މަސްވެރިންނަށް ނުދެވި އޮތް 22 މިލިއަން ދޫކުރަން ފަށައިފި
މަސްވެރިންގެ އަތުން މަސް ކިރުމަށްފަހު މޯލްޑިވްސް އިންޑަސްޓްރިއަލް ފިޝަރީޒް ކޮމްޕެނީ ލިމިޓެޑް (މިފްކޯ) އިން މަސްވެރިންނަށް ދޭން ޖެހޭ 22.9 މިލިއަން ރުފިޔާ ދޫކުރަން ފަށާފައިވާ ކަމަށް އެ ކުންފުނިން ބުނެފި އެވެ.
މިފްކޯއިން މިއަދު ބުނީ މި ފަހަރު ދޫކުރަނީ މިިދިޔަ މަހުގެ 28 އިން ފެށިގެން މި މަހުގެ 15އާ ހަމައަށް ކިރުވާފައިވާ މަހަށް ދޫނުކޮށް އޮތް 22.9 މިލިއަން ރުފިޔާ ކަމަށެވެ.
އަދި އެ ފައިސާ މިހާރު އެކައުންޓްތަކަށް ޖަމާކުރަމުންދާ ކަމަށް ވެސް ބުނެފައިވެ އެވެ.
މަސްވެރިންނަށް އެންމެ ފަހުން ފައިސާ ދޫކުރީ މިދިޔަ މަހުގެ 31 ވަނަ ދުވަހު އެވެ. އެގޮތުން 27 ސެޕްޓެމްބަރުން މިދިޔަ މަހުގެ 27 އާ ހަމަައަށްވާ މުއްދަތަށް ކިރި މަަހަށް 15 މިލިއަން ރުފިޔާ ދޫކޮށްފައިވެެ އެވެ.
މި ސަރުކާރު އައި ފަހުން މަސްވެރިންނަށް ދައްކަން ޖެހޭ ފައިސާ ސަރުކާރުން ޖަމާނުކޮށްގެން ދެ ފަހަރެއްގެ މަތިން މަސްވެރިން މުޒާހަރާ ކުރި އެވެ.
މާލެ ސަރަހައްދުގައި ރިޔާސީ ފާލަން ހުންނަ ސަރަހައްދާއި އެމްއެމްއޭ ކުރިމަތީގެ ފަޅުތެރޭގައި ވެސް މަސްވެރިން ވަނީ އިހުތިޖާޖުކޮށްފަ އެވެ.
މި ސަރުކާރު ވެރިކަމަށް އައުމަށް ފަހު މިހާތަނަށް މަސްވެރިންނަށް ދޫކުރި ފައިސާގެ އަދަދު މިހާރު ވަނީ 918.7 މިލިއަން ރުފިޔާއަށް އަރައިފަ އެވެ.
Ads by STO
