ދައުލަތުގެ ވެރިންނަށް ވިސާއާ ނުލައި އަޒަރުބައިޖާންއަށް ދެވޭ ގޮތް ހަދައިފި
ދައުލަތުގެ ވެރިންނަށް ވިސާއާ ނުލައި އަޒަރުބައިޖާންއަށް ދެވޭ ގޮތް ހަދައިފި އެވެ.
މިހާރު އަޒަރުބައިޖާންގެ ވެރިރަށް ބަކޫގައި ކުރިއަށް ދާ ކޮޕް ސަމިޓުގެ ހަވާސާގެ ތެރެއިން ރާއްޖެއާއި އަޒަރުބައިޖާންއާ ދެމެދު މުހިއްމު ދެ އެއްބަސްވުމެއްގައި މިއަދު ވަނީ ސޮއިކޮށްފަ އެވެ.
ރާއްޖެއާއި އަޒަރުބައިޖާންއާ ދެމެދު ސޮއިކުރީ އިގުތިސާދީ، ސަގާފީ އަދި އިޖުތިމާއީ ގޮތުން ދެ ގައުމަށްވެސް ފައިދާވާނޭ ގޮތަށް ފަތުރުވެރިކަން ކުރިއެރުވުމާ ގުޅޭ އެއްބަސްވުމަކާއި ދެގައުމުގެ ރައްޔިތުންނަށް ދަތުރުފަތުރުކުރުމުގައި ލުއިފަސޭހަގޮތްތަކެއް ހޯދައިދިނުމުގެ މަގުސަދުގައި ސޮއިކުރި އެއްބަސްވުމެކެވެ.
އެ ދެ އެއްބަސްވުމުގައި ރާއްޖޭގެ ފޮރިން މިނިސްޓަރު ޑރ. އަބްދުﷲ ހަލީލް ސޮއިކުރެއްވި އިރު އަޒަރުބައިޖާންގެ ފަރާތުން ސޮއިކުރެއްވީ އެ ގައުމުގެ ފޮރިން މިނިސްޓަރު ޖޭހޫން ބައިރަމޯލް އެވެ.
ފޮރިން މިނިސްޓްރީން ބުނީ ދަތުރުފަތުރާ ގުޅޭ އެއްބަސްވުމުގެ ދަށުން ރާއްޖޭގެ ޑިޕްލޮމެޓިކް އަދި އޮފިޝަލް ޕާސްޕޯޓް ބޭނުންކުރައްވާ ފަރާތްތަކަށް ވިސާ އާއި ނުލައި އަޒަރުބައިޖާން އެތެރެވުމާއި، ޓްރާންސިޓް ވުން އަދި 90 ދުވަހުގެ މުއްދަތަކަށް އެގައުމުގައި ހުރުމުގެ ހުއްދަ ލިބިގެންދާނެ ކަމަށެވެ.
އަދި އެ އެއްބަސްވުމަކީ ހުރިހާ ދިވެހިރައްޔިތުންނަށް ވިސާއަކާ ނުލައި ދަތުރުކުރެވޭނެ ގޮތް މަގުފަހިކޮށްދިނުމަށްޓަކައި ކުރެވޭ މަސައްކަތަށް އެޅުނު މުހިއްމު ފިޔަވަޅެއް ކަމަށާއި އެއްބަސްވުމުގެ ދަށުން އެކަމާ ގުޅޭ މަޝްވަރާތައް ވެސް ކުރިއަށް ގެންދެވޭނެ ކަމަށް ފޮރިން މިނިސްޓްރީން ބުނެފައި ވެއެވެ.
Ads by STO
