ދެ މިލިއަން ފަތުރުވެރިން ހަމަވާނީ ޑިސެމްބަރު ފަހުކޮޅު

މިއަހަރު ދެ މިލިއަން ފަތުރުވެރިން ރާއްޖެ ޒިޔާރަތް ކުރާނެ ކަމަށް ޓޫރިޒަމް މިނިސްޓްރީން ކަނޑައެޅި ޓާގެޓް އަންނަ މަހު ފަހުކޮޅު ހާސިލުވާނެ ކަމަށް ޓޫރިޒަމް މިނިސްޓަރު އިބްރާހިމް ފައިސަލް ވިދާޅުވެއްޖެ އެވެ.
މި ސަރުކާރަށް އަހަރެއް ފުރުމާ ގުޅިގެން ދައުލަތުގެ މީޑިއާ، ޕީއެސްއެމްގެ 'ހަފްތާ 52' ގެ ކަވަރޭޖަށް ދެއްވި އިންޓަވިއުގައި ފަތުރުވެރިކަމުގެ ތަފާސް ހިސާބުތައް ފައިސަލް ހިއްސާކުރެއްވި އެވެ.
ފައިސަލް ވިދާޅުވީ އަހަރުގެ މިހާތަނަށް 17 ލައްކައަށްވުރެ ގިނަ ފަތުރުވެރިން ރާއްޖެ ޒިޔާރަތްކޮށްފައިވާ ކަމަށެވެ. އެއަށް ފަހު މިނިސްޓަރު ވިދާޅުވީ ދެވަނަ މިލިއަން ފަތުރުވެރިޔާ ރާއްޖެ އަންނާނީ ޑިސެމްބަރު މަހު ފަހުކޮޅު ކަމަށެވެ.
"އަޅުގަނޑަށް ވަރަށް ޔަގީންކަން އެބަ އޮތް الله ގެ ހެޔޮ ރަހުމަތްފުޅާއެކީގައި ޑިސެންބަރު 26 ވަނަ ދުވަހު ދިވެހިރާއްޖެއަށް 2 މިލިއަން ވަނަ ފަތުރުވެރިޔާ ޒިޔާރަތްކުރާނެ ކަން"ފައިސަލް އަންދާޒާ ކުރައްވާ ގޮތުގައި މިއަހަރު ތެރޭގައި ދެ މިލިއަނަށް ވުރެ ގިނަ ފަތުރުވެރިން ރާއްޖެ އަންނާނެ އެވެ. މި ދުވަސްވަރަކީ ސީޒަން ދުވަސްވަރަށްވާތީ ފަތުރުވެރިން ޒިޔާރަތްކުރާ އަދަދުވެސް އިތުރެވެ. ފައިސަލް ވިދާޅުވީ ސީޒަންއާ ދިމާކޮށް ބައެއް ދުވަސް ދުވަހު 8000 ނުވަތަ 10,000 ފަތުރުވެރިން ރާއްޖެ ޒިޔާރަތްކުރާ ކަމަށެވެ. މި އަހަރުގެ މިހާތަނަށް އެއް ދުވަހާ ރާއްޖެ އެންމެ ގިނަ ފަތުރުވެރިން އައި ފެބްރުއަރީ މަހުގަ އެވެ. އެ ދުވަހު 10,000 އަށް ވުރެ ގިނަ ފަތުރުވެރިން ޒިޔާރަތްކޮށްފައިވެ އެވެ. ފައިސަލް ވިދާޅުވީ ތާރީހުގައި އެއް މަހެއްގައި އެންމެ ގިނަ ފަތުރުވެރިން ރާއްޖެ ޒިޔާރަތްކުރީ ފެބްރުއަރީގައި ކަމަށެވެ. ފެބްރުއަރީ ގައި 218,000 ފަތުރުވެރިން ރާއްޖެ ޒިޔާރަތްކުރި އެވެ. މި އަހަރު އެއް މިލިއަން ފަތުރުވެރިން ހަމަކުރީ އެހެން އަހަރުތަކާ އަޅައިބަލާއިރު އެއް މަސް ކުރިންނެވެ. އެއް މިލިއަން ވަނަ ފަތުރުވެރިޔާ ރާއްޖެ އައީ ޖޫން މަހު އެވެ. ވިދި ވިދިގެން ވޭތުވެދިޔަ 4 އަހަރު ވޯލްޑް ލީޑިން ޑެސްޓިނޭޝަންގެ މަގާމު ރާއްޖެއަށް ލިބުނުކަން ފާހަގަކުރައްވަމުން ފައިސަލް ވިދާޅުވީ 5 ވަނަ ފަހަރަށް އެ އެވޯޑަށް ރާއްޖެ ނޮމިނޭޓްވެފައި ކަމަށެވެ. އަނެއްކާވެސް އެ މަގާމު ދިފާއުކުރެވޭނެ ކަމުގެ ޔަގީންކަން އެބައޮތް ކަމަށް ވިދާޅުވި އެވެ. އެ ޕްރޮގްރާމްގައި ފައިސަލް ވިދާޅުވީ ގޮންޖެހުންތައް ހުރި ނަމަވެސް ޓޫރިޒަމް އިންޑަސްޓްރީގެ ކަމާބެހޭ ފަރާތްތަކުގެ އަޑުއަހައިގެން ކަންކަން ރާވަމުންދާ ކަމަށެވެ. ފައިސަލް ވިދާޅުވީ އަންނަ އަހަރަކީ ރާއްޖޭގެ ފަތުރުވެރިކަމަށް ވަރަށް ފާގަތި އަހަރަކަށްވެގެންދާނެ ކަމަށެވެ. އަންނަ އަހަރަށް ލަފާކުރާ ދައުލަތުގެ ބަޖެޓްގައި ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ކަމުގައި 2.2 މިލިއަން ކަނޑައަޅާފައި ވީނަމަވެސް އެ އަދަދު 2.4 މިލިއަނަށް ބަދަލުކުރަން ރާއްޖެ އިޝްތިހާރުކުރާ މޯލްޑިވްސް މާކެޓިން އެންޑް ޕަބްލިކް ރިލޭޝަންސް ކޯޕަރޭޝަން (އެމްއެމްޕީއާރްސީ) އިން މަސައްކަތްކުރަމުންދާ ކަމަށް ފައިސަލް ވިދާޅުވި އެވެ.



ކޮމެންޓް
މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.