Tuesday, 17 November 2026
Advertisement
Ooredoo — Airfibre (leaderboard)
ޚަބަރު

ސިއްހީ ހާލަތު ތަން ނުދޭތީ މިނިސްޓަރު ރަމީލާ އިސްތިއުފާ ދެއްވައިފި

ސިއްހީ ހާލަތު ތަން ނުދޭތީ މިނިސްޓަރު ރަމީލާ އިސްތިއުފާ ދެއްވައިފި

އެގްރިކަލްޗާ އެންޑް އެނިމަލް ވެލްފެއާގެ މިނިސްޓަރުގެ މަގާމުން ޑރ އާއިޝަތު ރަމީލާ އިސްތިއުފާ ދެއްވައިފި އެވެ.

އެ މަގާމުން ރަމީލާ އިސްތިއުފާ ދެއްވާފައިވަނީ ސިއްހީ ހާލަތު ހުރިގޮތުން، މަގާމުގެ މަސްއޫލިއްޔަތު އަދާކުރުމަށް ތަން ނުދޭތީ އެވެ.

ރަހިމުގެ ދޮރަށް ޖެހޭ ކެންސަރު، "މެޓަސްޓެޓިސް ސީރަސް ޕަޕިލަރީ ކާސިނޯމާ" އަށް ރަމީލާ ފަރުވާ ހޯއްދަވާތާ މިހާރު ވަނީ ގިނަ ދުވަސްތަކެއް ވެފަ އެވެ. މިނިސްޓަރުކަމާ ހަވާލުވެވަޑައިގެންނެވުމަށް ފަހު ވެސް ރަމީލާ ގެންދެވީ ފަރުވާ ހޯއްދަވަމުންނެވެ.

Advertisement
Ooredoo — Square (box)

ރަމީލާ އޭރު ވިދާޅުވީ، ބަލި ޖެހިފައިވާކަން އެނގިވަޑައިގަތީ ކެންސަރުގެ އެޑްވާންސް ސްޓޭޖުގައި ހުއްޓައި ކަމަށެވެ. އަދި އެކަމަނާ އެ ބައްޔަށް ޑައިގްނޯސްވުމާ ގުޅިގެން ކީމޯ އާއި ރޭޑިއޭޝަން ތެރަޕީ ނެގުމަށް ރާއްޖެއިން ބޭރަށް އެންމެ ފުރަތަމަ ވަޑައިގެންނެވީ މިދިޔަ އަހަރުގެ ނޮވެންބަރު މަހު ފަހުކޮޅުގަ އެވެ. އޭގެފަހުން ވެސް ރަމީލާ ވަނީ އިތުރު ސާޖަރީއެއް ހައްދަވާފަ އެވެ.

މިނިސްޓަރު އިސްތިއުފާ ދެއްވުމަށް ހުށަހެޅުއްވުމާއި ގުޅިގެން އެ އިސްތިއުފާ ގަބޫލުކުރައްވާ ރައީސް ޑރ. މުހައްމަދު މުއިއްޒު ނެރުއްވި ނޫސް ބަޔާނުގައި ވިދާޅުވީ، މިނިސްޓަރެއްގެ ހައިސިއްޔަތުން އެންމެހައި ރައްޔިތުންނަށް ލާބައާއި ފާގަތިކަން ހޯދައިދެއްވުމަށް ރަމީލާ މަސައްކަތް ކުރައްވާފައިވާ ކަމަށެވެ.

ރަމީލާ ފަދަ ހީވާގި އަމާނާތްތެރި ގާބިލު ބޭފުޅަކު ވަޒީރުންގެ މަޖިލީހުގައި ހިމެނުމަކީ ވެސް ލިބުނު ފަހުރެއްކަން އެމަނިކުފާނު ފާހަގަ ކުރެއްވި އެވެ. އަދި މިނިސްޓަރެއްގެ ހައިސިއްޔަތުން ހިދުމަތް ކޮށްދެއްވި ދުވަސްތަކުގައި، ސަރުކާރަށް ކޮށްދެއްވި ހިދުމަތްތައް ފާހަގަކޮށް، ޝުކުރު އަދާކުރެއްވި އެވެ.

ރަމީލާ މިނިސްޓަރުކަމަށް އައްޔަން ކުރައްވާފައިވަނީ މިދިޔަ އަހަރުގެ ނޮވެމްބަރު މަހު އެވެ. އެކަމަނާ ވަނީ ރައީސް އަބްދުﷲ ޔާމީންގެ ވެރިކަމުގައި ހެލްތު މިނިސްޓްރީގެ ސްޓޭޓް މިނިސްޓަރުކަން ވެސް ކުރައްވާފަ އެވެ.

އޭގެއިތުރުން، ރަމީލާ ވަނީ ޖެންޑާ މިނިސްޓްރީގެ ސްޓޭޓް މިނިސްޓަރުކަމާއި މޯލްޑިވްސް މެޑިކަލް އެންޑް ޑެންޓަލް ކައުންސިލްގެ ރަޖިސްޓްރާކަން ވެސް ކުރައްވައިފަ އެވެ.

ރިއެކްޝަން

Advertisement
Ooredoo — Square (box)

ކޮމެންޓް

މި ލިޔުމަށް ކޮމެންޓް ކުރުން ވަނީ ބަންދުކޮށްފައެވެ.