންމެ މުހިންމު ހުރިހާ ދާއިރާއަކުން ހިދުމަތް ދެވެން ހުންނާނެ ކަމަށެވެ. އެގޮތުން އެކިކަހަލަ ތެރެޕީތައްވެސް ދެވޭނެކަމަށްވެސް ރައީސް ފާހަގަކުރެއްވި އެވެ. އަދި ތައުލީމީ ނިޒާމުވެސް އެންމެ މަތީ ފެންވަރުގައި ގާއިމުކުރައްވާނެކަމަށާއި، މަގުތައްވެސް އެންމެ ރަނގަޅަށް ހަދައި އަދި ދެންހުރި ކަންކަން ވެސް އެންމެ ރަނގަޅަށް ގާއިމުކުރެވިފައި ހުންނާނެކަމަށްވެސް ރައީސް ވަނީ ވިދާޅުވެފަ އެވެ.