އޭޑީކޭ ހޮސްޕިޓަލުގެ ނަމުގައި ސްކޭމް މެސެޖުތަކެއް، ސަމާލުވޭ
އޭޑީކޭ ހޮސްޕިޓަލުގެ ނަމުގައި ސްކޭމް މެސެޖުތަކެއް ފޮނުވަމުންދާތީ، ސަމާލުވުމަށް އެ ހޮސްޕިޓަލުން އިލްތިމާސްކޮށްފި އެވެ.
މިއަދު "އެކްސް" ގައި އޭޑީކޭއިން ކުރި ޕޯސްޓެއްގައި ބުނީ، އެ ހޮސްޕިޓަލުގެ ރަސްމީ އެސްއެމްއެސް ހޭންޑަލް މެދުވެރިކޮށް ސްކޭމް މެސެޖުތަކެއް ފޮނުވަމުންދާ ކަމަށެވެ. އަދި އެ މެސެޖުގައިވާ ލިންކަށް ނުފިތުމަށާއި އެ މެސެޖަށް ޖަވާބު ދިނުމުގެ ގޮތުން އެއްވެސް ޒާތީ މައުލޫމާތެއް ހިއްސާ ނުކުރުމަށް އެ ހޮސްޕިޓަލުން އެދިފައިވެ އެވެ.
އާންމުން "އެކްސް" ގައި ހިއްސާކޮށްފައިވާ މެސެޖުތަކުގެ ސްކްރީންޝޮޓްތަކުން ފެންނަ ގޮތުން އެ މެސެޖު ކޮށްފައިވަނީ އޭޑީކޭގެ ހޭންޑަލްއިން ނަމަވެސް، މެސެޖުގައި ބުނެފައިވަނީ އެއީ ޕޯސްޓް މެސެޖެއް ކަމަށެވެ.
ޕޯސްޓް ޕެކޭޖް ފޮނުވިފައި ނުވަނީ ފައިސާއެއް ނުދައްކާ ހުރުމުން ކަމަށް ބުނެ، އެ މެސެޖުގައިވާ ލިންކަށް ފިއްތައިގެން ފައިސާ ދެއްކުމަށް އެ މެސެޖުގައި ބުނެފައިވެ އެވެ.
އޭޑީކޭއިން ބުނީ އެފަދަ މެސެޖުތަކަކީ، މީހުންގެ ޒާތީ މައުލޫމާތު ހޯދަން ކުރަމުންދާ މެސެޖުތަކެއް ކަމަށެވެ. އަދި އެ ހޮސްޕިޓަލުގެ ރަސްމީ އެސްއެމްއެސް ހޭންޑަލް މެދުވެރިކޮށް އެ މެސެޖުތައް ފޮނުވަމުންދާތީ، އެކަން ހައްލުކުރުމުގެ މަސައްކަތް ކުރަމުންދާ ކަމަށް ވެސް އޭޑީކޭއިން ބުނެފައިވެ އެވެ.
ރަސްމީ އިދާރާތަކުގެ ނަމުގަ އާއި އެހެނިހެން ގޮތްގޮތުން މެސެޖު ކޮށްގެން ޒާތީ މައުލޫމާތު ހޯދުމާއި މަކަރާއި ހީލަތުގެ މައްސަލަތައް ދަނީ ދުވަހެއް ދުވަހަކަށް އިތުރުވަމުންނެވެ.
ސްކޭމް މެސެޖުތަކުގެ މައްސަލަތައް އިތުރުވަމުންދާތީ ފުލުހުން ވެސް ވަނީ ތަކުރާރުކޮށް އެކަމަށް ސަމާލުވުމަށް އިލްތިމާސްކޮށްފަ އެވެ.
Ads by STO
