ގައުމީ ތަރައްގީގެ ޕްލޭން އެކުލަވާލުމުގެ ބާރު ރައީސަށް ދޭން މުޅި މަޖިލިސް ކޮމިޓީން ފާސްކޮށްފި
ގައުމީ ތަރައްގީގެ ޕްލޭން އެކުލަވާލުމުގެ ބާރު ރައީސުލްޖުމްހޫރިއްޔާއަށް ލިބިވަޑައިގަންނަވާ ގޮތަށް ގާނޫނު އަސާސީއަށް އިސްލާހުތަކެއް ގެންނަން ހުށަހެޅި ބިލު މުޅި މަޖިލިސް ކޮމިޓީން ފާސްކޮށްފި އެވެ.
އެ ބިލު ކޮމިޓީން ފާސްކޮށްފައިވަނީ 75 މެންބަރުންގެ ވޯޓުންނެވެ. ބިލު ބަލައިނުގަތުމަށް ވޯޓު ދެއްވީ 13 މެންބަރުންނެވެ.
ހުޅުދޫ ދާއިރާގެ ޕީއެންސީ މެންބަރު މުހައްމަދު ޝާހިދު (ޝާޑު) ގާނޫނު އަސާސީއަށް ހުށަހަޅުއްވާ އިސްލާހުގެ ތެރޭގައި ރައީސުލްޖުމްހޫރިއްޔާގެ ބާރުތައް ބަޔާންކުރާ މާއްދާއަށް ބައެއް އިތުރުކުރުން ހިމެނެ އެވެ.
ގާނޫނު އަސާސީގެ 115 ވަނަ މާއްދާގައި ބ. ގައިވާ ގޮތުން ރައީސުލްޖުމްހޫރިއްޔާގެ ބާރުތަކާއި މަސްއޫލިއްޔަތުތަކުގެ ތެރޭގައި ހިމެނެނީ ދައުލަތުގެ މައިގަނޑު ސިޔާސަތުތައް ކަނޑައަޅައި އެ ސިޔާސަތުތައް ސަރުކާރުގެ ކަމާ ގުޅޭ އިދާރާތަކަށާއި މުއައްސަސާތަކަށް އެންގުމާ އަދި އެ ތަންތަނަށް ބޭނުންވާ އިރުޝާދު ދިނުމެވެ.
ޝާޑު ހުށަހެޅުއްވި ބިލުގައި އިތުރަށް ލިޔެފައި ވަނީ ކުރު ރާސްތާއަށާއި މެދު ރާސްތައަށާ އަދި ދުރު ރާސްތާއަށް އަމާޒުކޮށް ގައުމީ ތަރައްގީގެ ޕްލޭންތަކާއި ތަސައްވަރުތައް އެކަށައެޅުމެވެ.
މިއަދުގެ ޖަލްސާއަށް ތައާރަފުކުރި އެ ބިލުގެ ބަހުސް ނިންމާލިއިރު، ބަހުސްގައި ބައިވެރިވެ ވަޑައިގެންނެވީ 13 މެންބަރުންނެވެ. ބިލުގެ ބަހުސްއަށް އިދިކޮޅު އެމްޑީޕީއަށް ދިން ވަގުތު ހަމަވިއިރު، އެ ޕާޓީން ބަހުސްގައި ބައިވެރިވެ ވަޑައިގެންނެވީ 7 މެންބަރެކެވެ. ދެން އެ ބިލުގެ ބަހުސްގައި ބައިވެރިވެ ވަޑައިގެންނެވީ ޕީއެންސީގެ 5 މެންބަރުންނާ އަދި އަމިއްލަ މެންބަރެކެވެ.
އެ ބިލުގެ ބަހުސް ނިންމާ 15 މިނެޓު ފަހުން މުޅި މަޖިލިސް ކޮމިޓީގެ މަސައްކަތް ފެށިއިރު، ކޮމިޓީ މަރުހަލާގައި އިސްލާހަށް ހުށަހެޅުމެއް ލިބިފައެއް ނުވެ އެވެ.
މި ބާރުތައް ރައީސްއަށް ދޭ ގޮތަށް ގާނޫނު އަސާސީ އިސްލާހުކުރަން ހުށަހަޅާފައި މިވަނީ ސަރުކާރުގެ ފަރާތުން ހުށަހެޅި އާބަަން ޑިވޮލޮޕްމެންޓް ބިލުގައި ރަށްރަށުގެ ޕްލޭންތައް ސަރުކާރަށް ނިންމޭ ގޮތަށް އޮވެގެން ބައެއް ކައުންސިލަރުން ކަންބޮޑުވުން ފާޅުކުރަމުން ދަނިކޮށެވެ.
