އަބްދުއްރަހީމް އެދިވަޑައިގެންނެވީ މެމްބަރުންނަކީ "ބޮޓުން" ކަމަށް ދޭހަވާ ގޮތަށް ވާހަކަ ނުދައްކަން
ރައްޔިތުންގެ މަޖިލިސް މެމްބަރުންނަކީ "ބޮޓުން" ކަމަށް ދޭހަވާ އިބާރާތުން މެމްބަރުންނާ ވާހަކަ ނުދެއްކެވުމަށް މަޖިލިހުގެ ރައީސް އަބްދުއްރަހީމް އަބްދުﷲ ވިދާޅުވެއްޖެ އެވެ.
އިޒްރޭލު ޕާސްޕޯޓްގައި ރާއްޖެ އެތެރެވުން މަނާކުރުމަށް ހުށަހަޅާފައިވާ ބިލު އަވަހަށް ފާސްކުރުމަށް ބާރު އަޅާ ސަރުކާރަށް ގޮވާލާ ގަލޮޅު އުތުރު ދާއިރާގެ މެމްބަރު މުހައްމަދު އިބްރާހީމް ހުށަހެޅުއްވި ގަރާރުގެ ބަހުސްގައި ވާހަކަ ދައްކަވަމުން ގަލޮޅު ދެކުނު ދާއިރާގެ އެމްޑީޕީ މެމްބަރު މީކާއީލު އަހްމަދު ނަސީމް ތުހުމަތު ކުރެއްވީ ސަރުކާރު ހިންގާ މައި ޕާޓީ، ކޮންގްރެސް ޕާޓީއަށް ނިސްބަތްވާ މެމްބަރުންނަށް ބިލާ ގުޅޭގޮތުން ކުރާ ބަހުސްގައި ބައިވެރިނުވުމަށް އަންގާފައިވާ ކަމަށެވެ. އާންމުންނަކީ މޮޔައިން ކަމަށް ދެކި އެގޮތަށް އަމަލު ކުރެވިގެން ނުވާނެ ކަމަށެވެ.
"ސިޔާސީ ގޮތުން މެމްބަރުން ކޮންޓްރޯލް ކުރެއްވުމުގެ ބޭނުމުގައި މި ރައްޔިތުންގެ މަޖިލިސް އޮޕަރޭޓް ކުރެވިގެންދާ މަންޒަރު އަޅުގަނޑުމެންނަށް މި ފެނިގެން ދަނީ. މިއީތޯ ސިޔާސީ ޕާޓީއެއްގެ ޕަޕެޓުންނަށް ވެގެން ބޮޓުންނަށް ވެގެން މިތާ އުޅުއްވަންތޯ މިއަދު ރައްޔިތުންގެ މަންދޫބުން އެދިލައްވަނީ؟،" މީކާއީލު ވިދާޅުވި އެވެ.
އޭނާގެ އެ ވާހަކަ ހުއްޓުވައި ރިޔާސަތުގައި އިންނެވި އަބްދުއްރަހީމް އެދިވަޑައިގެންނެވީ މެމްބަރުންނަށް "ބޮޓުން" ގެ ނަމުން މުހާތަބު ނުކުރެއްވުމަށެވެ. އެކަމަކީ މަޖިލިހުގެ މެމްބަރުންގެ އިއްޒަތާއި ކަރާމާތަށް އުނިކަން އަންނާނެ ކަމެއް ކަމުގައި ފާހަގަކުރެއްވި އެވެ.
"މަޖިލީހުގެ މެމްބަރުންނަކީ ބޮޓުން ކަމަށް ދޭހަވާ އިބާރާތުން ވާހަކަ ދެއްކުމަކީ މެމްބަރުންގެ ގަދަރާއި އިއްޒަތަށް އުނިކަން އަންނާނެ ކަމެއް ކަމުގައި ދަންނަވަން،" އަބްދުއްރަހީމް ވިދާޅުވި އެވެ.
ވަޒީރުންގެ މަޖިލިހުގެ މަޝްވަރާ އާއި ލަފާގެ މަތިން އިޒްރޭލް ޕާސްޕޯޓުގައި ރާއްޖެއަށް ނުވަދެވޭ ގޮތަށް އިމިގްރޭޝަން ގާނޫނަށް ގެންނަން ޖެހޭ ބަދަލުތައް ގެނައުމަށް ރައީސް ޑރ. މުހައްމަދު މުއިއްޒު ނިންމަވާފައި ވަނީ މިދިޔަ ޖޫން މަހުގެ ދެ ވަނަ ދުވަހު އެވެ.
އެގޮތަށް ނިންމިއިރު، އިޒުރޭލު ޕާސްޕޯޓު މަނާކުރުމާ ގުޅޭގޮތުން ގަލޮޅު ދެކުނު ދާއިރާގެ އެމްޑީޕީގެ މެމްބަރު މީކާއީލް އަހުމަދު ނަސީމް ހުށަހެޅުއްވި ބިލު ބަލައިގަނެ، 241 ކޮމިޓީއަށް ވަނީ ފޮނުވާފަ އެވެ. އެހެންކަމުން ސަރުކާރުންނާއި ވެރިކަން ކުރާ މައި ޕާޓީ ޕީޕަލްސް ނޭޝަނަލް ކޮންގްރެސް، ކޮންގްރެސް ޕާޓީން ނިންމީ މީކާއީލް ހުށަހެޅުއްވި ބިލާ އެކު ކުރިއަށް ދިއުމަށެވެ.
މީގެ ފަސް މަސް ދުވަސް ކުރިން، މިދިޔަ ޖޫން މަހުގެ ކުރީކޮޅު މީކާއީލް ހުށަހެޅުއްވި ބިލުގެ މަސައްކަތް މި މަހުގެ 12 ވަނަ ދުވަހު ބޭއްވި 241 ކޮމިޓީގެ ބައްދަލުވުމަށް އެޖެންޑާކުރި އެވެ. ނަމަވެސް އެ ދުވަހު ކޮމިޓީން ނިންމާފައި ވަނީ އަންނަ އަހަރުގެ ފެބްރުއަރީ މަހުގެ ނިޔަލަށް އެ މަސައްކަތް ނިންމުމަށެވެ.
Ads by STO
