ތައިލެންޑުގެ ސަފީރު ކަމަށް ފުއާދު އައްޔަންކުރަނީ
ތައިލެންޑުގެ ސަފީރު ކަމަށް ފުއާދު ތައުފީގު އައްޔަންކުރުމާ ގުޅޭ މައްސަލަ ދިރާސާކުރުމަށް ހާރިޖީ ގުޅުންތަކުގެ ކޮމިޓީއަށް ފޮނުވައިފި އެވެ.
ރައްޔިތުންގެ މަޖިލީހުގެ މިއަދުގެ ޖަލްސާގައި އިދާރީ މޭޒުން ވަނީ ރައީސް ޑރ. މުހައްމަދު މުއިއްޒު, މަޖިލީހުގެ ރައީސް އަބްދުއްރަހީމް އަބްދުالله އަށް ފޮނުއްވި ސިޓީފުޅު އިއްވައިދެއްވާފަ އެވެ. އެ ކަމާ ގުޅޭގޮތުން ދިރާސާ ކުރުމަށްފަހު މަޖިލީހަށް ފެންނަ ގޮތެއް އަންގަވައިދެއްވުމަށް ސިޓީފުޅުގައި ރައީސް އެދިވަޑައިގެންފައިވެ އެވެ.
ތައިލެންޑުގެ ސަފީރު ކަމަށް އައްޔަންކުރަން ފުއާދުގެ ނަން ފޮނުއްވިއިރު، އެންމެފަހުން އޭނާ ފުރުއްވަމުން ގެންދެވި އިލެކްޝަންސް ކޮމިޝަން (އީސީ) ގެ ރައީސް ކަމުގެ މަގާމުގެ މުއްދަތު ހަމަވެފައިވަނީ މިދިޔަ ހޮނިހިރު ދުވަހެވެ.
ފުއާދު އީސީގައި މަސައްކަތް ކުރައްވަން ފެއްޓެވީ 2008 ވަނަ އަހަރުގަ އެވެ. އެ ކޮމިޝަންގެ ރައީސްކަމުގެ މަގާމާ އޭނާ ހަވާލުވެވަޑައިގެންނެވީ 2009 ވަނަ އަހަރުގެ ސެޕްޓެމްބަރު 15 ވަނަ ދުވަހު އެވެ. އެއީ އިންތިގާލީ މަރުހަލާގެ ތެރޭގަ އެވެ.
ދެވަނަ ދައުރަކަށް، އީސީގެ ރައީސް ކަމަށް ފުއާދު އައްޔަންކުރެއްވީ 2021 ވަނަ އަހަރުގެ ސެޕްޓެމްބަރު މަހުގެ 15 ވަނަ ދުވަހު އެވެ. ކޮމިޝަނުގެ ރައީސަކަށް އައްޔަން ކުރެއްވިއިރު ވެސް، ފުއާދަކީ އެ ކޮމިޝަނުގެ މެންބަރެކެވެ.
އާ ގާނޫނު އަސާސީގެ ދަށުން 2008 ވަނަ އަހަރުގެ ބޭއްވި ފުރަތަމަ ރިޔާސީ އިންތިހާބާއި 2009 ވަނަ އަހަރުގެ މަޖިލިސް އިންތިހާބާއި 2011 ވަނަ އަހަރުގެ ކައުންސިލް އިންތިހާބާއި 2013 ވަނަ އަހަރު ބޭއްވި ރިޔާސީ އިންތިހާބުގެ އިތުރުން 2023 ވަނަ އަހަރު ބޭއްވި ރިޔާސީ އިންތިހާބުގައި ފުއާދު ވަނީ އިސްދައުރެއް އަދާކުރައްވާފަ އެވެ.
