ބޮޑެތި ތުހުމަތުތަކާ އެކު ނަޝާތާއި އީސީގެ މެންބަރު އާސިފް ވަކިކޮށްފި
އިލެކްޝަންސް ކޮމިޝަން (އީސީ) ގެ ނައިބު ރައީސް އަލީ ނަޝާތާއި އެ ކޮމިޝަނުގެ މެންބަރު މުހައްމަދު އާސިފް މަގާމުން ވަކިކުރަން ރައްޔިތުންގެ މަޖިލީހުން ފާސްކޮށްފި އެވެ.
ނަޝާތާއި އާސިފާ އެކު ކޮމިޝަނުގެ މެންބަރު ޑރ. މުހައްމަދު ޒާހިރުގެ މައްސަލަ ވެސް މަޖިލީހަށް ހުށަހެޅި އެވެ. އެހެންނަމަވެސް މަޖިލީހުގެ މިއަދުގެ ޖަލްސާގައި ވަކިވަކިން ވޯޓަށް އެހިއިރު، 70 މެންބަރުންގެ އިއްތިފާގުން ނިންމީ ޒާހިރު މަގާމުން ވަކިނުކޮށް ބެހެއްޓުމަށެވެ.
ނަޝާތު ވަކިކުރަން ފާސްކޮށްފައިވަނީ 69 މެންބަރުންގެ ވޯޓުންނެވެ. އޭނާ ވަކިކުރަން ނުފެންނަ ކަމަށް ވޯޓު ދެއްވީ 10 މެންބަރެކެވެ. އަދި އާސިފް ވަކިކުރަން 68 މެންބަރުން ވޯޓު ދިންއިރު، ނުފެންނަ ކަމަށް 10 މެންބަރަކު ވޯޓު ދެއްވި އެވެ.
ގިނަ ތުހުމަތުތަކަކާ އެކު އެ މެންބަރުންގެ މައްސަލަ މިނިވަން މުއައްސަސާތަކާ ބެހޭ ކޮމިޓީން ވަނީ ދިރާސާކޮށްފަ އެވެ. އެ ދިރާސާގެ މައްޗަށް ކޮމިޓީން އެކުލަވާލި ރިޕޯޓު މިއަދުގެ ޖަލްސާގައި އެ ކޮމިޓީގެ މުގައްރިރު އަދި މާފުށީ ދާއިރާގެ މެންބަރު ހުސައިން ރިޒާ އާދަމް ވަނީ މަޖިލީހުގެ ތަޅުމަށް އިއްވަވާދެއްވާފަ އެވެ.
ކޮމިޓީއަށް ފާހަގަކުރެވުނު ކަންކަން:
- އެ ތިން މެންބަރުންނާ ގުޅުން އޮންނަ ވަކި ވިޔަފާރި ކުންފުންޏަކާ ގުޅިގެން އީސީއަށް ބޭނުންވާ ކޮމްޕިއުޓަރު ސިސްޓަމްތަކެއް ހޯދުން.
- ގުޅުން އޮންނަ ކުންފުންޏަކުން އީސީއަށް ބޭނުންވާ ބައެއް ސާމާނު ހޯދުން.
- އީސީގެ މުވައްޒަފުންނާ މުއާމަލާތްކުރުމުގައި އިހުތިރާމު ކުޑަކޮށް, ބޭއަދަބީ ބަހުން ނަޝާތު މުއާމަލާތް ކުރައްވާފައިވުން.
- އެ ތިން މެންބަރުން ވާހަކަ ދައްކަވާއިރު ކޮރަޕްޝަނަކީ މައްސަލައެއް ނޫން ކަމަށާއި ފައިސާއަށް ޓަކައި ވޯޓު ވިއްކާނެ ކަމަށާއި އެ ކަންކަމަކީ މައްސަލައެއް ނޫން ކަމަށް ވިދާޅުވެފައިވުން.
- އީސީގެ ސީނިއާ ބައެއް މުވައްޒަފުން ނަޝާތު ކޮންޓްރޯލް ކުރައްވައިގެން ގެންގުޅުން.
- ސިޔާސީ ޕާޓީއެއް އުފައްދަން ސޮއިކުރި މެންބަރުންގެ ލިސްޓު އޭރުގެ ރައީސް އޮފީހުގެ އިސް ފަރާތަކަށް ފޮނުވާ އެ ޕާޓީ އުފައްދަން ހުރަސް އެޅުން.
- ވަކި ވިޔަފާރި ކުންފުންޏަކާ އެކު ސިއްރު މުއާމަލާތްތަކެއްކޮށް، އީސީގެ އައިޓީއަށް ބޭނުންވާ ސާމާނުތަކެއް ހޯދައި އެއިން ކޮންމެ މުއާމަލާތަކުން ބޮޑު އަދަދެއްގެ މަންފާއެއް އެ ތިން މެންބަރުން ނަގާފައިވުން.
- ކޮމިޝަނުގެ ބައެއް މެންބަރުންނާ ނަޝާތު ލޯބީގެ ގުޅުން ބޭއްވުން.
- އީސީގެ ބައެއް މުވައްޒަފުންނާ ޒާތީ ގޮތެއް ބެހެއްޓުމާއި މުވައްޒަފުންގެ މަސައްކަތަށް ހުރަސް އަޅައި, ނަޝާތު ހިންގާ ކޮރަޕްޝަނުގެ އަމަލުތަކުގައި ބައިވެރިނުވާ މުވައްޒަފުންނަށް ބިރު ދެއްކުން.
- އީސީގެ ޑާޓާ ބޭސް ނަގައިގެން ނަޝާތު އެޕްލިކޭޝަން ހަދައި ވިއްކާފައިވޭ. އަދި އެ އެޕްލިކޭޝަންތަކުގެ އެކްސެސް ސިޔާސީ ޕާޓީތަކަށް ދީފައިވުން.
- މިދިޔަ ރިޔާސީ އިންތިހާބު ވަކި ސިޔާސީ ޕާޓީއަކަށް ކާމިޔާބު ކޮށްދިނުމަށް ތިން މެންބަރުން މަސައްކަތް ކުރެއްވުން.
- މީގެކުރިން ވެސް ރިޔާސީ އިންތިހާބުގެ ރީ-ރަޖިސްޓްރީ ކުރުމުގައި މަކަރު ހަދައި, އޮޅުވާލުމުގެ އަމަލުތަކެއް ތިން މެންބަރުން ކުރައްވާފައިވުން.
- ގަސްތުގައި ވަކި ސިޔާސީ ޕާޓީއެއް އުވާލުމަށް, ވަގު ފޯމު ހަދާ އަމަލީ ގޮތުން މަސައްކަތްކޮށް, އެ ޕާޓީގެ 3،000 މެންބަރުން ހަމަ ވިޔަ ނުދިނުމަށް އެ ތިން މެންބަރުން މަސައްކަތް ކުރައްވާފައިވުން.
- ބިޑް ކޮމިޓީގެ މެންބަރުންނަށް އެ ތިން މެންބަރުން އެދޭ ގޮތަށް މަސައްކަތްނުކޮށްފިނަމަ ވަޒީފާއިން ވަކިކުރާނެ ކަމުގެ ބިރު ދައްކާފައިވުން.
- އެޗްއާރް ސިސްޓަމުން އަމިއްލައަށް ވަކިން ފޮތެއް ހަދައިގެން އީސީއަށް ހާޒިރުނުވާ ދުވަސްތަކުގައި ހާޒިރުވާ ކަމަށް ޖަހައި, ހާޒިރުވާ ދުވަސްތަކުގައި ގަޑިތައް ނަޝާތު ބަދަލުކުރުން.
- އީސީގެ މެންބަރުންނާ ގުޅިގެން ކޮމިޝަނުގެ ރައީސް އާ ދެކޮޅަށް އެސްޖީގެ މަގާމަށް އެކަށީގެންނުވާ މީހަކު އައްޔަންކުރަން ނުފޫޒު ފޯރުވާފައިވުން.
- އާސިފާއި ޒާހިރު ވެސް އެޗްއާރް ސިސްޓަމުން ހާޒިރުވާ ގަޑި ބަދަލުކުުރުން
- އީސީގައި ރައްކާކޮށްފައިވާ ދިވެހި ރައްޔިތުންގެ މައުލޫމާތު އާންމު ފަރާތްތަކަށް ވިއްކާ, އޭގެ މަންފާ ތިން މެންބަރުން ހޯދާފައިވުން.
- މުވައްޒަފުންގެ މެދުގައި ކޮމިޝަނުގެ ރައީސްގެ އަގު ވައްޓާލަން ފާޅުގައި އެ ތިން މެންބަރުން މަސައްކަތްކޮށްފައިވުން.
- ސިޔާސީ އެކި ފަރާތްތަކާ ނަޝާތު ގާތް ގުޅުމެއް ބާއްވައި, ހާއްސަކޮށް ކުރީގެ ރައީސް އޮފީހުގެ މުވައްޒަފަކާ އެކީ އެކި ގޮތްގޮތުން ބައްދަލުކުރުން.
ނަޝާތާއި އާސިފް އީސީގެ މެންބަރުކަމުން ވަކިކުރުމާ އެކު އީސީގެ މެންބަރުންގެ ގޮތުގައި މިހާރު ތިއްބަވާނީ ހަސަން ޒަކަރިއްޔާ އާއި ޒާހިރެވެ. އީސީގެ ރައީސް ފުއާދު ތައުފީގުގެ ދައުރު ހަމަވެފައިވާއިރު, އީސީގެ މެންބަރު ކަމަށް އައްޔަންކުރަން ރައްޔިތުންގެ މަޖިލިހުން މިފަހުން ރުހުންދިން އަބްދުލް ހަސީބް އިސްމާއިލް މަގާމަށް އަދި އައްޔަންކުރައްވާފައެއް ނުވެ އެވެ.
