ތޮއްޑޫގައި އެމްއެންޔޫގެ އެގްރިކަލްޗާ އެންޑް ފުޑް ސައިންސަސް ފެކަލްޓީ ގާއިމުކުރަނީ
އއ. ތޮއްޑޫގައި ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) ގެ ފެކަލްޓީ އޮފް އެގްރިކަލްޗާ އެންޑް ފުޑް ސައިންސަސް އިމާރާތް ކުރުމަށް ބޭނުންވާ ބިން އެ ރަށު ކައުންސިލުގެ އިދާރާއިން ހަވާލުކޮށްފި އެވެ.
އެގްރިކަލްޗާ އެންޑް ފުޑް ސައިންސަސް ފެކަލްޓީ ގާއިމުކުރުމަށް ބޭނުންވާ ބިން ތޮއްޑޫ ކައުންސިލުން އެމްއެންޔޫ އާ ހަވާލުކޮށްފައި ވަނީ އިއްޔެ އެ ޔުނިވާސިޓީގައި ބޭއްވި ހާއްސަ ރަސްމިއްޔާތެއްގަ އެވެ. ޔުނިވާސިޓީގެ ސެންޓްރަލް އެޑްމިނިސްޓްރޭޝަނުގައި ބޭއްވި އެ ރަސްމިއްޔާތުގައި އެގްރިކަލްޗާ އެންޑް އެނިމަލް ވެލްފެއާ މިނިސްޓަރު ޑރ. އާއިޝަތު ރަމީލާ އަދި ތޮއްޑޫ ކައުންސިލުގެ އިސްވެރިން ބައިވެރިވެ ވަޑައިގެންނެވި އެވެ.
އެމްއެންޔޫއިން ބުނީ 80،000 އަކަފޫޓުގެ ބިމުގައި އަޅާ މި ފެކަލްޓީގައި މުހިންމު ހަތަރު ޑިޕާޓްމަންޓެއް ގާއިމުކުރާނެ ކަމަށެވެ. އެއީ ހޯޓިކަލްޗާ، ސޮއިލް އެންޑް ވޯޓާ މެނޭޖްމެންޓް، ޕްލާންޓް ޕްރޮޓެކްޝަން އަދި ފުޑް ސައިންސަސް އެންޑް ޓެކްނޮލޮޖީ ޑިޕާޓްމެންޓެވެ.
ކޮންމެ ޑިޕާޓްމެންޓެއްގައި ޒަމާނީ ވަސީލަތްތަކާ އެކު ހާއްސަ ލެބޯޓަރީތައް ގާއިމުކުރާނެ އެވެ. މިފަދަ ޒަމާނީ ވަސީލަތްތަކުގެ ސަބަބުން ދަރިވަރުންނަށް އަމަލީ ތަޖުރިބާ ލިބި، ރާއްޖޭގެ ދަނޑުވެރިކަމުގެ ދާއިރާ ތަރައްގީ ކުރުމަށް ބޭނުންވާ ހުނަރުވެރި ޒުވާނުން ތައްޔާރު ކުރުމަށް މަގުފަހިވެގެންދާނެ ކަމަށް އެމްއެންޔޫއިން ބުނެ އެވެ.
އަދި ދަނޑުވެރިކަމުގެ ދާއިރާއަށް ބޭނުންވާ ޒަމާނީ އާ ޓެކްނޮލޮޖީތަކާއި އުފެއްދުންތެރި ހިޔާލުތައް ތައާރަފުވެ، ގައުމުގެ އިގުތިސޯދަށް އިތުރު ފުރުސަތުތައް ހުޅުވިގެންދާނެ ކަަމަށެވެ. ދިވެހި ޒުވާނުންނަށް ދަނޑުވެރިކަމުގެ ދާއިރާއިން މަތީ ތައުލީމު ހާސިލު ކުރުމުގެ ފުރުސަތު ލިބި، ގައުމުގެ ކާބޯތަކެތީގެ ރައްކާތެރިކަން ކަށަވަރު ކުރުމަށް މަގުފަހިވެގެންދާނެ ކަމަށެވެ.
އެމްއެންޔޫއިން ބުނި ގޮތުގައި މި ފެކަލްޓީ ގާއިމުކުރެވުމުން ދަނޑުވެރިކަމުގެ ދާއިރާއިން ކުރެވޭ ދިރާސާތަކާއި ތަހުލީލުތައް އިތުރުވެ އާ ޓެކްނޮލޮޖީތައް ތައާރަފުވެގެން ދާނެ ކަމުގަ އެވެ. އޭގެ އިތުރުން ތޮއްޑޫ އާއި އެ ސަރަހައްދުގައި ވަޒީފާގެ ފުރުސަތުތައް އިތުރުވެ، އިގުތިސޯދީ ގޮތުން ކުރިއެރުންތައް ލިބިގެންދާނެ ކަމުގަ އެވެ.
