ރައީސް ވިދާޅުވީ މީޑީއާ ކޮންޓްރޯލް ބިލު ބޭރުކޮށްލާނެ ކަމަށް
މޯލްޑިވްސް މީޑިއާ ކައުންސިލް (އެމްއެމްސީ) އަދި ބްރޮޑްކާސްޓިން ކޮމިޝަން އުވާލައި، "މޯލްޑިވްސް މީޑިއާ އެންޑް ބްރޮޑްކާސްޓިން ކޮމިޝަން" ގެ ނަމުގައި އާ ކޮމިޝަނެއް އުފައްދަން ރައްޔިތުންގެ މަޖިލިހަށް ހުށަހަޅާފައިވާ 'މީޑިއާ ކޮންޓްރޯލް ބިލް' ޕީއެންސީގެ ސުޕަ މެޖޯރިޓީ އޮންނަ މަޖިލީހުން ބޭރުކޮށްލާނެ ކަމަށް ރައީސް ޑރ މުހައްމަދު މުއިއްޒު މިރޭ ވިދާޅުވެއްޖެ އެވެ.
އެ ބިލާ ދެކޮޅަށް، ނޫސްވެރިންގެ ޖަމިއްޔާ މޯލްޑިވްސް ޖާނަލިސްޓް އެސޯސިއޭޝަން (އެމްޖޭއޭ) އިސް ނަގައިގެން 'ހަތަރެއްގެ ހައްގުގައި' ނަމުގައި ކެމްޕޭނެއް ވަނީ ފަށާފަ އެވެ. އެ ބިލު މަޖިލީހަށް ހުށަހެޅުއްވީ ތުޅާދޫ ދާއިރާގެ މިނިވަން މެމްބަރު އަބްދުލްހަންނާން އަބޫބަކުރެވެ. އެ ބިލުގެ ފުރަތަމަ ކިޔުން ތަވާލުކޮށްފައި ވަނީ ބުދަ ދުވަހަށެެވެ.
ސަރުކާރަށް އެއް އަހަރު ފުރުމާއި ގުޅިގެން މިރޭ ސޯޝަލް ސެންޓަރުގައި ބޭއްވި ޖަލްސާ އަށް ފަހު ނިކުމެވަޑައިގަންނަވަނިކޮށް އެމްޖޭއޭގެ އެކްސްކޯ މެންބަރު ނޫސްވެރިޔާ މުޒައްޔިން ނާޒިމް ވަނީ އެ ބިލު މަޖިލީހުން ބޭރު ކުރާނެތޯ ރައީސްގެ އަރިހުން ސުވާލުކޮށްފަ އެވެ.
""ޔެސް ބޭރު ކުރާނަން. ބޭރު ކުރާނަން. ޔެސް އޮފްކޯޒް" ރައީސް މުއިއްޒު ވިދާޅުވި އެވެ.
ބިލުގައިވާ ގޮތުން އެ ގާނޫނަށް އަމަލުކުރަން ފެށުމާ އެކު، އެމްއެމްސީ އަދި ބްރޯޑްކޮމް އުވާލެވޭނެ ކަމަށާއި މޯލްޑިވްސް މީޑިއާ އެންޑް ބްރޯޑްކާސްޓިންގެ ނަމުގައި އުފައްދާ ކޮމިޝަނުގައި ތިބޭނީ 7 މެމްބަރުން ކަމަށެވެ. އޭގެތެރެއިން 4 މެމްބަރުން ކަނޑައަޅާނީ ރައްޔިތުންގެ މަޖިލިހުގެ ރުހުމާ އެކު ރައީސުލްޖުމްހޫރިއްޔާ ކަމަށެވެ. ބާކީ ތިން މެމްބަރުންނަކީ މީޑިއާއިން އިންތިހާބުކުރާ މެންބަރުން ކަމަށްވި ނަމަވެސް އެ ކޮމިޝަނުގެ ރައީސާއި ނައިބު ރައީސް ކަނޑައެޅުމުގެ ބާރު ލިބިދެނީ ވެސް ރައީސުލްޖުމްހޫރިއްޔާއަށެވެ.
އޭގެ އިތުރުން ބިލުގައި ވަނީ ނޫސް މަޖައްލާއެއްގެ ރަޖިސްޓްރީ ބާތިލުކުރާނެ ހާލަތްތަކާއި ބްރޯޑްކާސްޓްކުރުމުގެ ހިދުމަތްދިނުމުގެ ލައިސަންސް އޮތް ފަރާތަކުން ސުލޫކީ މިންގަނޑާ ނުވަތަ ލައިސަންސް ދިނުމުގެ ޝަރުތަކާ ހިލާފުވެއްޖެނަމަ އަމަލުކުރާނެ ގޮތްތައް ބަޔާންކޮށްފަ އެވެ. އަދި ނޫސް މަޖައްލާއަކުން ނުވަތަ މީޑިއާގައި މަސައްކަތްކުރާ ފަރާތްތަކާއި ނޫސްވެރިން ބަޔާންކޮށްފައިވާ އުސޫލުތަކާ ހިލާފުވެއްޖެނަމަ އަމަލުކުރާނެ ގޮތްތަކާއި ކުރެވޭނެ ޖޫރިމަނާތައް ބިލުގައި ވަނީ ހިމަނާފަ އެވެ.
