ގާނޫނީ އަސާސީއަށް ގެންނަ ބަދަލާ ގުޅިގެން މައި ދެ ޕާޓީގެ މުޒާހަރާއެއް
ގާނޫނީ އަސާސީއަށް ގެންނަ ބަދަލާ ގުޅިގެން ވެރިކަން ކުރާ މައި ޕާޓީ، ކޮންގްރެސް ޕާޓީންނާއި އިދިކޮޅު މައި ޕާޓީ އެމްޑީޕީން މުޒާހަރާކޮށްފި އެވެ.
އެމްޑީޕީން މުޒާހަރާކުރާ ސަބަބެއް ކަމުގައި ބުނީ ރައްޔިތުންނާ އެއްވެސް މަޝްވަރާއެއް ކުރުމަކާ ނުލައި ކުއްލި ގޮތަކަށް ސަރުކާރުން ގާނޫނު އަސާސީ ބަދަލުކުރާތީ ކަމަށެވެ.
ރައްޔިތުންގެ މަޖިލިސް ކައިރީގައި މުޒާހަރާ ކުރިއިރު، މުޒާހަރާގެ ބައިވެރިން ހުއްޓުވައި އެ ސަރަަހައްދުން ދުރަށް ޖެއްސުމުގެ މަސައްކަތް ފުލުހުން ވަނީ ކޮށްފަ އެވެ.
އެމްޑީޕީގެ މުޒާހަރާގައި ބައިވެރިވި މީހުން ވަނީ މަޖިލިސް މެންބަރުން ކަސްތަޅު ނޭޅުވުމަށާއި، ރައްޔިތުންގެ މަންދޫބުންނަށް ބިރު ނުދެއްކުން ފަދަ ކަންކަމާ ގުޅިގެން އަޑުއުފުލާފަ އެވެ.
މުޒާހަރާ ހޫނުވެފައިވަނިކޮށް ސަރުކާރުގެ ސިޔާސީ މަގާމުތަކުގައި ތިބި މީހުންނާއި ޕާޓީގެ އެކްޓިވިސްޓުން ވެސް ވަނީ އެ ސަރަހައްދަށް އެއްވެފަ އެވެ. ސަރުކާރަށް ތާއީދުކުރާ ފަރާތްތަކުން ބުނީ އެމްޑީޕީ މީހުންނަކީ ދެ އަނގައިން ވާހަކަ ދައްކާ ބައެއް ކަމަށެވެ.
އެމްޑީޕީ ސަޕޯޓަރުންނާއި ކޮންގްރެސް ޕާޓީގެ ސިޔާސީ މުވައްޒަފުންގެ މެދުގައި ބަހުގެ ހަމަލާތައް ރައްދުކުރި ނަމަވެސް އެއްވެސް ކަހަލަ ހަމަނުޖެހުމެއް ހިނގާފައެއް ނުވެ އެވެ.
މަޖިލީހަށް މިހާރު ހުށަހަޅާފައިވާ ބިލުގައި ގާނޫނު އަސާސީއަށް މައިގަނޑު 4 އިސްލާހު ގެނައުމަށް ވަނީ ހުށަހަޅާފަ އެވެ. އޭގެ ތެރޭގައި ތަރައްގީ ޕްލޭންގެ ބާރު ރައީސަށް ދިނުމާއި ރާއްޖޭގެ ކަނޑުގެ ސަރަހަދުތަކަށް ބަދަލު ގެނައުމަށް މަޖިލީހުގެ އަގުލަބިއްޔަތު ހޯދަން ޖެހޭ ގޮތަށާއި މަޖިލިސް މެންބަރުން އިންތިހާބުވި ހައިސިއްޔަތު ބަދަލުވުމުން ގޮނޑި ގެއްލޭ ގޮތަށް ގާނޫނު އިސްލާހު ކުރުން ހިމެނެ އެވެ.
މި ބިލުގެ މަސައްކަތް މިއަދުން މިއަދަށް ނިންމާލަން އަމާޒު ހިފާފައިވާއިރު، މި ބިލު ހުށަހަޅާފައިވަނީ ސަރުކާރުގެ ފަރާތުން ހުޅުދޫ ދާއިރާގެ ކޮންގްރެސް ޕާޓީގެ މެންބަރު މުހައްމަދު ޝާހިދު (ޝާާޑު) އެވެ.
