ރައީސްގެ ގަދަބަސް ރިސޯޓު އޯނަރުންނަށް؛ ގަވާއިދަށް ތަބާވާން ޖެހޭނެ، ބަދަލެއް ނުކުރާނަން

ރާއްޖެ އަންނަ ކޮންމެ ޓޫރިސްޓަކަށް ވަކި ރޭޓެއްގެ ދަށުން ޑޮލަރު މާާރުކުރަން މަޖުބޫރުވާ ގޮތަށް މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އެކުލަވާލާފައިވާ އާ ގަވާއިދަށް ރިސޯޓުތަކުގެ ވެރިންވެސް ޖެހޭނީ އަމަލުކުރަން ކަމަށާއި އެ ގަވާއިދު ބަދަލުނުކުރައްވާނެ ކަމަށް ރައީސް ޑރ މުހައްމަދު މުއިއްޒު މިރޭ ވިދާޅުވެއްޖެ އެވެ.

Ads by MWSC

ޑޮލަރު މާރުކުރަން ބައެއް ރިސޯޓުތަކުގެ އޯނަރުން ވަނީ ދެކޮޅުހަދައި އެކަން ސަރުކާރަށް އަންގާފަ އެވެ. އަދި އެ ނިންމުން ބަދަލުކުރަން ރައީސް އޮފީހަށް ސިޓީވެސް ފޮނުވާފައިވެ އެވެ.

ރިސޯޓު އޯނަރުން ވިދާޅުވާ ގޮތުންނަމަ ރިސޯޓުތަކުން މިހާރުވެސް ޓެކްސްގެ ގޮތުގައި ފައިސާ ދައްކަނީ ޑޮލަރުންނެވެ. އަދި އޭގެ އިތުރުން ޖީއެސްޓީއާއި ރިސޯޓު މުވައްޒަފުންނަށް ދޭ މުސާރައާއި ގްރީން ޓެކްސްއާއި ސަޕްލަޔަރުންނާއި އަދި މާކެޓިންއާއި އެހެނިން ހަރަދުތައް ވެސް ކުރަމުންދަނީ ޑޮލަރުން ކަމުން އެމްއެމްއޭގެ ގަވާއިދަށް އަމަލުކުރެވެން ނެތެވެ.

މި ސަރުކާރަށް އެއް އަހަރު ފުރުމާ ގުޅިގެން މިރޭ ސޯޝަލް ސެންޓަރުގައި ބޭއްވި ރަސްމިއްޔާތުގައި ރައީސް މުއިއްޒު ވިދާޅުވީ އެ ގަވާއިދު ބަދަލުކުރުމުގެ ވިސްނުމެއް ނެތް ކަމަށެވެ. ވިޔަފާރިވެރިންވެސް ޖެހޭނީ ގާނޫނާއި ގަވާއިދުތަކަށް ތަބާވާން ކަމަށް ހަރުއަޑުން ރައީސް ވިދާޅުވި އެވެ.

"ނެތިން މި ގަވާއިދު ބަަދަލުކުރާކަށް ނުކުރާނަން، ވަރަށް ސާފުކޮށް މި ދެންނެވީ ގަވާއިދު ބަދަލުނުކުރާނަމޭ، 500 ޑޮލަރު މާރުކުރަން ޖެހިވަޑައިގަންވާނެ " ރައީސް ވިދާޅުވި އެވެ.

އާ ގަވާއިދާ އެކު ކެޓަގަރީ އޭ ޓޫރިސްޓު ވިޔަފާރިތަކުން މީލާދީ މަހެއްގައި އަންނަ ކޮންމެ ޓޫރިސްޓަކަށް 500 އެމެރިކާ ޑޮލަރުގެ ރޭޓުން، އެ މަހަަށް ފަހު ހިނގާ ތިންވަނަ މަހުގެ 28 ވަނަ ދުވަހުގެ ކުރިން ދައްކަން ޖެހޭނެ އެވެ. އެ އުސޫލުން ކެޓަގަރީ ބީން ދައްކަން ޖެހޭނީ 25 ޑޮލަރުގެ ރޭޓުންނެވެ.

ކެޓަގަރީ އޭ ގެ ޓޫރިސްޓު ވިޔަފާރިއަކަށް އެ އަދަދަށް ފައިސާ ނުލިބޭނަމަ މީރާއަށް ހުށަހެޅުމަށް ގަވާއިދުގައި ބުނެފައިވެ އެވެ. އެގޮތުން ބަލަން ޖެހޭ ކަންކަން ބެލުމަށް ފަހު ގަވާއިދުގައި ބުނާ އަދަށް ވުރެ ދަށް އަދަދެއް އެ ވިޔަފާރިއަކަށް ކަނޑައެޅުމުގެ ބާރު އެމްއެމްއޭއަށް ލިބިގެންވާ ކަމަށް ވެސް ގަވާއިދުގައި ބުނެފައިވެ އެވެ.

ގަވާއިދުގައި ބަޔާންކުރާ މި މާއްދާތަކާ ހިލާފުވާ ވިޔަފާރިތައް 5،000 ރުފިޔާއާއި 1 މިލިއަން ރުފިޔާއާ ދެމެދުގެ އަދަދަކުން އެމްއެމްއޭއިން ޖޫރިމަނާ ކުރެވޭނެ ކަމަށް ވެސް ބުނެފައިވެ އެވެ.

މިރޭގެ ޖަލްސާގައި ރައީސް ވިދާޅުވީ، ސަރުކާރުން ކަނޑައަޅާފައިވާ ގޮތަށް ޑޮލަރު މާރުކުރަމުންދާނަމަ، މާރުކުރަން ޖެހޭނީ ޓޫރިޒަމް އިންޑަސްޓްރީއަށް އާންމުކޮށް ވަންނަ އާމްދަނީގެ 15-20 އިންސައްތަ ކަމަށެވެ. އަދި އެހެން އެކަން ކުރުމުން ރައްޔިތުންނަށް ލިބޭނެ ފައިދާތައް ހިއްސާކުރެއްވި އެވެ.

އެގޮތުން، ގަވާއިދާ އެއްގޮތަށް ޓޫރިޒަމް އިންޑަސްޓްރީން ޑޮލަރު މާރުކުރަމުންދާނަމަ، އަންނަ އަހަރުގެ ޖުލައި މަހުން ފެށިގެން ސަރުކާރު ހިއްސާވާ ކުންފުނިތަކަށް ޕެރެލަލް މާކެޓުގައި ޑޮލަރު މާރުކުރަން ނުޖެހޭނެ ކަމަށް ވިދާޅުވި އެވެ. އަދި އެ ކުންފުނިތަކަށް ރަސްމީ ރޭޓުގައި ޑޮލަރު ލިބިގެންދާނެކަން ފާހަގަކުރެއްވި އެވެ.

އޭގެ އިތުރުން ޑޮލަރު މާރުކުރުމުގެ ކަންތައް ކުރިއަށްދާތާ އަހަރެއްހާ ދުވަހުގެ ތެރޭގައި ރާއްޖެއިން ބޭރަށް ފުރާ މީހުންނަށް ބޭންކް ރޭޓުގައި 1،000 ޑޮލަރު ގަތުމުގެ ފުރުސަތު ލިބިގެންދާނެ ކަމަށް ވެސް ރައީސް ވިދާޅުވި އެވެ. މިހާރު ރާއްޖެއިން ބޭރަށް ފުރާ މީހުންނަށް ބޭންކް ރޭޓުގައި ގަންނަން ލިބެނީ 500 ޑޮލަރެވެ.

ގަވާއިދަށް ގެނެވުނު ބަދަލުގެ ސަބަބުން ވިޔަފާރިވެރިންނަށް ވެސް ފައިދާ ކުރާނެކަން ރައީސް ފާހަގަކުރެއްވި އެވެ. ރައީސް ވިދާޅުވީ، ޓޫރިޒަމް އިންޑަސްޓްރީއިން ޖެނުއަރީ އިން ފެށިގެން ޑޮލަރު މާރުކުރުމުގެ ކަންތައް ގަވާއިދާ އެއްގޮތަށް ކުރިއަށް ގެންދާނަމަ، ހަ މަސް ދުވަހުގެ ތެރޭގައި މުދާ އިމްޕޯޓް ކުރުމުގަ ބޭންކް ތަކުން ޓީޓީ ހެދުމަށް ވިޔަފާރިވެރިންނަށް ދޫކުރާ ޑޮލަރުގެ އަދަދު އިތުރުކޮށްދޭނެ ކަމަށެވެ.

އަދި ކްރެޑިޓް ކާޑުގެ ލިމިޓް ވެސް އިތުރުކުރައްވާނެ ކަމަށް ރައީސް ވިދާޅުވި އެވެ.