ފިލްމު ފެސްޓިވަލުގައި އަޅުވާ ފިލްމުތަކުގެ ތާވަލު މިއޮތީ
މޯލްޑިވްސް ސޮސައިޓީ ފޯ ޕާފޯމިން އާޓްސް (އެމްއެސްޕީއޭ) އިން މި މަހުގެ ފަހުކޮޅު ބޭއްވުމަށް ތައްޔާރުވަމުން އަންނަ ފިލްމު ފެސްޓިވަލުގެ ތާވަލު ނެރެފި އެވެ.
އެމްއެސްޕީއޭއިން އިސްނަގައިގެން ކުރިއަށް ގެންދާ ފިލްމު ފެސްޓިވަލް ބާއްވަން ނިންމާފައި ވަނީ ނޭޝަނަލް ސެންޓަ ފޯ ދި އާޓްސް (އެންސީއޭ) އާ ގުޅިގެންނެވެ.
މި މަހުގެ 22 ވަނަ ދުވަހުން ފެށިގެން 28 ވަނަ ދުވަހުގެ ނިޔަލަށް ބާއްވާ ފެސްޓިވަލުގެ ތެރެއިން ސިނަމާގައި ދައްކާނީ އެ ސޮސައިޓީގެ ފުރަތަމަ ފިލްމު އެވޯޑު، "އެމްއެސްޕީއޭ ފިލްމު އެވޯޑް 2024" ގައި ބައިވެރިކުރާ ފިލްމުތަކެވެ.
ފިލްމު އެވޯޑަށް ކުރިމަތިލާން ހުޅުވާލި ފުރުސަތުގައި ބައިވެރިކޮށްފައި ވަނީ ޖުމްލަ 19 ފިލްމެކެވެ. އެވޯޑާ ގުޅުވައިގެން ބާއްވާ މި ފެސްޓިވަލުގައި ފިލްމުތައް ދައްކާނެ ގޮތުގެ ތާވަލު މިހާރު ވަނީ ކަނޑައަޅައިފަ އެވެ.
ފެސްޓިވަލުގެ ފުރަތަމަ ދުވަހާއި ފަހު ދުވަހު 2 ފިލްމު އަޅުވާއިރު، އެ ދެމެދުގައި ހޭދަވާ ފަސް ދުވަހު، ދުވާލަކު 3 ފިލްމު ދައްކަން އެމްއެސްޕީއޭއިން ވަނީ ނިންމާފަ އެވެ.
އެމްއެސްޕީއޭއިން މިއަދު ބުނީ މި ފެސްޓިވަލުގައި ބައިވެރިކުރާ ފިލްމުތައް ބަލަން ޓިކެޓު ދޫކުރާނީ 50 ރުފިޔާއަށް ކަމަށެވެ. އޭގެ އިތުރުން ސީޒަން ޓިކެޓުގެ ގޮތުގައި 500 ރުފިޔާއަށް ހާއްސަ ޓިކެޓެއް ވިއްކުމަށް ހަމަޖެހިފައިވާ ކަމަށެވެ. އެ ޓިކެޓަކީ މުޅި ފެސްޓިވަލަށް "އެކްސެސް" ވެވޭ ގޮތަށް ދޫކުރާ ޓިކެޓެކެވެ.
ހަތް ދުވަހަށް ދެމިގެންދާ ފިލްމު ފެސްޓިވަލަށް ފަހު އެމްއެސްޕީއޭ ފިލްމު އެވޯޑު ހަފުލާ ބާއްވާނީ ޑިސެމްބަރު މަހުގެ 30 ވަނަ ދުވަހު އެވެ.
