އީސީގެ ރައީސް ފުއާދުގެ ދައުރު ނިމިއްޖެ
އިލެކްޝަންސް ކޮމިޝަން (އީސީ) ގެ ރައީސް ފުއާދު ތައުފީގުގެ ދައުރު މިއަދު ނިމިއްޖެ އެވެ.
ދެވަނަ ދައުރަކަށް، އީސީގެ ރައީސް ކަމަށް ފުއަދާ އައްޔަންކުރެއްވީ 2021 ވަނަ އަހަރުގެ ސެޕްޓެމްބަރު މަހުގެ 15 ވަނަ ދުވަހު އެވެ. ކޮމިޝަންގެ ރައީސަކަށް އައްޔަން ކުރެއްވި އިރުވެސް، ފުއާދަކީ އެ ކޮމިޝަންގެ މެމްބަރެކެވެ.
މަލްޓި-ޕާޓީ ޑިމޮކްރެސީގެ ފެހި ގާނޫނު އަސާސީއާ އެކީ އީސީގެ ފުރަތަމަ މެންބަރުންގެ ބެންޗުގައި ހިމެނުނު ފުއާދު އެންމެ ފުރަތަމަ އެ ކޮމިޝަންގެ ރައީސަކަށް އައްޔަން ކުރެއްވީ 2009 ވަނަ އަހަރުގެ ސެޕްޓެމްބަރު 15 ވަނަ ދުވަހު އެވެ. އެއީ އިންތިގާލީ މަރުހަލާގެ ތެރޭގަ އެވެ.
2008 ވަނަ އަހަރުގެ ރިޔާސީ އިންތިހާބު، 2009 ވަނަ އަހަރުގެ މަޖިލިސް އިންތިހާބު، 2011 ވަނަ އަހަރުގެ ކައުންސިލް އިންތިހާބު، އަދި 2013 ގެ ރިޔާސީ އިންތިހާބުގައި އޭނާ ކޮމިޝަނުގައި މަސައްކަތް ކުރެއްވި އެވެ. 2013 ގެ ރިޔާސީ އިންތިހާބުގައި ފުއާދަކީ ކޮމިޝަނުގެ ރައީސެވެ.
ގިނަ ދުވަސްތަކެއް ވަންދެން ކޮމިޝަނަށް ހިދުމަތް ކޮށްދެއްވާފައިވާ ފުއާދު ގަބޫލުކުރައްވާ ގޮތުގައި އޭނާއަށް ރަނގަޅު މަސައްކަތްތަކެއް ކޮށްދެވުނެވެ.
"ދެން" އަށް މައުލޫމާތު ދެއްވަމުން ފުއާދު ވިދާޅުވީ، އިންތިހާބުތައް ކާމިޔާބުކަމާއެކު ކުރިއަށް ގެންދެވި، އީސީ އަކީ އާންމުންގެ މެދުގައި އަގުހުރި ތަނަކަށް ހެދުމަށް ކުރި މަސައްކަތް ކާމިޔާބުވި ކަމަށް ގަބޫލުކުރައްވާ ކަމަށެވެ.
ފުއާދު ފާހަގަކުރެއްވި ގޮތުގައި މިހާތަނަށް ކުރެވުނު އެންމެ ހިތްހަމަ ޖެހޭ މަސައްކަތަކީ ނިމިދިޔަ ރިޔާސީ އިންތިހާބާއި، މަޖިލިސް އިންތިހާބުގެ މަސައްކަތެވެ. "އެ އިންތިހާބުތަކުގައި ޝަކުވާއެކޭ ބުނާ ކަހަލަ ޝަކުވާއެއް ހުށަހެޅިފައެއް ނުވޭ،" ފުއާދު ވިދާޅުވި އެވެ.
ފުއާދުގެ ދައުރުގައި އީސީއަށް ބޮޑެތި ބަދަލުތަކެއް ގެނަ އެވެ. އެގޮތުން އޭނާ ފާހަގަކުރެއްވި ގޮތުގައި ތިމާވެއްޓާއި ރައްޓެހި ގޮތަކަށް މަސައްކަތް ބިނާކުރެވުނެވެ. ކަރުދާސް މަދުކޮށް، ކޮމިޝަނުގެ މަސައްކަތް ޑިޖިޓަލައިޒް ކުރެވުނެވެ.
"ވޯޓާސް ލިސްޓަކީ ވެސް ކާމިޔާބު ކަމެއް. އެއީ ފުރިހަމަ ލިސްޓަކަށް ހެދިފައި މިހާރު ވާނީ. ޖުމުލަކޮށް ދަންނަވާނަމަ، މިހާރު އޮތް ހާލަތަށް ކޮމިޝަން ގެނެވުމަކީ ލިބުނު ކާމިޔާބީއެއް،" ފުއާދު ވިދާޅުވި އެވެ.
އިންތިހާބުތަކުގެ ރީރެޖިސްޓްރޭޝަން މަރުހަލާގައި ވެސް އާންމުންނަށް ފޯމު ފުރާ ހުށަހަޅަންޖެހުން ނިމުމަކަށް ގެނެސް، ގޭގައި ތިބެގެން ރީރެޖިސްޓާ ކުރުމުގެ ފުރުސަތު ފަހިވެގެންދިޔަ އެވެ. ފުއާދު ވިދާޅުވީ، މީގެކުރިން ފޯމު ފުރައިގެން ރީރެޖިސްޓާ ވަމުންދިޔަ ދުވަސްވަރު އެކަމާއި ގުޅިގެން ޝަކުވާތައް ކޮމިޝަނަށް ހުށަހެޅެމުން ދިޔަ ކަމަށެވެ. ބައެއް ފަހަރު މީހުންގެ ނަމުގައި ނޭންގި ވެސް ރީރެޖިސްޓާ ކުރުން ފަދަ ކަންކަން ދިމާވެ، ޝަކުވާ ހުށަހެޅިފައިވާކަން ފާހަގަކުރެއްވި އެވެ.
ފުއާދުގެ ދައުރު ހަމަވެފައިވާއިރު، ތައިލެންޑް އެމްބަސީގެ އެމްބެސެޑަރުގެ މަގާމަށް ފުއާދު އައްޔަން ކުރަން އުޅޭ ކަމުގެ އަޑުތަކެއް ފެތުރިފައިވެ އެވެ. ނަމަވެސް، އެކަން އަދި މިހާތަނަށް ޔަގީން ކުރެވިފައެއް ނުވެ އެވެ.
Ads by STO
