އިޒްރޭލު ޕާސްޕޯޓް މަނާކުރުމާ މެދު ފަލަސްތީނުގެ ބަހެއް ހޯދަން ޖެހޭ: ފަލާހު
އިޒްރޭލުން ފަލަސްތީނުގައި ޖަރީމާތައް ހިންގަމުންދާތީވެ, އިޒްރޭލު ރައްޔިތުންނަށް ރާއްޖެ ނާދެވޭ ގޮތަށް އެ ގައުމުގެ ޕާސްޕޯޓް މަނާކުރުމާ މެދު ފަލަސްތީނުގެ ބަހެއް ހޯދަން ޖެހޭ ކަމަށް ރައްޔިތުންގެ މަޖިލީހުގެ އިނގުރައިދޫ ދާއިރާގެ މެންބަރު އަދި ޕީއެންސީގެ ޕާލިމެންޓަރީ ގްރޫޕުގެ ލީޑަރު އިބްރާހިމް ފަލާހު މިއަދު ވިދާޅުވެއްޖެ އެވެ.
އިޒްރޭލު ޕާސްޕޯޓުގައި ރާއްޖެ އައުން މަނާކުރުމަށް އިމިގްރޭޝަންގެ ގާނޫނަށް އިދިކޮޅު މައި ޕާޓީ އެމްޑީޕީގެ މެންބަރު މީކާއިލް ނަސީމް ހުށަހަޅުއްވާފައިވާ މައްސަލައާ ގުޅޭގޮތުން މަޖިލީހުގެ ސަލާމަތީ ކޮމިޓީ (241) އިން މިއަދު ބޭއްވި ބައްދަލުވުމުގައި އެ ކޮމިޓީގެ ނައިބް މުގައްރިރުކަން ވެސް ކުރައްވާ ފަލާހު ވިދާޅުވީ އިޒްރޭލުން ފަލަސްތީނާ ދެކޮޅަށް ހިންގަމުންދަނީ "ނުބައި، އަނިޔާވެރި" އަމަލުތަކެއް ކަމަށެވެ.
ފަލާހު ވިދާޅުވީ އިޒްރޭލު ޕާސްޕޯޓް މަނާކުރުމަކީ ފުޅާ ދާއިރާއެއްގައި މަޝްވަރާ ކުރެވެން ޖެހޭ ކަމެއް ކަމަށެެވެ. އެ މައްސަލައަކީ ސިޔާސީ ނިޔަތެއްގައި ގައުމަށް ގެއްލުން ދިނުމަށް ހުށަހެޅިފައިވާ މައްސަލައަކަށްވެގެން ނުވާނެ ކަމަށެވެ.
"އަޅުގަނޑަށް ފާހަގަކުރެވޭ ގޮތުގައި މިކަމުގައި ފަލަސްތީނުގެ ބަހެއް ހޯދަން ޖެހޭ. އެ ގައުމުގެ ވެސް ވެރިން އެބަތިބި، ކަމާ ގުޅުން ހުރި އިދާރާތައް އެބަހުރި، ރާއްޖެއަށް އިޒްރޭލުގެ ރައްޔިތުން އައުން މަނާކުރުމުން އެ ބޭފުޅުންނަށް އެ ގައުމަށް މިކަމުގައި ކިހާ މަންފާ ފައިދާއެއް ހުރިތޯ ނުވަތަ އެ ބޭފުޅުންނަށް ލިބޭނެ ހިތްހަމަޖެހުމެއް އުފާވެރިކަމެއް އޮތްތޯ،"
ފަލާހު ވިދާޅުވީ އަރަބި އެހެން ގައުމުތަކުގެ އިތުރުން ދުނިޔޭގެ އެހެން ބޮޑެތި ގައުމުތަކުގެ ކަމާ ގުޅުން ހުރި އިދާރާތަކުގެ ލަފާ އާއި މަޝްވަރާ ވެސް އެކަމުގައި ހޯދަން ޖެހޭނެ ކަމަށެވެ. "އިޒްރޭލުގައި ވެސް އެތައް ސަތޭކަ، އެތައް ލައްކަ މުސްލިމުން އެބައުޅޭ، އެހެންވީމާ އިޒްރޭލު ޕާސްޕޯޓް މަނާކުރާއިރުގައި މިއީ އަވަސް އަރުވައިލައިގެން ނިންމާލެވޭނެ މައްސަލަ އެއް ނޫން،" އޭނާ ވިދާޅުވި އެވެ.
އެމްޑީޕީގެ މެޖޯރިޓީީ އޮތް 19 ވަނަ މަޖިލީހުގައި، އިޒްރޭލު ޕާސްޕޯޓް މަނާކުރަން މަޖިލީހަށް ހުށަހެޅުމުން އެމްޑީޕީން އެކަން ނުކޮށް އޮތް ސަބަބާ މެދު ފަލާހު ސުވާލު އުފެއްދެވި އެވެ.
އިޒްރޭލު ޕާސްޕޯޓް މަނާކުރުމާ ގުޅޭގޮތުން 241 ކޮމިޓީން މޯލްޑިވްސް އިމިގްރޭޝަންގެ އިތުުރުން ކަމާ ގުޅޭ އިދާރާތަކުގެ ބަހެއް ހޯދުމަށް އެދިފައިވެ އެވެ. ޕާސްޕޯޓް މަނާކުރުމާ މެދު މެންބަރުންގެ މެދުގައި ހިޔާލު ތަފާތުވުންތައް އެބައުޅެ އެވެ. ކޮމިޓީގެ ގިނަ މެންބަރުން ދެކިވަޑައިގަންނަވާ ގޮތުގައި މަނާކުރަން ޖެހެނީ ފަލަސްތީނާ ދެކޮޅަށް ލާއިންސާނީ އަމަލުތައް ހިންގާ އިޒްރޭލުގެ ވެރިންގެ ޕާސްޕޯޓެވެ.
އިޒްރޭލު ޕާސްޕޯޓު ބިލުގެ މަސައްކަތް ނިންމާނެ ތާރީހެއްގެ ގޮތުގައި މީގެ ކުރިން ދީފައިވަނީ ފެބްރުއަރީ މަހެވެ. އެހެންނަމަވެސް އެ ބިލުގެ މަސައްކަތް އެއަށް ވުރެ އަވަހަށް ނިންމާލުމަށް ކޮމިޓީން ވަނީ އަމާޒު ހިފާފަ އެވެ.
Ads by STO
