ގަވާއިދާ ހިލާފަށް ތިލަފުށީގެ ފަޅުގައި އަޅާފައިވާ އުޅަނދުތައް ނަގަން އަންގައިފި
ގަވައިދާ ހިލާފަށް ކ. ތިލަފުށީގެ ފަޅުގައި އަޅާފައިވާ އުޅަނދުތައް ނަގަން އަންގައިފި އެވެ.
ހައުސިން ޑިވޮލޮޕްމަންޓް ކޯޕަރޭޝަން (އެޗްޑީސީ) އިން މިއަދު ކުރި އިއުލާނެއްގައި ބުނީ ތިލަފުށީގެ ފަޅުތެރެ ސަރަހައްްދުގައި ގަވާއިދާ ހިލާފަށް އަޅާފައިވާ އުޅަނދުތައް ނަގައި އެ ސަރަހައްދު ސާފުކުރުމުގެ މަސައްކަތް މިހާރު ކުރަމުންދާ ކަމަށެވެ.
އެހެންކަމުން އެ ސަރަހައްދުގައި އަޅާފައިވާ އުޅަނދުތަކުގެ ތެރެއިން އެއްވެސް އުޅަނދެއްގެ ވެރިފަރާތެއް ވާނަމަ ތިލަފުށީގެ އޮޕަރޭޝަންސް ޑިޕާޓްމަންޓް (9398888) އަށް ގުޅައި މައުލޫމާތު ސާފުކުރުމަށް ފަހު، 15 ދުވަހުގެ ތެރޭގައި އެ އުޅަނދުތައް ނެގުމަށް ވަނީ އިލްތިމާސްކޮށްފަ އެވެ.
އަދި އެ މުއްދަތުގެ ތެރޭގައި އެ އުޅަނދުތައް ނުނަގައިފި ނަމަ، އެއީ ވެރިފަރާތުން ބޭނުން ނެތިގެން ދޫކޮށްލާފައިވާ އުޅަނދުތަކެއް ކަމަށް ބަލައި އެޗްޑީސީން ކަނޑައަޅާ ގޮތެއްގެ މަތިން އެ އުޅަނދުތަކާ މެދު ގޮތެއް ނިންމާނެ ކަމަށް ވެސް ބުނެފައިވެ އެވެ.
މީގެކުރިން ވެސް އެކި ކަންކަމާ ގުޅިގެން ހުޅުމާލޭގެ ފަޅުތެރޭގައި އަޅާފައި ހުންނަ އުޅަނދުތައް ވެސް ނެގުމަށް އެ ކޯޕަރޭޝަނުން އިލްތިމާސްކޮށްފައިވެ އެވެ.
