ކުށްތަކަށް ހުށަހެޅިފައި ވަނީ ޒުވާނުންގެ ދެ އިންސައްތަ، މި އަދަދު މަދުކުރެވިދާނެ: ޝިފާން
ރާއްޖޭގައި އެކި ކުށްތަކަށް ހުށަހެޅިފައިވާ މީހުންގެ ތެރޭގައި ހިމެނެނީ ޒުވާނުންގެ ދެ އިންސައްތަ ކަމަށާއި މި އަދަދު މި މިއަށްވުރެ ވެސް މަދުކުރެވިދާނެ ކަމަށް ފުލުހުންގެ ތަރުޖަމާނު އެސިސްޓެންޓް ކޮމިޝަނަ އޮފް ޕޮލިސް އަހްމަދު ޝިފާން ވިދާޅުވެއްޖެ އެވެ.
މިއަދު "އެކްސް" ގައި ކުރެއްވި ޕޯސްޓެއްގައި ޝިފާން ވިދާޅުވީ ދިވެހި ގިނަ ޒުވާނުންނަކީ، ގާނޫނަށް ތަބާވާ އުފެއްދުންތެރި ބައެއް ކަމަށެވެ. ނަމަވެސް ގާނޫނަށް ތަބާނުވެ، ކުށްތަކަށް ހުށަހެޅިފައި ވަނީ އުމުރުން 15 އަހަރާއި 34 އަހަރާ ދެމެދުގެ މީހުންގެ ތެރެއިން މަދު އިންސައްތައެއް ކަމަށެވެ. އެ ޒުވާނުން އަދިވެސް ހަމަ މަގަށް އެޅުވިދާނެކަން ފާހަގަކުރެއްވި އެވެ.
"ޒުވާނުންނަށް ކުރިއަށް ދިއުމަށް ފަހި ފުރުސަތުތަކެއް ހޯދައިދީގެން، އެ ޒުވާނުންނަކީ ދިވެހި މުޖުތަމައުގައި ބޭނުން ހިފޭ ގާބިލު ބަޔަކަށް ހެދިދާނެ. އަދި މިކަމުން އުޖާލާ އަދި ރައްކާތެރި މުސްތަގުބަލަކަށް ޒުވާނުން ބާރުވެރިކުރެވިދާނެ،" ޝިފާން ވިދާޅުވި އެވެ.
ޝިފާން މިފަދައިން ވިދާޅުވެފައިވާއިރު، އިއްޔެ ބޭއްވި ނޫސްވެރިންގެ ބައްދަލުވުމުގައި ފުލުހުން ބުނީ ގޭންގު ހަރަކާތްތަކާއި އެކަމާ ގުޅިގެން ރައްޔިތުންނަށް ކުރިމަތިވެދާނެ ނުރައްކާތައް ކުޑަކުރުމަށް މަސައްކަތް ކުރަމުންދާ ކަމަށެވެ.
ބައްދަލުވުމުގައި ހިއްސާކުރި ތަފާސް ހިސާބުތައް ދައްކާ ގޮތުން ގޭންގުތައް ހަރަކާތްތެރިވާ އެކިއެކި ސަރަހައްދުތަކުން 20،597 ފަހަރު މީހުން ހުއްޓުވާ ސުވާލުކޮށްފައިވެ އެވެ. އޭގެތެރޭގައި 18 އަހަރު ފުރިފައިވާ 5،449 މީހުން އަދި 307 ކުޑަކުދިން ހިމެނޭ ކަމަށެވެ. އަށާރަ އަހަރުން ދަށުގެ ކުދިންނާ 2،315 ފަހަރު ސުވާލު ކުރެވިފައިވާ ކަމަށެވެ.
މީގެއިތުރުން 2،658 އުޅަނދެއް ތަކުރާރުކޮށް 3،043 ފަހަރު ހުއްޓުވާ ސުވާލު ކޮށްފައިވާކަން ވެސް ފުލުހުން ފާހަގަކޮށްފައިވެ އެވެ.
