ވިނަރެސް ޓަވަރުތަކުން ކާރު ޕާކު ކުރަން ޖާގަ ދޫކުރަނީ
ވިނަރެސް މަޝްރޫއިން ފްލެޓު ގަނެފައިވާ ފަރާތްތަކަށް އެ އިމާރާތްތަކުން ކާރު ޕާކު ކުރާނެ ޖާގަ ދޫކުރުމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ނިންމައިފި އެވެ.
އެޗްޑީސީން ބުނީ އިއްޔެ ކުރި އިއުލާނެއްގައި ބުނީ ޕާކު ކުރުމުގެ ޖާގަ ދޫކުރުމަށް ހަމަޖެހިފައި ވަނީ 2 މޮޑެލެއްގެ ދަށުން ކަމަށެވެ. އެގޮތުން އިމާރާތުގެ ތެރެއިން، ކާރު ރެޖިސްޓްރީ ކުރުމުގެ ހުއްދަ އާއެކު 76 ޖާގަ އަދި އިމާރާތުގެ ބޭރުން ހަމައެކަނި ޕާކު ކުރުމުގެ ބޭނުމަށް 78 ޕާކިން ޖާގަ ދޫކުރުމަށް އެ ކޯޕަރޭޝަނުން ނިންމާފައިވެ އެވެ.
ޕާކިން ޖާގައަށް އެދި ހުށަހެޅުމުގެ ޝަރުތުތައް:
- ފްލެޓު ގަތުމުގެ އެެއްބަސްވުމުގައި ސޮއިކޮށްފައިވާ މައި-އެޕްލިކެންޓް ކަމުގައިވުން
- އަންނަ މަހުގެ 5 ވަނަ ދުވަހުގެ ނިޔަލަށް އެއްވެސް ފައިސާއެއް ދައްކަން ޖެހި، އެ ފައިސާ ނުދައްކާވާ ފަރާތަކަށް ނުވުން
- ކޮންމެ ފަރާތަކަށް ދޫކުރާނީ 1 ޕާކިން ޖާގަ
- ޕާކިން ޖާގައަކީ ފްލެޓު ގަތުމުގެ އެއްބަސްވުމުގެ ދަށުން ދޫކުރާ ޖާގައެއްގެ ގޮތުގައި ހަމަޖައްސާނެ
އިމާރާތުގެ ތެރެއިން ދޫކުރާ ޖާގަ ގަންނަ ފަރާތަކަށް އެ ޖާގައިގައި ކާރު ރެޖިސްޓްރީ ކުރުމުގެ ހުއްދަ ދޫކުރާނެ އެވެ. ބީލަމުގެ އުސޫލުން ޖާގަތައް ވިއްކާއިރު، ބީލަން ފެށޭ އަގަކީ 650،000 ރުފިޔާ އެވެ. ބީލަން ކާމިޔާބުކުރާ ފަރާތަކަށް ޕާކިން ޖާގައިގެ ޖުމްލަ އަގު ދެއްކުމަށް 30 ދުވަހުގެ މުއްދަތެއް ދޭނެ އެވެ.
އިމާރާތުގެ ބޭރުން ޕާކު ކުރުމުގެ ބޭނުމަށް ޖާގަ ކުއްޔަށް ދޫކުރާނީ 5 އަހަރު ދުވަހުގެ މުއްދަތަކަށެވެ. ބީލަން ފެށޭ އަގެއް ކަމުގައި މަހު ކުލީގެ ގޮތުގައި އެޗްޑީސީން ކަނޑައަޅާފައި ވަނީ 2،000 ރުފިޔާ އެވެ. ސެކިއުރިޓީ ޑިޕޮސިޓުގެ ގޮތުގައި 3 މަހުގެ ކުއްޔަށްވާ ފައިސާ ދައްކަން 7 ދުވަހުގެ މުއްދަތެއް ދޭނެ އެވެ. އެ ކޯޕަރޭޝަނުން ބުނި ގޮތުގައި ޕާކިން ޖާގަ ދޫކުރާނީ ހަމައެކަނި ކާރު ޕާކު ކުރުމުގެ ބޭނުމަށް ކަަމުގަ އެވެ. އަދި ޖާގަތަކުގައި ކާރު ރެޖިސްޓްރީ ކުރުމުގެ ހުއްދަ ނުދެވޭނެ ކަމުގަ އެވެ.
ވިނަރެސް ޓަވަރުތަކުން ބީލަމުގެ އުސޫލުން ދޫކުރާ މި ޖާގަތައް ގަތުމަށް ނުވަތަ ކުއްޔަށް ހިފުމަށް ޝައުގުވެރިވާ ފަރާތްތަކުން އެކަމަށް އެދި https://bids.hdc..mv ހުށަހެޅުމުގެ ފުރުސަތު އަންނަ މަހުގެ 5 ވަނަ ދުވަހުގެ ނިޔަލަށް ވަނީ ހުޅުވާލާފަ އެވެ.
Ads by STO
