ވިޔަފާރިއާ ދުރު ބަޖެޓެއް ކަމަށް ވިދާޅުވެ ސިޔާމްގެ ބަހުގެ ހަމަލާތައް ސަރުކާރަށް
އަންނަ އަހަރަށް ލަފާކޮށް ފިނޭންސް މިނިސްޓްރީން ރައްޔިތުންގެ މަޖިލީހަށް ހުށަހަޅާފައިވާ ދައުލަތުގެ ބަޖެޓަކީ ވިޔަފާރިއާ ދުރު ބަޖެޓެއް ކަމަށް ވިދާޅުވެ މަޝްހޫރު ވިޔަފާރިވެރިޔާ އަދި މަޖިލީހުގެ މީދޫ ދާއިރާގެ މެންބަރު އަހުމަދު ސިޔާމް މުހައްމަދު ސަރުކާރަށް ބަހުގެ ހަމަލާތައް ފޮނުއްވައިފި އެވެ.
މި ސަރުކާރުގެ ކޯލިޝަން ޕާޓްނަރުންގެ ތެރޭ ހިމެނިވަޑައިގަންނަވާ ސިޔާމްގެ ބަހުގެ ހަމަލާތައް ސަރުކާރަށް އަމާޒުކުރި މަޖިލީހުގައި ކުރިއަށްދާ ބަޖެޓުގެ ބަހުސްގަ އެވެ.
މީދޫ ދާއިރާގެ މެންބަރުކަމުގެ 4 ވަނަ ދައުރު ފުރުއްވަމުން ގެންދަވާ ސިޔާމް މިއަދު ވިދާޅުވީ ހުށަހަޅާފައިވާ ބަޖެޓަކީ މަޖިލީހުގެ މެންބަރެއްގެ ގޮތުގައި އޭނާ ހޭދަކުރެއްވި ދިގު މުއްދަތުގައި ހުށަހެޅި ތަފްސީލެއް ނެތް ފުރަތަމަ ބަޖެޓް ކަމަށެވެ. އެގޮތުން ބަޖެޓް ފޮތުގައި ދާއިރާގެ ރަށްތަކާއި ރާއްޖޭގެ އެހެން ރަށްތަކުގެ ތަރައްގީއާ ބެހޭ އެއްވެސް ވާހަކައެއް ބަޔާންކޮށްފައި ނުވާ ކަމަށެވެ. ސިޔާމް ސިފަކުރި ގޮތުގައި އެ ބަޖެޓަކީ ތަފްސީލު ނެތް ބަޖެޓެކެވެ.
ސަން ކުންފުނީގެ ވެރިޔާ ސިޔާމް ވިދާޅުވީ ޑިމޮކްރަސީ އަދި ވިޔަފާރީގެ އެންމެ މޮޅު ގޮތަކީ ޓްރާންސްޕޭރެންޓުވުން ކަމަށްވާއިރު، ސަރުކާރުން ކުރާނެ ކަންކަމާއި އަދި ކުރިއަށް އޮތް ތަނުގައި ރާވާފައިވާ ކަންކަން ރައްޔިތުން އެނގެން ބޭނުންވާ ކަމަށެވެ. އަދި ވާނުވާ ނޭނގި ބަޖެޓަށް ބަހުސް ކުރެވޭނެ އެއްވެސް ގޮތެއް ވިސްނިވަޑައިނުގަންނަވާ ކަމަށް ސިޔާމް ވިދާޅުވި އެވެ.
އެއަށް ފަހު ވިދާޅުވީ ދުނިޔޭގެ އެހެން އެއްވެސް ގައުމެއްގައި އެފަދަ ބަޖެޓެއް ހުށަނާޅާނެ ކަމަށެވެ.
"ވިޔަފާރިއާ ވަރަށް ދުރު ވިސްނުމެއްގައި. އަދި ޑިމޮކްރަސީއާ ޓްރާންސްޕޭރެންސީއާ ވަރަށް ދުރު ވިސްނުމެއްގައި ހުށަހަޅުއްވާފައި އޮތް ބަޖެޓެއް ކަމަށް އަޅުގަނޑު މި ބަޖެޓް ދެކެން"
މިއަހަރު ފޮރިން މިނިސްޓްރީއަށް ދީފައިވާ ބަޖެޓްގެ 40 އިންސައްތަ އިތުރުކޮށް އަންނަ އަހަރުގެ ބަޖެޓްގައި ޖަހާފައިވާކަން ފާހަގަކުރައްވަމުން ސިޔާމް ވިދާޅުވީ ގައުމުތަކުގައި ހުންނަ އެމްބަސީތަކަށް އެތައް 100 މިލިއަން ރުފިޔާއެއް ހަރަދުކުރަމުންދާއިރު، އެކަމުން ލިބޭ ފައިދާއެއް ނެތް ކަމަށެވެ.
ވިދާޅުވީ އެމްބަސީތަކުން ރާއްޖޭގެ ޓެކްސްޕެއަރުންގެ ފައިސާ ހަރަދުކުރަމުންދާނީ 'ލަދުގެ ކަންފުޅެއް' ނެތި ކަމަށެވެ. އެހެންވެ ވިޔަފާރިވެރިޔާ ސިޔާމް ގޮވާލެއްވީ އެމްބަސީތަކަށް ކުރާ ހަރަދު 50 އިންސައްތަ ވަގުތުން ވަގުތަށް ކުޑަކުރުމަށެވެ.
ޑެފެސިޓް ބަޖެޓަކުން ކުންފުނިތަކަށް ސަބްސިޑީދީގެން ގައުމު ނުހިންގޭނެކަން ފާހަގަކުރައްވާ ސިޔާމް އެދިވަޑައިގެންނެވީ ލިބޭ ހުރިހާ ފައިސާއެއް "ޖަހަންނަމައަށް" ނޭޅުމަށެވެ.
ރައްޔިތުންގެ ހައްގުގައި އެ ބަޖެޓް އަނބުރާ ގެންދަން ސިޔާމް ހުށަހެޅުއްވި އެވެ.
"އެހެންނޫނީ އަޅުގަނޑުމެންނަށް ނޭނގި ހުރެ އެއްޗަކަށް ވޯޓު ދެވުނީމާ ގިޔާމަތް ދުވަހުންވެސް އެކަމުގެ އަދާބު އަޅުގަނޑުމެންނަށް الله ސުބުހާނަހޫ ވަތައާލާ ދެއްވާނެ. އަޅުގަނޑުމެން މިތިބީ މިތަނުގައި ހުވައެއް ކޮށްގެން الله ގަންދީ ހުވާކޮށްގެން ތިބި ބައެއް މީ. ވަކި ގޮތަކަށް ވާހަކަ ދައްކަން ތިބި ބައެއް ނޫން މީ ރައްޔިތުންނަށް ވާހަކަ ދައްކަން ޖެހޭނީ"
ބަޖެޓް ރަނގަޅު ކަމަށް ވިދާޅުވެ ސަރުކާރަށް ނިސްބަތްވެވަޑައިގަންނަވާ މެންބަރުން ދައްކަވަމުން ގެންދަވާ ވާހަކަތަކަށް ރައްދު ދެއްވައި ސިޔާމް ވިދާޅުވީ އެހެން ވިދާޅުވާން ހެޔޮނުވާނެ ކަމަށެވެ. ބަދަލުނުގެންނަނަމަ ބަޖެޓަށް ވޯޓު ދެއްވަން ދާއިރާގެ ރައްޔިތުން ބޭނުން ނުވާނެ ކަމަށް ވިދާޅުވި އެވެ.
