ހިޔާލު ހޯދުމުގެ މާއްދާ އިސްލާހުކުރެވޭނީ ރައްޔިތުންގެ ހިޔާލުން ކަމަށް ކޮމިޓީން ނިންމައިފި
ރައްޔިތުންގެ ހިޔާލު ހޯދުމުގެ މާއްދާ އިސްލާހުކުރެވޭނީ ރައްޔިތުންގެ ހިޔާލުން ކަމަށް ރައްޔިތުންގެ މަޖިލީހުގެ މުޅި މަޖިލީސް ކޮމިޓީން ފާސްކޮށްފި އެވެ.
އެ މާއްދާއަށް ކޮމިޓީ މަރުހަލާގައި ހުށަހެޅި އިސްލާހަކާ އެކު މުޅި އިސްލާހު ބަލައިގެންފައިވަނީ 75 މެންބަރުންގެ ވޯޓުންނެވެ. އަދި ބިލް ބަލައި ނުގަތުމަށް 13 މެންބަރުން ވޯޓު ދެއްވި އެވެ.
ގާނޫނުއަސާސީގެ 2 ވަނަ ބާބުގައި ހިމެނޭ ހައްގުތަކާއި މިނިވަންކަމުގެ ބާބާއި ރިޔާސީ އަދި މަޖިލިސް މެންބަރުންގެ ދައުރު ހިމެނޭ ގާނޫނުއަސާސީގެ މާއްދާތަކަށް އިސްލާހު ގެންނަން ރައްޔިތުންގެ ހިޔާލު ހޯދުމުގެ ވޯޓަކަށް ދާން ބުނާ މާއްދާ އިސްލާހު ކުރަން ރައްޔިތުންގެ ހިޔާލު ހޯދަން ޖެހޭ ގޮތަށް ގާނޫނުއަސާސީ އިސްލާހު ހުށަހެޅުއްވީ ހުޅުދޫ ދާއިރާގެ މެންބަރު މުހައްމަދު ޝާހިދެވެ.
މިއަދުގެ ޖަލްސާއަށް ތައާރަފްކުރި އެ ބިލްގެ ބަހުސް ނިންމާލިއިރު ބަހުސްގައި ބައިވެރިވެވަޑައިގެންނެވީ 13 މެންބަރުންނެވެ. ބިލުގެ ބަހުސްއަށް އިދިކޮޅު އެމްޑީޕީއަށް ދިން ވަގުތު ހަމަވެފައިވާއިރު އެ ޕާޓީއިން ބަހުސްގައި ބައިވެރިވެވަޑައިގެންނެވީ 7 މެންބަރެކެވެ. ދެން އެ ބިލްގެ ބަހުސްގައި ބައިވެރިވެވަޑައިގެންނެވި ޕީއެންސީގެ 5 މެންބަރުންނާއި އަމިއްލަ މެންބަރެވެ.
ޝާހިދު ހުށަހެޅުއްވި ބިލްގެ 5 އިސްލާހުގައިވަނީ ގާނޫނުއަސާސީގެ 262 ވަނަ މާއްދާގެ (ށ) ގެ 3 ގެ ފަހަތައް ނަންބަރެއް އިތުރުކުރުމަށެވެ. އޭގެ 15 މިނެޓް ފަހުން އެ ބިލްގެ ކޮމިޓީގެ މަސައްކަތް ފެއްޓެވި އެވެ.
ކޮމިޓީ މަރުހަލާގައި ބާރަށު ދާއިރާގެ މެންބަރު އިބްރާހިމް ޝުޖާއު ހުށަހެޅުއްވީ ރައްޔިތުންގެ ހިޔާލު ހޯދުމުގެ މާއްދާއަށް ދިވެހި ރާއްޖޭގެ ސަރަަހައްދު ހިމެނުމަށެވެ. އެ އިސްލާހަށް ވިލިމާލެ ދާއިރާގެ މެންބަރު މުހައްމަދު އިސްމާއިލް ތާއީދުކުރެއްވި އެވެ. އިސްލާހު ބަލައިގެންފައިވަނީ 78 މެންބަރުންގެ ވޯޓުންނެވެ. ނުފެންނަ ކަމަށް 6 މެންބަރުން ވޯޓު ދެއްވިއިރު ވަކި ގޮތަކަށް ވޯޓު ދެއްވަން ބޭނުންނުވާ ދެ މެންބަރަކު ހިމެނެ އެވެ.
